Read Sangir BAWERAN SALOMO 12 Bible Online

BAWERAN SALOMO 12 - Sangir bible

BAWERAN SALOMO 12

¹Taumata puluang su kasingkạ e mal᷊uasẹ̌ kasěngkul᷊ang; arawe taumata ta kasasěngkul᷊ang ute kai taumata l᷊ongong.

²Taumata mapia e lẹ̌lahimpuluangu MAWU, arawe taumata kụ mělẹ̌hingidẹ̌ karal᷊akisẹ̌ e sarung makatarimạ hukumang.

³Tawẹ l᷊ai sarang sěngkatau kụ těbe tụtindagu karal᷊akisẹ̌ e; arawe taumata kụ matul᷊idẹ̌ e tụtindagẹ̌be matoghasẹ̌, tawe mal᷊engge.

⁴Marehokang mapia e kai makạl᷊uasẹ̌ dingangu makạl᷊ahimpulu kawinge, marehokang kụ makạsamedẹ̌ kawinge ute tạbidạu sakị su ruhi ghụgaghiadẹ̌.

⁵Taumata matul᷊idẹ̌ mẹ̌tẹ̌tahuěnna hal᷊ẹ̌ mapapia; arawe taumata ral᷊akisẹ̌ e mělẹ̌hingidu pěndal᷊inga.

⁶Baweran taumata ral᷊akisẹ̌ e makạpate; arawe waweran taumata matul᷊idẹ̌ e makạsal᷊amatẹ̌.

⁷Taumata ral᷊akisẹ̌ e sarung maondol᷊ẹ̌ dingangu mawinasa tawẹ ěnnạ e; arawe taumata mapia e těbe matoghasẹ̌ bọu hěnto sarang hěnto.

⁸Taumata e rẹ̌daloěng tuhụ kapelesane; taumata e tẹ̌tahumeaěng tuhụ kawawodone.

⁹Něngalembo mapia makoạ kawanua rarodọ kụ piạ hal᷊ẹ̌ e, sul᷊ungu makịtikạ u taumata ghaghuwạ kụ kẹ̌kakawusangu kaěng.

¹⁰Taumata mapia e mẹ̌pẹ̌padul᷊iwe binatang pẹ̌piaraěnge; arawe taumata ral᷊akisẹ̌ e kai manịgěsạ si sie.

¹¹Mělahěnsinuang kụ mělẹ̌hal᷊ẹ̌ masěgadẹ̌ e piạ kaěnge mal᷊awọ; arawe taumata kụ mạngěnsue tempone waugu sạbarang tạ kěhase ute kai taumata wodo.

¹²Taumata ral᷊akisẹ̌ e mẹ̌měnningu makareạ untune wọu taumata duruhaka; taumata mapia e tạbidạu kalu piạ buane.

¹³Taumata ral᷊akisẹ̌ e mạsedẹ u apam bawera ral᷊akisẹ̌ kụ i pẹ̌bẹ̌berane, taumata mapia e mal᷊iwirẹ̌ bọu kasasigěsạ.

¹⁴Apan taumata e makaěbạ gagheserẹ̌ sěndal᷊engu wawera ringangu kakanoạ e; kụ sěngkatau-sěngkatau e ghẹ̌gěllirangu tatendenge tuhụewe lěnnạu hal᷊ẹ̌ e.

¹⁵Taumata longonge mẹ̌pẹ̌pěndang batangenge tawẹ sal᷊ane, arawe taumata pelesa e puluang dumaringihẹ̌ sasasa.

¹⁶Kereu taumata wodo e numěnggạ, su tempo ěndaị e i sie mal᷊aing něnodẹ u natědụ naunge; arawe taumata pelesa e tawe mẹ̌tiaha maning lai tahumeang.

¹⁷Mamewẹ u kạadilẹ̌ e tangu kai ual᷊ingu mẹ̌bera su katul᷊ide; arawe pẹ̌kakonti e kai makạkaděntan tạ adile.

¹⁸Pal᷊ahumbisara tạ timonane e makạl᷊esẹ naung kere pilị u peda, arawe wawera mapapia e mẹ̌sul᷊ungu undang makạul᷊e sakị.

¹⁹Konti e mạsongkahẹ̌ sěngkakondạ, arawe wawerang kakěndagẹ̌ e sarung tatapẹ̌ kanandun tempo.

²⁰Taumata kụ mělẹ̌hingidẹ̌ karal᷊akisẹ̌ e puluang su tạ kạadile; arawe taumata kụ mẹ̌tẹ̌tawakal᷊i mapia e sarung mal᷊unsemahẹ̌.

²¹Taumata mapia e tawe kahinoěngu hombang; arawe taumata ral᷊akisẹ̌ e sarung hanesẹ̌ kahinoěngu sigěsạ.

²²MAWU e mẹ̌bẹ̌binsị u taumata makonti; kaiso i Sie e mal᷊uasẹ̌ su taumata kụ matul᷊idẹ̌.

²³Taumata pelesa e tawe mẹ̌papasialang kasingkạe, arawe taumata wodo e měngkate mạmombengu kawawodoke.

²⁴Pělahal᷊ẹ̌ masěgadẹ̌ e makạkoạ taumata e kawasa; arawe kamamalasẹ̌ e kai makạsihasa taumata makoạ ěllang.

²⁵Kaghaghěnggang e kai makạpědi igasẹ̌, arawe wawera mal᷊ahimumu e kai makạsěllahẹ̌ dal᷊ungu naung.

²⁶Taumata mapia e limembo warạuntu wọu lampunge; arawe taumata ral᷊akisẹ̌ e mạpal᷊idu karal᷊akise.

²⁷Ual᷊ingu pẹ̌dararongol᷊ẹ̌ e kai makạdiadin tawe mal᷊ahumpạ u ilẹ̌ol᷊ang; arawe ual᷊ingu měhal᷊ẹ̌ masěgadẹ̌ e taumata makạhombang kakakalạ.

²⁸Taumata kụ tụtol᷊e ral᷊eng matul᷊idẹ̌ e sarung mẹ̌biahẹ̌ mal᷊unsemahẹ̌; taumata kụ tụtol᷊e ral᷊eng dal᷊akisẹ̌ e tangu kai mẹ̌tẹ̌timona papate.