Read Sangir BAWERAN SALOMO 17 Bible Online

BAWERAN SALOMO 17 - Sangir bible

BAWERAN SALOMO 17

¹Mapiawe nasi sěnsasaedẹ̌ kụ piạ pẹ̌daramene, sul᷊ungu laidopẹ̌ masasědapẹ̌ kụ piạ pẹ̌sasilontahẹ̌.

²Ěllang kụ pelesa e sarung kawasa su anạ kụ makạmea, dingangu sarung měnarimạ u pusakạ dingangu manga tuarine arau tuhangu rariọ ene.

³Bul᷊aeng dingangu sal᷊aka e wẹ̌banikateng su pěnanẹ̌sal᷊eng, arawe naungu taumata e wẹ̌banikatengu MAWU e.

⁴Taumata ral᷊akisẹ̌ e tụtuhụ kal᷊awọu těgu raral᷊akisẹ̌ e, makakonti e puluang dumaringihẹ̌ bawera lahinakang.

⁵I saim měheghesẹ̌ taumata kasiang dingangu masigěsạ e, mělẹ̌hodatẹ̌ Duata kụ něndiadi si sie. I saing lụluasu sunsaran taumata e, mambeng makahombang hukumang.

⁶Dal᷊uasu taumata maghurange ute kai manga anạ dingangu manga pulunge; dal᷊uasu manga rariọ ute kai ghaghurange.

⁷Taumata kụ lẹ̌adateng e kai tawe hinone mẹ̌berang bawera tạ katěngade; taumata wodokẹ̌ e tawe hinone mẹ̌berang bawera maral᷊ẹ̌gadẹ̌ e.

⁸Piạ u mạngěnna u roitẹ̌ sasorokẹ̌ e kai makạkoạ karal᷊inaụ; mase kahian doitu sasorokẹ̌ e makạkoạ patikụ sạbarang.

⁹Kereu mapulu lahimpuluangu taumata e, ute pěngampungko sal᷊an sire nikoạ i sire e. Měnanongkahẹ̌ sal᷊a e tumbạeweng mạměsụ pẹ̌dal᷊ahapị.

¹⁰Těgu sěmbua e limembong piạ mangal᷊ene waugu taumata mawudi e sul᷊ungu ghagheserẹ̌ mahasụ su sul᷊ene waugu taumata wodo e.

¹¹Taumata ral᷊akisẹ̌ e mang hanesẹ̌ makạsongkahẹ̌ sitori; kaiso papate e rụděnta su anun sie kere rarolohang matingkaị.

¹²Něngalembong kapiane mẹ̌sombangu i něngem beruang kinailangeng u anạ e, sul᷊ungu ringangu taumata wodo kụ měngkate tasibung kawawodoke.

¹³I saim měmal᷊isẹ̌ kapia ringangu karal᷊akisẹ̌, karal᷊akisẹ̌ e mal᷊aing tawe masẹ̌bang bọu wal᷊ene.

¹⁴Manětạ u pẹ̌sasilontahẹ̌ e ute kai mẹ̌sul᷊ungu nanope ral᷊engu akẹ; ual᷊ingu ene sohọe těntal᷊ang pẹ̌sasilontahẹ̌ e ren tawe nạnětạ.

¹⁵MAWU e mẹ̌bẹ̌binsịu taumata mapělẹ̌hinon taumata duruhaka, dingangu mapẹ̌sal᷊an taumata tawẹ sal᷊ane.

¹⁶Tawẹ gunane taumata wodo mạngěnsue roitẹ̌ mẹ̌dẹ̌deạ kapelesa, batụu i sie tawẹ tiněnnane mapia.

¹⁷Sěngkatau hapị hanesẹ̌ satia su hapị e, arawe sěngkatau anạ u sěmbaụ e mal᷊aing měnanggung sigěsạ dingang.

¹⁸Taumata kụ nẹ̌kědo waugu měnanggung utangu sěndinganenge ute kai taumata wodo.

¹⁹Taumata kụ puluang su rosa e, puluang mẹ̌darendehẹ̌. Taumata kụ mohonge ghaghuwạ e mẹ̌dẹ̌deạ kananawo.

²⁰Sěngkatau taha pěngakal᷊ẹ̌ e tawe mal᷊unsemahẹ̌, taumata kụ lilane mělẹ̌lelang e sarung makahombang silakạ.

²¹Makaěbạ anạ kụ longong e, mangal᷊ene makahombang susa naung; makoạ i amangu anạ kụ bodo e tawe makaonggọu ral᷊uasẹ̌.

²²Naung mal᷊uasẹ̌ e makạhuweka wadang; naung maturuhẹ̌ e makạpědi igasẹ̌.

²³Mělahukung tạ katul᷊ide e mạnarimạ u roitẹ̌ sasorokẹ̌ marěma-rěmasẹ̌, dingangu tawe mẹ̌kakoạ su kạadile.

²⁴Timonan taumata matahuěnna e ute waugu makahombang kapelesa, arawe timonan taumata wodo e tawẹ kahumpakenge.

²⁵Anạ kụ bodo e makạsusa si amange, dingangu makạdal᷊umpasiang naung i ninange.

²⁶Tawe hinone mapakarendan taumata tawẹ sal᷊ane, tawe hinone manědạ taumata piạ budine mapia.

²⁷Taumata tiněnnane mal᷊ahoro e, mahal᷊i mẹ̌bera. Taumata kụ pelesa e mang mal᷊enehẹ̌.

²⁸Sěngkatau wodo e lai sarung i tẹ̌tikạ pelesa kereu i sie mẹ̌těngkarěmasu watangenge ringangu měnggěming mohonge.