Read Sangir BAWERAN SALOMO 19 Bible Online

BAWERAN SALOMO 19 - Sangir bible

BAWERAN SALOMO 19

¹Ěndokangbe tau kasiang kụ matul᷊idẹ̌ pẹ̌bawiahe, sul᷊ungu taumata wodo kụ puluang mẹ̌konti.

²Marading kụ tawẹ kasingkạ e, ral᷊akisẹ̌; taumata kụ masahěpang e makạkoạ pẹ̌sasal᷊a.

³Taumata e mẹ̌děndugi watangenge kahiang karal᷊ongonge, mase mapẹ̌sal᷊awen MAWU e su hal᷊ẹ̌ ene.

⁴Taumata kalạ hapị e hanesẹ̌ mạtamba; arawe taumata kasiange katewe i těntangu hapị e.

⁵Taumata mẹ̌konti su pěngadilang e, tawe mal᷊iwirẹ̌ bọu hukumang.

⁶Apan taumata e mẹ̌tẹ̌tawakal᷊i měngẹ̌ngal᷊ạ naungu taumata ghaghuwạ; patikụ taumata e mapulu mẹ̌dal᷊ahapị u taumata mal᷊aěllugẹ̌.

⁷Taumata kasiange tawe papandungangu anạ u sěmbaụ e, něngalembo kate hapị e. Manilaing i sie mẹ̌tawakal᷊i kereapa, i sie tawe makahimaugẹ̌ si sire.

⁸I saim měnẹ̌nahusu kasingkạ e, kụkěndagu watangenge; dingangu i saim mẹ̌tẹ̌tahěndung apang lẹ̌ěndungange, sarung mal᷊uasẹ̌.

⁹Taumata makonti su pěngadilange sarung i hukung dingangu i pakawinasa.

¹⁰Tawe hinone taumata wodo e mẹ̌biahẹ̌ mẹ̌dẹ̌dal᷊embo, dingangu tawe hinone ěllang mẹ̌parenta měngangawasa.

¹¹Taumata pelesa e makạkědang pẹ̌dune. I sie kẹ̌karalọ ual᷊ingu tawe mẹ̌papandung pẹ̌sasal᷊an taumata e si sie.

¹²Dal᷊angehu ratu e mẹ̌sul᷊ungu lahuangu singa; kapian datu e mẹ̌sul᷊ungu namuhẹ̌ mělẹ̌holo sasuang.

¹³Manga rariọ bodo e makạsilakạ si amange. Marehokang kụ měngkai mẹ̌tẹ̌taradạ e tabidạu turo kụ tụtědọ tawẹ pontode.

¹⁴Bal᷊e ringangu arětạ e wotonge i kaěbạ bọu matimadẹ̌, arawe marehokang kụ pelesa e kai kakěndagẹ̌ bọu anum MAWU.

¹⁵Kamamalasẹ̌ e makạtikị taumata kụ mal᷊enabẹ̌, kụ pěngensueěnge i malaseng e kal᷊unusang.

¹⁶Taumata kụ matuhụ su manga hengetangu Mawu e sarung masal᷊amatẹ̌, arawe taumata kụ tawe měngarěgang ene e sarung mate.

¹⁷Mẹ̌tul᷊ungu taumata kasiang e mẹ̌sul᷊ungu mạngonggọu ědang su MAWU e; kụ hědọ e MAWU lai měmal᷊isẹ̌ ene.

¹⁸Atoreko anạ u těntal᷊ang deng i kaatorẹ̌; kamagengu tala ute, i kau mapulu i sie masilakạ.

¹⁹Balạekere taumata kụ mal᷊ighạ mẹ̌pědu e makapěndang sẹ̌sane aị e. Kereu i kau e mẹ̌tul᷊ung i sie, i kau e tumbạeng makasahowong pẹ̌dune.

²⁰Kereu i kau e mapulu mangěndung dingangu rumaringihẹ̌ sasasa, i kau sarung makoạ taumata pelesa.

²¹Taumata e piạ karakine mal᷊awọ, kaiso kětạembeng putusangu MAWU e mariadi.

²²Lulu kụ lẹ̌harapeng bọu pẹ̌sěngkatau e ute satiane. Mapiawe kasiang sul᷊ungu makoạ tahakontiang.

²³Pěngadatẹ̌ko MAWU, kụ pẹ̌bawiahu e mal᷊unsemahẹ̌; i kau e sarung mawul᷊ugẹ̌ dingangu mal᷊iwirẹ̌ bọu silakạ.

²⁴Piạ taumata kụ malase wal᷊inewe gampang; sarang měněnggung kaěng su mohonge tawe makakoạ.

²⁵Kereu taumata maobotẹ̌ e i hukung, taumata kụ tawẹ ěbạ e makahombang těntiro. Kereu taumata mawudi e těguang, i sie sarung mahuntinambang kapelesane.

²⁶Anạ kụ mẹ̌tingkaị dingangu měnokol᷊ẹ̌ gaghurange, ute kai anạ makạmea ringangu makạsamedẹ̌.

²⁷Anạku, kereu i kau mạdiri saụ měngěndung kapia e, i kau e sarung miwul᷊eng apan seng niěndungangu.

²⁸Měngonggọu sasahidi tạ katěngade, ute tawe měngarěgang toratẹ̌; měnilakạ taumata e, mapaelẹ̌ temange su taumata ral᷊akisẹ̌ e.

²⁹Taumata wodo kụ marangẹ naunge nal᷊ahẹ u sarung pahangeng.