Read Sangir BAWERAN SALOMO 20 Bible Online

BAWERAN SALOMO 20 - Sangir bible

BAWERAN SALOMO 20

¹Inumang makakětị e makạdal᷊akisẹ̌ adatu taumata ringangu makạgahẹ. Kai wodo taumata e kụ měnginung sarang miwukang.

²Dal᷊angehu ratu e tabidạu lahuangu singa; taumata kụ manongkahẹ̌ pědune e kai mạnilakạ batangenge hala.

³Kětạeng taumata wodo kụ mapulu mẹ̌darendehẹ̌; arawe lulu mapia e ute kawe mělingkạ u pẹ̌dararendehẹ̌.

⁴Mělahěnsinuang malasenge tawe mělahal᷊ẹ̌ dahamine su tempone; pěngěnsueěnge su tempong maměnsạ e, ěntanane tawẹ gẹ̌sine apa.

⁵Dal᷊ungu naungu taumata e mẹ̌sul᷊ungu akẹ u pahighi maral᷊ung; kaiso wotongewe i katimbạ u taumata piạ tahuěnnane.

⁶Lawọ taumata mạul᷊ị u watangenge kai hapị, kaiso apang kahěnga-hěngang satia e, mahal᷊i kaěbakeng.

⁷Barạuntu manga rariọ e kereu piạ i amange kụ mapia ringangu mẹ̌biahẹ̌ matul᷊idẹ̌.

⁸Kereu ratu e maiang su kaderang pěngadilange, i sie makasilo kěbị taumata ral᷊akisẹ̌ e.

⁹Piạ ngae taumata kụ botonge mẹ̌bera u, ”Naungku e wurěsi, kụ iạ e seng nal᷊iwirẹ̌ bọu rosa?”

¹⁰Timbangeng dingangu sasukạ kụ tawẹ katul᷊ide MAWU e tawẹ karal᷊uase.

¹¹Bọu kakanoạ u rariọ e kasingkateng bue měnsang lulune mapia ringangu matul᷊idẹ̌.

¹²Tul᷊i e waugu rumaringihẹ̌ dingangu mata e waugu i pěmanda, kụ i rẹ̌dua e kai MAWU e něndiadi.

¹³Taumata kụ měngkai mẹ̌tẹ̌tikị e sarung manawo kasiang. Arawe taumata kụ marading měhal᷊ẹ̌ e mal᷊awọ kaěnge.

¹⁴Měmamělli e měngkai hanesẹ̌ kụkěndungu lěgadu arěga. Kutẹu wọuten namělli e i sie kawe lụlesạ u arěga kinaěbakenge.

¹⁵Bawera lohong kasingkạ e, limembong kaarěgane wọu wul᷊aeng dingangu berlian.

¹⁶I sai mapulu měnal᷊udẹ̌ utangu taumata wal᷊ine e, botonge al᷊akeng darotonge makoạ kere tatal᷊ung kědone.

¹⁷Darotong kụ lětạ u pěngangakal᷊ẹ̌, humotong enẹ e mahuwusẹ̌ temange, arawe wọu ene ute kere něngellụ kohasẹ̌ samatang.

¹⁸Karaki e mạdiadi ual᷊ingu pẹ̌tatahatatimbang; ual᷊ingu ene, kumbahang mẹ̌koạ munara kụ tawẹ karakine i paku su naung.

¹⁹Taumata puluang mẹ̌běken taumata wal᷊ine e tawe makaresọ u rahasia; kụ kumbahang mẹ̌dal᷊aụ u taumata taha wisaraěng.

²⁰Taumata kụ měngane ghaghurange, pẹ̌bawiahe sarung mailang, mẹ̌sul᷊ungu sol᷊o nate su tempong hěbi marěndung.

²¹Arětạ kụ humotong-motong masahawụ kaẹ̌bakeng e kutẹu pěngěnsueěnge kai nạung bal᷊inewe al᷊amatẹ̌.

²²Kumbahangbe měmal᷊isẹ̌ dal᷊akisẹ̌ e ringangu ral᷊akisẹ̌; pangimangke su MAWU, u kai seng i Sie e mẹ̌tul᷊ung.

²³MAWU e tawẹ karal᷊uase su timbangeng kụ batune tạ katul᷊ide.

²⁴MAWU e seng něnilakehu ral᷊engu pẹ̌bawiahu taumata su dunia ini; ual᷊ingu ene taumata e tawe makaěnna ral᷊engu pẹ̌bawiahe sẹ̌sane.

²⁵Pẹ̌tiněnnawe pakapia těntal᷊ang den tawe nẹ̌kẹ̌kědong sasěmba waugu MAWU. Kiwuạ u i kau e kawe mẹ̌sasěsilẹ̌ samuri.

²⁶Datu pelesa e masingkạ u i sai taumata kụ dal᷊akisẹ̌ e; i sie sarung měhukung i sire e tawẹ ampunge.

²⁷Dal᷊ungu nangu taumata e mạngawẹ tualagẹ̌ bọu anum MAWU, kụ měnẹ̌nualagẹ̌ kasěllahu ěndumang.

²⁸Kereu ratu e mẹ̌parenta ringangu kakěndagẹ̌, katul᷊idẹ̌, dingangu kạadilẹ̌ e, tangu i sie sarungbe tatapẹ̌ kawasa.

²⁹Taumata mangangudạ e sẹ̌sahimolokang ual᷊ingu karal᷊ingkide, dingangu maghaghurange lẹ̌adateng ual᷊ingu owange.

³⁰Pẹ̌sěngkakuhuange kạdingạ sigěsạ kẹ̌kahombangenge kai mẹ̌děndědasẹ̌ karal᷊akisẹ̌, dingangu mạmurěsi naungu taumata.