Read Sangir BAWERAN SALOMO 2 Bible Online

BAWERAN SALOMO 2 - Sangir bible

BAWERAN SALOMO 2

¹I kau anạ pěnarimạ bue kal᷊awọu těntiroku, ringangu pẹ̌tahěndung bue sidutu sasasaku e si kau.

²Pakatitikeko apang kapelesa e ringangu pẹ̌tawakal᷊iko sarang makahěngang.

³O anạku, pẹ̌tawakal᷊iko mẹ̌deạ u piạ tiněnna mal᷊ahoro ringangu pẹ̌gausẹ̌ko katatahuěnna.

⁴Deakeko ene kere mẹ̌deạ bul᷊aeng, dingangu sahusueko ene kere měnahusu arětạ kạl᷊aambung.

⁵Ual᷊ingu kawe kerene tangu i kau e sarung masingkạ u apa mangal᷊ene matakụ u MAWU ringangu i kau e sarung makahombang kasingkạ u mạanum Mawu Ruata e.

⁶Seng MAWU e něngonggọu kapelesa; kụ kai wọi Sie e taumata makahombang kapelesa ringangu katatahuěnna.

⁷Baugu taumata matul᷊idẹ̌ e ringangu tawẹ turạ e, nionggotangʼE tul᷊umang dingangu kal᷊aěllung.

⁸MAWU e mẹ̌děndiagạ taumata apang kakanoạ e adilẹ̌ e, ringangu měnẹ̌nirung si sire apang kụkěndagi Sie.

⁹Kereu i kau anạku tụtuhụbe si siạ, i kau sarung masingkạ u kaadilẹ̌, katulidẹ̌ dingangu mapia. I kau sarung masingkạ l᷊ai kereapa kakakoạ u i kau harusẹ̌ měbiahẹ̌.

¹⁰I kau e sarung mapelesa ringangu kasingkạ u e sarung makakal᷊uasẹ̌ naungu.

¹¹Katatahuěnnanu ringangu kapandenu e sarung makaěllung si kau,

¹²ringangu makasahaghe si kau tumol᷊e kakakoạ u pẹ̌bawiahẹ̌ dal᷊akisẹ̌ e, dingangu makaghea watangengu e wọu taumata apang masasampuhẹ̌.

¹³I sire mạdiri tumol᷊e kakakoạ u pẹ̌bawiahẹ̌ mapia e; i sire mạngal᷊ạ dal᷊eng marěndung dingangu napenẹ u rosa e.

¹⁴I sire makạhombang karal᷊uasẹ̌ bọu kakanoạ i sire ral᷊akisẹ̌ e.

¹⁵I sire e maakal᷊ẹ̌ dingangu kakakoạ u pẹ̌bawiahi sire tạ katul᷊ide.

¹⁶I kau anạku sarung botonge manighe laologu manga wawine mananakalẹ̌ kụ mẹ̌deạu měmodaị si kau ringangu waweran sire maral᷊enggihẹ̌ e.

¹⁷Bawine ene e tawẹ satiane su kawing i sire ringangu seng niwul᷊eng kẹ̌done su Mawu Ruata.

¹⁸Kereu i kau e sol᷊ong bal᷊ene e mangal᷊ene i kau e mẹ̌tẹ̌timona papate. Makoạ sol᷊ong pai ene měngkate mẹ̌sul᷊ungu makoạ sol᷊ong dunian tau nate.

¹⁹Taumata apan nakoạ sol᷊ong anun sie tawẹ apa kụ deng nakapẹ̌bal᷊ị sol᷊ong dal᷊eng kụ mẹ̌tẹ̌timona pẹ̌bawiahẹ̌.

²⁰Ual᷊ingu ene i kau anạku, tol᷊ei wue sansahu taumata mapia, ringangu pẹ̌biahẹ̌be tuhụ kapulun Duata.

²¹Batụu taumata kụ mẹ̌bẹ̌biahẹ̌ tụtuhụ kapulun Duata e, ute kai taumata kụ naunge matul᷊idẹ̌, u seng i sire e sarung matanạ su wanua kụ nikědon MAWU.

²²Arawe taumata ral᷊akisẹ̌ dingangu warạdosa e sarung i rěmmẹ sol᷊ong likude kahian Duata e wọu wanua ene, mẹ̌sul᷊ungu rěmpugẹ̌ niěbụ bọu ěntana.