Read Sangir BAWERAN SALOMO 10 Bible Online

BAWERAN SALOMO 10 - Sangir bible

BAWERAN SALOMO 10

¹Seng ini e kal᷊awọu sasasan Salomo: Anạ pelesa e kai ral᷊uasẹ̌ baugi amange; anạ longong ute makạsusa naungi ninange.

²Kakakalạ kụ kẹ̌kaěbakeng su tawẹ katul᷊ide tawe makaonggọ u kal᷊auntu, arawe su sěmběkane, katul᷊idẹ̌ e sarung makasal᷊amatẹ̌.

³MAWU e tawe mapakawalan taumata mapia e kal᷊unusang, arawe i Sie měnẹ̌nahaghe taumata ral᷊akisẹ̌ e, tadeạu taumata ene tawe makahombang apang ilẹ̌ěnninge.

⁴Taumata malasẹ̌ e sarung manawo masusa; taumata maradinge sarung makalạ.

⁵Taumata pelesa e mạngomol᷊ẹ̌ pěnsạ e su musunge, arawe taumata kụ měngkate mẹ̌tẹ̌tikị e su tempong pěmaměnsạ e, makạkaděntang mea su watangenge.

⁶Taumata mapia e makahombang al᷊amatẹ̌. Katatingkaị e kạl᷊aambing su l᷊ikudu kal᷊awọu waweran taumata ral᷊akisẹ̌ e.

⁷Tiwạ e su taumata mapia e kai mạkoạ al᷊amatẹ̌, arawe taumata ral᷊akisẹ̌ e tawẹ karěngụ e kawul᷊enang.

⁸Taumata pelesa e puluang měnarimạ sasasa, arawe taumata wisarane longong e, sarung mapal᷊idẹ̌.

⁹Taumata matul᷊idẹ̌ e, pẹ̌bawiahe mal᷊enehẹ̌; arawe měndal᷊inga e sarung kasingkateng.

¹⁰I saing měmuning katěngadẹ̌ e, makạkaděntang kasasigẹ̌sạ; arawe i saing kụ měněngkul᷊ẹ̌ su tualage; mẹ̌tẹ̌tawakal᷊i karal᷊unsemahẹ̌.[6]

¹¹Dụdaton taumata mapia e makạual᷊i pẹ̌bawiahẹ̌ makariangkamang, arawe su sěmběkam bisaran taumata ral᷊akisẹ̌ e kai kạl᷊aambing naung matingkaị.

¹² Pẹ̌bawinsị e kai makạbodaị pẹ̌sasitori; tatal᷊ěntụ dingangu kakěndagẹ̌ e mạngampung kal᷊awọu pẹ̌sasal᷊a.

¹³Taumata tiněnnane mal᷊ahoro e mẹ̌bẹ̌berang bawera matatumang; arawe taumata longong e hinong geserang.

¹⁴Taumata pelesa e měnẹ̌nampung kasingkạ; kereu taumata wodo mẹ̌bisara e, i sie měnẹ̌nongkahẹ̌ silakạ.

¹⁵Kakakalạ e měngẹ̌ngěllung taumata marotong, arawe kasasigěsạ e makạgolang taumata kasiang.

¹⁶Kereu mẹ̌koạ mapia e, bawal᷊ise ute pẹ̌bawiahẹ̌ su karal᷊uasu naung; arawe kamagengu mẹ̌baradosa e, aị e ute limembong kal᷊awọe rosa e.

¹⁷I saing mạngarěgang sasal᷊ěntihọ e sarung mẹ̌biahẹ̌ mal᷊unsemahẹ̌, arawe i saing maghoẹ̌ měngakun sal᷊ane e, ute ene su ral᷊ungu silakạ.

¹⁸Taumata kụ měmẹ̌muning pẹ̌bawinsị ute kai tahapělinga. Taumata kụ mẹ̌kẹ̌kakekeng lahinakang ute kai longong.

¹⁹Mangkeng kakạl᷊awọe wisara, mangkeng kakạl᷊awọe lěsabu mẹ̌barạdosa e; taumata kụ makaul᷊ing lilane ute kai taumata pelesa.

²⁰Baweran taumata mapia e, tạbidạu sal᷊aka tutune; buan tiněnnan taumata ral᷊akisẹ̌ tawẹ mangal᷊ene.

²¹Baweran taumata mapia e, mạngawẹ al᷊amatẹ̌ baugu taumata l᷊awọ e; karal᷊ongongu taumata wodo e mạmate wadange sẹ̌sane.

²²Ual᷊ingu al᷊amatu MAWU e samatang, taumata e makalạ; pělahal᷊ẹ̌ masěgadẹ̌ e tawe makatamba arětạ.

²³Taumata wodo e makěhagẹ̌ mẹ̌koạ pẹ̌sasal᷊a; taumata pelesa e makěhagẹ̌ mẹ̌deạ kapelesa.

²⁴Taumata matul᷊idẹ̌ e makạdeạ apang ilẹ̌ěnninge; taumata ral᷊akisẹ̌ e makạhombang apang něngalembong i kẹ̌katakụ e.

²⁵Kereu rěllang e tumangga, masue mapuạ taumata ral᷊akisẹ̌; arawe taumata matul᷊idẹ̌ e kạtatanạbe matoghasẹ̌ sarang marěngụ-děngụ.

²⁶Kumbahang měngoro taumata malaseng, i sie tumbạeng makạdal᷊akisẹ̌ naung, mẹ̌sul᷊ungu haesẹ̌ makạngirasẹ̌ isi, arau tipu makạpěpusẹ̌ mata.

²⁷Pěngadatẹ̌ko MAWU, tangu i kau sarungbe mẹ̌biahẹ̌ mararěnna; taumata ral᷊akisẹ̌ e mate rem bal᷊ine tempone.

²⁸Pělaharapu taumata mapia e makạl᷊uasẹ̌ si sie; arawe pělaharapu taumata ral᷊akisẹ̌ e mamben tawẹ lohone marihutu.

²⁹MAWU e mạngěllung taumata matul᷊idẹ̌, katewe kawe mạmihua taumata mẹ̌kẹ̌koạ dal᷊akisẹ̌.

³⁰Taumata tulusẹ̌ e mẹ̌bẹ̌biahẹ̌ mal᷊enehẹ̌ tawẹ konsange; arawe taumata ral᷊akisẹ̌ e tawe matatanạ su wanua tutune.

³¹Taumata tulusẹ̌ e mẹ̌bẹ̌bisarang baweram pelesa; arawe taumata ral᷊akisẹ̌ e sarung i pẹ̌kěmming mohonge.

³²Baweran taumata tulusẹ̌ e makạl᷊uasẹ̌ naung; arawe waweran taumata ral᷊akisẹ̌ e měngkate hanesẹ̌ makạtědụ naung.