Read Sangir BAWERAN SALOMO 15 Bible Online

BAWERAN SALOMO 15 - Sangir bible

BAWERAN SALOMO 15

¹Ual᷊ingu sasimbahe mahimumu tangu, bawal᷊uang e mạputị; arawe sasimbahe mahasa e makạsongkang bawal᷊uang.

²Manga waweran tau pelesa e makạdiadi kasingkạ e, makạl᷊ahimpulu, arawe kal᷊awọu waweran taumata wodo e, lohone mang tumbạ u kawawodokẹ̌ e.

³MAWU e makạsilo patikụ apang mạdiadi su apan tampạ; i Sie tụtatingang patikụ apang mapia ringangu apan dal᷊akisẹ̌ e.

⁴Bawera mapapia e makạtamba agisẹ̌, arawe wawera makạtědụ e makạpělẹ̌lome karaki.

⁵Taumata wodo e tawẹ pandungange su sasasang amange, arawe taumata pelesa e mạngarěgamben sasasa e.

⁶Su wal᷊en taumata mapia e lawọ arětạ; arawe kakakalạ u taumata ral᷊akisẹ̌ e mailang kahiang hombang.

⁷Baweran taumata pelesa e mạpenẹ u kasingkạ; arawe tiněnnan taumata wodokẹ̌ e wal᷊inewe kerene.

⁸MAWU e rụdaringihẹ̌ kakal᷊iomanengu taumata mapia, kaiso kawe mẹ̌bẹ̌binsị u sasěmban taumata ral᷊akisẹ̌.

⁹MAWU e mẹ̌bẹ̌binsị u kakakoạ u pẹ̌bawiahu taumata duruhaka e, kaiso i Sie kụkěndagu taumata kụ mẹ̌tẹ̌tawakal᷊i mẹ̌kẹ̌koạ kapulu-Ne.

¹⁰Taumata kụ mẹ̌kẹ̌koạ dal᷊akisẹ̌ e sarung sigěsakeng; arawe taumata kụ mạdiri těguang e sarung mate.

¹¹MAWU e masingkạ u wanuan tau nate e ringangu kakakoạ e, kawe i kawuniwe kereapa tangu, tiněnnan taumata e, i kawuni wọi Sie?

¹²Taumata kụ puluang mẹ̌tahumea e mạdiri těguang e; i sie maghoẹ̌ mẹ̌dorong sasasa wọu taumata pelesa e.

¹³Naung mal᷊uasẹ̌ e makạtualagẹ̌ gati; arawe naung masusa e makạpědi igasẹ̌ e.

¹⁴Taumata pelesa e mẹ̌dẹ̌deạ kasingkạ; arawe taumata wodokẹ̌ e mẹ̌tẹ̌tasibung kawawodoke.

¹⁵Taumata kụ mal᷊uẹ̌ gatine e harusẹ̌be tatapẹ̌ pẹ̌tawakali su ral᷊ungu pẹ̌bawiahe, arawe taumata kụ mahimumu hanesẹ̌ měngkai mal᷊unsemahẹ̌.

¹⁶Mapiawe rarotonge mahal᷊i kaiso mạtakụ u MAWU e, sul᷊ungu mal᷊awọ darotonge kaiso kawe rẹ̌děndinganengu ghaghiantang.

¹⁷Mapiawe mẹ̌dẹ̌dukụ kụ piạ kakěndage, sul᷊ungu kụkaěng piạ kinạ e masasědapẹ̌ e kaiso piạ pẹ̌bawawinsị.

¹⁸Taumata mal᷊ighạ mẹ̌pědu e makạsongkahẹ̌ pẹ̌bawul᷊o, arawe taumata masabarẹ̌ e makạkaděntaʼm pẹ̌darame.

¹⁹Taumata malaseng e sarung měngkate lẹ̌hombangengu sigěsạ; arawe taumata matul᷊idẹ̌ e tawe kal᷊aěbakengu kasasigěsạ.

²⁰Anạ pelesa e makạl᷊uasẹ̌ naung i amange; arawe anạ kụ bodo e tawe měndarekeng i ninange.

²¹Kawawodokẹ̌ ute kai ral᷊uasu taumata makakul᷊i; taumata pelesa e mẹ̌bẹ̌biahẹ̌ matul᷊idẹ̌.

²²Karaki e tawe masasěhụ kereu tawe tatiněnnaěng pakapia; karaki e mawunạ, kereu mal᷊awọ mẹ̌gěllị u sasasa.

²³Bawera kụ i pẹ̌bẹ̌bera we su tempone, makạkaděntan dal᷊uasẹ̌.

²⁴Taumata pelesa e tụtol᷊e ral᷊eng sụsaka mẹ̌tẹ̌timona pẹ̌bawiahẹ̌ e, wal᷊inewe ral᷊eng dụděsung kụ mẹ̌tẹ̌timona papate.

²⁵MAWU e sarung měhaka wal᷊en taumata naunge marangẹ, arawe ěntana tataghuanengu taumata wal᷊u e lẹ̌ěllungangʼE.

²⁶MAWU e mẹ̌bẹ̌binsị u karaki ral᷊akisẹ̌, kaiso manga wawera mapapia e makạl᷊uasẹ̌ naungʼE.

²⁷I sain mẹ̌dẹ̌deạ untung su wal᷊ine ral᷊enge, makagholang dalohoʼm bal᷊ene sẹ̌sane. I saing mẹ̌bẹ̌binsị u roitẹ̌ sasorokẹ̌ e sarung mẹ̌biahẹ̌ mal᷊unsemahẹ̌.

²⁸Taumata mapia e mẹ̌tẹ̌tahatimbangu wawerane; arawe taumata ral᷊akisẹ̌ e mẹ̌bẹ̌berang kal᷊awọu sạbarang tatingkaị.

²⁹MAWU e rụdaringihẹ̌ mạengu taumata mapia e mẹ̌kal᷊iomaneng, kaiso i Sie tawe mẹ̌papandung taumata duruhaka.

³⁰Gati matilang e makạl᷊uasẹ̌ naung, habarẹ̌ mapia e makạhuweka himukudẹ̌.

³¹Taumata kụ mạngarěgawen těgu e, mạsowawe taumata pelesa.

³²Taumata kụ mạdiri sasaěng, ute tawe měngarěgam batangenge hala; taumata kụ dụdaẹbe těgu e makoạbe taumata mawudi.

³³Matakụ u MAWU e ute makoạbe wawěntan těntiro mapia; kal᷊aadatẹ̌ e kẹ̌kal᷊imonaěngu kasasanạ u naung.