Read Sangir BAWERAN SALOMO 11 Bible Online

BAWERAN SALOMO 11 - Sangir bible

BAWERAN SALOMO 11

¹MAWU e mẹ̌bẹ̌binsị u taumata kụ mẹ̌pẹ̌pakẹ u timbangeng tạ katul᷊ide arawe i Sie mal᷊uasẹ̌ dingangu taumata kụ mẹ̌pẹ̌pakẹ u timbangeng su katul᷊ide.

²Taumata maobotẹ̌ e sarung tahumeang; arawe taumata naunge masanạ e kai pelesa.

³Taumata mapia e lẹ̌ahakengu katul᷊ide; taumata puluang mẹ̌konti e ghẹ̌gagholokangu kontine.

⁴Kereu tumatěngo papate e, arětạ tataghuanenge tawẹ mangal᷊ene; pẹ̌bawiahu e sarung masal᷊amatẹ̌ kereu i kau e matul᷊idẹ̌ naungu.

⁵Dal᷊engu wiahu taumata mapia e nipakateneng katul᷊idẹ̌ e, arawe taumata ral᷊akisẹ̌ e mẹ̌bẹ̌bawa watangenge sarang kananawo.

⁶Taumata matul᷊idẹ̌ e masal᷊amatẹ̌ ual᷊ingu katul᷊idu naunge; taumata kụ tawe kapangimangenge, mawunsal᷊u kal᷊aanggange.

⁷Kereu taumata ral᷊akisẹ̌ e mate, pělaharape mal᷊aing mate; mangumbala katoghasu watangenge tawẹ mangal᷊ene.

⁸Taumata mangimange mal᷊ingkạ bọu kasasěsẹ; taumata ral᷊akisẹ̌ e makaěbạ sasahaghene.

⁹Pẹ̌bawisaran taumata ral᷊akisẹ̌ e makạbinasa; kapelesan taumata mapia e makạsal᷊amatẹ̌.

¹⁰Soa e marimạ kereu taumata matul᷊idẹ̌ e makahombang azeki; kawanua e měmpahul᷊iagẹ̌ kereu taumata ral᷊akisẹ̌ e mate.

¹¹Kanaungu taumata matul᷊idẹ̌ makạl᷊ěnggihẹ̌ soa; arawe waweran taumata ral᷊akisẹ̌ e makạgolang.

¹²Měhinakang taumata wal᷊ine e kai kakanoạ pěmparal᷊u; taumata mawudi e tawe makawerang apa.

¹³Měngangekeng habarẹ̌ niusẹ̌ e tawe makaumbelẹ rahasia, arawe taumata kapangumbalaěnge botonge makaresọ rahasiaʼm pěrkara.

¹⁴Bansa e mawihua kereu tawẹ pangahạ e; mangkeng kakạl᷊awọe měnanasa e, mangkeng kakạtoghase kasasal᷊amatẹ̌ e.

¹⁵Mẹ̌diandi měmaehẹ̌ utangu taumata wal᷊ine ute kai makạkaděntan silakạ; mapiawe tawe masangkong su hal᷊ẹ̌ ene mẹ̌deạu mal᷊enehẹ̌.

¹⁶Bawine lulune mapia e makạhombang laadatẹ̌; arawe taumata matingkaị e měngẹ̌ngomol᷊ẹ̌ kakakalạ.

¹⁷Taumata naunge mapia e makạbarạuntu watangenge; taumata matingkaị e mẹ̌děndugi watangenge.

¹⁸Kal᷊auntu waugu taumata ral᷊akisẹ̌ e kai kal᷊auntu tawe kaumpaedẹ̌, kal᷊auntu su taumata mẹ̌kẹ̌koạ mapia e, ute kai kal᷊auntu tutune.

¹⁹I saing makěhagẹ̌ mẹ̌koạ mapia e sarung mẹ̌biahẹ̌ mal᷊unsemahẹ̌; i saing měngkai mẹ̌kẹ̌koạ dal᷊akisẹ̌ e mẹ̌tẹ̌timona papate.

²⁰MAWU e mẹ̌bẹ̌binsị u taumata naunge ral᷊akisẹ̌, kaiso i Sie makěndagẹ̌ bue su taumata kụ mẹ̌bẹ̌biahẹ̌ tawẹ turạ e.

²¹Taumata ral᷊akisẹ̌ e mambeng makahombang hukumang, taumata mapia e sarung masal᷊amatẹ̌.

²²Kal᷊aholẹ u wawine kụ tawẹ budine e, mẹ̌sul᷊ungu sinsing bul᷊aeng su irungu wawi.

²³Ěnningu taumata mapia e sěntiniạ makạual᷊i mapia, arawe lẹ̌harapeng u taumata ral᷊akisẹ̌ e kětạembeng dal᷊angehẹ̌.

²⁴Piạ taumata makěhagẹ̌ měngonggọ, kaiso mang kakạkalạ e, piạ taumata makěhagẹ̌ mẹ̌kakehẹ, kaiso mangkeng kakạkasiange marihutu.

²⁵Taumata kụ makěhagẹ̌ mangonggọ e sarung mědẹ̌dal᷊embo, arawe taumata kụ makěhagẹ̌ mẹ̌tul᷊ung e sarung be i tul᷊ung.

²⁶I saing měngkai měnẹ̌nampung e sarung aneěngu taumata, arawe i saing mẹ̌bẹ̌bal᷊ụ e makahombang daralo.

²⁷I saing marading mẹ̌koạ mapia e sarung kapiaěngu taumata e, i saing mẹ̌dẹ̌deạ karal᷊akisẹ̌ e sarung kahombangengu sigěsạ.

²⁸I saim měngkai mạngumbala su arětạ e sarung mahondosẹ̌ kere raukalu mahěgu; taumata maagimatẹ̌ e sarung měměsị kere mungkul᷊u bungang buhu.

²⁹Taumata kụ mapakasigěsạ u ral᷊ungu wal᷊ene sarung kailangengu patikụ e. Taumata longong sarung mẹ̌tangkiang taumata pelesa.

³⁰Taumata maagimatẹ̌ e tawẹ konsange apa pẹ̌bawiahe; taumata pelesa e mạhuntinamba tumatol᷊ene.

³¹ Kereu su dunia ini taumata mapia e mal᷊ain sarung měnarimạ bawal᷊ise, seng nal᷊ahẹ u taumata ral᷊akisẹ̌ dingangu warạdosa e sarung makahombang hukumang.