Read Sangir BAWERAN SALOMO 16 Bible Online

BAWERAN SALOMO 16 - Sangir bible

BAWERAN SALOMO 16

¹Taumata e wotongewe měhingidẹ̌, kaiso měnawom putusange kawe Ruata.

²Apang kakanoạ u taumata aramanung mapia wue su silom matane hala e, kaiso MAWU e masingkạu tiněnnan dal᷊ungu naunge.

³Umbalạ e su MAWU e kal᷊awọu karakinu, tangu munaranu e sarungbe piạ ual᷊ine.

⁴Patikụ apang koatengu MAWU e piạbe timonane, dingangu timonan taumata ral᷊akisẹ̌ e ute kai kawawinasa.

⁵Kěbị apan taumata maobotẹ̌ e i kẹ̌kawěnsingu MAWU, i Sie tawe mapakal᷊iun sire wọu hukumang.

⁶Taumata kụ satia su Mawu Ruata e sarung makahombang kal᷊aampung; taumata mal᷊aimang e sarung mal᷊iwirẹ̌ bọu kal᷊awọu karal᷊akisẹ̌ e.

⁷Kereu i kau e makal᷊uasẹ̌ naungu MAWU e, kal᷊awọu sědụ u e koatenge hapị.

⁸Něngalembong kapiane piạ ěbạ e mahal᷊i kụ su katul᷊ide, sul᷊ungu ěbạ e natimu kụ su tawẹ kạadile.

⁹Taumata e makakoạ hingide, kai kawe Ruata e manilakehu ral᷊engu pẹ̌bawiahe.

¹⁰Datu e mạnarimạ u kawasa wọu Ruata, kụ i sie tawẹ sal᷊ane su ral᷊ungu putusange.

¹¹MAWU e mapulu tadeạu taumata e matul᷊idẹ̌ su ral᷊ungu pal᷊ahumbal᷊ụ, kerene lai su hal᷊ẹ̌ u sasupa arau timbangeng.

¹²Baugu měngangawasa, mẹ̌koạ dal᷊akisẹ̌ e ene kai sěmbaụ tatingkaị, u paparentane e matoghasẹ̌ ual᷊ingu kạadilẹ̌.

¹³Tatualagẹ̌ kahěngang makạl᷊uasẹ̌ mangangawasa, i sie kụkěndagu taumata kụ mẹ̌bẹ̌bisara matul᷊idẹ̌.

¹⁴Dal᷊angehu ratu e kai tabidạu habaru hukumangu papate; taumata kụ pelesa e sarung mẹ̌tawakal᷊i mapakal᷊ěmạu ene.

¹⁵Kapian naungu ratu e makạkaděntang pẹ̌bawiahẹ̌ masukụ, kere winawa mapạdasehu tahiti su tempon něhangu.

¹⁶Makahombang kapelesa e limembong kapiaěnge wọu makaěbạ bul᷊aeng; makaěbạ kasingkạ e limembong kaarěgaěnge wọu makaěbạ sal᷊aka.

¹⁷Taumata mapia mẹ̌tẹ̌teghangu taumata ral᷊akisẹ̌ e; taumata kụ tụtatingang kakakoạ u pẹ̌bawiahẹ̌ e, měngẹ̌ngěllung batangenge.

¹⁸Kal᷊aobotẹ̌ e makạdiadi kananawo; kararangẹ u naung makạdiadi kal᷊aopehẹ̌.

¹⁹Mapiawe naung masanạ dingangu tawẹ apa arětạ, sul᷊ungu tumol᷊e taumata maobotẹ̌, kụ mase makateěng arětạ nihampasi sire.

²⁰Kakěllạ e wue apa nạung nitěntiro si kamene, tangu i kau e sarung makahombang, apang mapia. Pangimangke su MAWU, kụ i kau e sarung mal᷊unsemahẹ̌.

²¹Taumata pelesa e kẹ̌kakiral᷊a wọu tiněnnane mahoro; kakakoạu wisarane makạbulu, měnganangu wawerane mangkeng makạiaking.

²²Kapelesa ute kai simbul᷊u karal᷊unsemahu pẹ̌bawiahu taumata mawudi; arawe taumata wodo e sẹ̌sigěsakengu kawawodoke hala.

²³Tiněnnan taumata mawudi e makạdiadi kapelesang manga wawerane, ringangu těntirone mangkeng makạiaking.

²⁴Bawera mal᷊ahimumu e mạkoạ kere madu, temange marěngang dingangu makạhuweka wadang.

²⁵ Piạ dal᷊eng kụ pandaěng matul᷊idẹ̌, kutẹu kasueěnge ral᷊eng ene e katewe mẹ̌tẹ̌timona papate.

²⁶Ěnningu mapulu kumaěng e kai makạbal᷊insahẹ̌ taumata mẹ̌tawakal᷊i; ual᷊ingu tiange, tangu i sie mạsihasa měhal᷊ẹ̌.

²⁷Taumata ral᷊akisẹ̌ e mẹ̌dẹ̌deạ dal᷊engu mapakasilakạ u sěndinganenge, kal᷊awọu wawerane ral᷊akisẹ̌ e mẹ̌sul᷊ungu putung nẹ̌tětuhẹ̌.

²⁸Taumata kụ maakal᷊ẹ̌ e, makạkaděntam pẹ̌sasilontahẹ̌, mělahinakange mạpẹ̌tẹ̌tal᷊eing hapị mapia e.

²⁹Taumata mahasa e měngẹ̌ngakal᷊ẹ̌ manga hapị e, dingangu mẹ̌bẹ̌bawa si sire sarang dal᷊ungu silakạ.

³⁰Pakateghang bue su taumata kụ lụhěmming dingangu sụsal᷊ungkerẹ, i sie e kai mělẹ̌hingidu karal᷊akisẹ̌ e su ral᷊ungu naunge.

³¹Taumata matul᷊idẹ̌ e ghẹ̌gěllirangu umbure manandụ; owange kai tabidạu makota kụ enẹ e kaholẹ e.

³²Marěngụ mẹ̌pědu e kai limembong kapiane wọu managhuang kawasa; masingkạ mẹ̌bawa watangenge limembong kapiane wọu makakaiang soa e.

³³Waugu makakasingkạ u pal᷊edu wiahu taumata e, ute harusẹ̌ měnawụ lotẹ̌, katewe manilakehu sasimbange kětạembeng MAWU sẹ̌sane.