Read Sangir BAWERAN SALOMO 13 Bible Online

BAWERAN SALOMO 13 - Sangir bible

BAWERAN SALOMO 13

¹Dariọ pelesa e rụdaringihẹ̌ mapia kereu i amange měngonggọu sasal᷊ěntihọ; taumata maobotẹ̌ e mạdiri rumaẹ těgu.

²Baweran taumata mapia e makạkaděntang kal᷊auntu; taumata tạ katul᷊ide makěhagẹ̌ su hal᷊ẹ̌ u tingkaị.

³Taumata kụ matěmudẹ̌ su wawerane e sarung mal᷊enehẹ̌ pẹ̌bawiahe; taumata kụ mẹ̌bera tạ kahumpakenge sarung kahinoěngu soe.

⁴Taumata malaseng e mal᷊awọ ěnninge kaiso tawẹ u sěmbaụ mahumpạ, taumata mělẹ̌hal᷊ẹ̌ masěgadẹ̌ e makaěbạ apang ilẹ̌ěnninge.

⁵Taumata matul᷊idẹ̌ e mẹ̌bẹ̌binsịu konti, arawe lulun taumata ral᷊akisẹ̌ e makạsamedẹ̌ dingangu lẹ̌heghesang.

⁶Katul᷊idẹ̌ měngẹ̌ngěllung taumata mẹ̌bẹ̌biahẹ̌ su kěhịe; arawe karal᷊akisẹ̌ e mẹ̌gěnggoghahẹ̌ taumata warạdosa.

⁷Piạbeng makịtikạ u kalạ, sěmbal᷊iau tawẹ arětạ e, piạben makịtikạ u kasiang, kaiso kawe kalạ botonge.

⁸Tau kalạ e harusẹ̌ maněbangu roitẹ̌, tadeạu pẹ̌bawiahe mal᷊enehẹ̌; tau kasiange mal᷊iwirẹ̌ bọu tatingkaị.

⁹Taumata maimang e kai tabidạu tualagẹ̌ mạtuahẹ̌; arawe taumata ral᷊akisẹ̌ e kai tabidạu sol᷊o mẹ̌dědusẹ̌.

¹⁰Kal᷊aobotẹ̌ e tumbạeng makạual᷊i pẹ̌sasitori; arawe taumata pelesa e puluang dumaẹ těntiro.

¹¹Kakakalạ kụ kẹ̌kaěbakeng mal᷊ighạ e mal᷊aing masahawụ lai kumoho; arawe arětạ kụ kẹ̌komol᷊ang kadodọ-kadodọ e sarung kakạtambane kakạděngụ e.

¹²Kereu pělaharapẹ̌ e tawe pakapenẹ, ěndumang e kai tụtal᷊iahu; arawe mạengu kal᷊aěnninge mitumbụ bue ute ěndumange mang mal᷊uasẹ̌.

¹³Taumata kụ tawe měngangarěga těntiroʼm MAWU e, mapakasilakạ u watangenge; arawe taumata kụ mararingihẹ̌ su toratu Mawu e sarung makahombang bawal᷊ise.

¹⁴Těntiron taumata pelesa e tabidạu simbul᷊u karal᷊unsemahẹ̌; kereu piạ papatakụ, tangu těntiro ene e makaambang.

¹⁵Taumata mawudi e sarung tẹ̌tiwakeng; arawe taumata kụ tawe kapangimangeng e sarung masusa wiahe.

¹⁶Taumata pelesa e mẹ̌tẹ̌tiněnna kal᷊imona, wuhụ e mẹ̌kakanoạ; arawe taumata wodokẹ̌ e měngkate lụlansịu kawawodoke.

¹⁷Darolohang kụ tawẹ kasahekange kai makạkaděntan silakạ; darolohang kahěngang ute piạbe ual᷊ine mapia.

¹⁸Taumata mạdiri těntiroěng e makasiang, dingangu mahina; arawe taumata kụ měngarẹ̌gawen sasasa e sarungbe adateng.

¹⁹Enẹ e kapiane makahombang apang kụ i lẹ̌ěnning! Taumata wodokẹ̌ e mạdiri mẹ̌bihu wọu karal᷊akisẹ̌ e.

²⁰Taumata kụ mẹ̌dẹ̌dal᷊ahapị u taumata pelesa e, sarung mapelesa; taumata kụ mẹ̌dal᷊ahapị u taumata wodo e sarungbe masilakạ.

²¹Taumata warạdosa e měngkai sẹ̌sahusuangu soe, arawe taumata mapia e měngkai rụdaẹ dal᷊uasẹ̌.

²²Taumata mapia e mạněntangu kakalạ su anạ pulunge; kakakalạ u taumata warạdosa e rẹ̌desokang baugu taumata pẹ̌bawiahe matul᷊idẹ̌.

²³Ěntana tạ l᷊ohone e wotongewe makaghěllị u kaěng lawọ baugu taumata kasiang; arawe tạ kạadile e makạbala ěntana tawe lahal᷊ěkang.

²⁴Tawe měnggeserẹ̌ anạ e, mangal᷊ene ute tawe kuměndagi sie; arawe mạengu kuměndagẹ̌ e, ute harusẹ̌be pakawahani měnggeserẹ̌ si sie.

²⁵Taumata kụ mapia e hanesẹ̌ tawe kakawusang, arawe taumata ral᷊akisẹ̌ e měngkate kẹ̌kawusange.