Read Sangir BAWERAN SALOMO 21 Bible Online

BAWERAN SALOMO 21 - Sangir bible

BAWERAN SALOMO 21

¹Mẹ̌sul᷊ungu MAWU e mělẹ̌hundugẹ̌ akẹ u sal᷊ụ tadeạu melehẹ̌ kere su kapulu-Ne, kerene lai i Sie měngahạ tiněnnan datu.

²Apạeweng kakanoạ u taumata e aramanung mapia wue pandaěngu matane hala e, kaiso kawe MAWU e tụtatingang dal᷊ungu naunge.

³Kakanoạ kụ adilẹ̌ dingangu matul᷊idẹ̌ e limembong makạl᷊uasẹ̌ naungu MAWU e sul᷊ungu kal᷊awọu manga sasěmba e.

⁴Taumata ral᷊akisẹ̌ e nẹ̌dosa, ual᷊ingu pinẹ̌kawasaěngu karangẹ u naung dingangu kal᷊aobotẹ̌.

⁵Karakin taumata kụ marading e makạbawa al᷊amatẹ̌ mẹ̌dẹ̌dal᷊embo; arawe kakanoạ u wěsang e kai piạ aị e kẹ̌kawusang.

⁶Kakakalạ kaẹ̌bakeng ual᷊ingu tawẹ katul᷊ide mal᷊ighạ mapuạ, mal᷊ighạ mapuạ dingangu makawawa taumata sarang lohangu kubul᷊ẹ̌.

⁷Taumata ral᷊akisẹ̌ e mạdiri tumuhụ tita, i sie nasunsara kahian tingkaị e sẹ̌sane.

⁸Taumata piạ sal᷊ane, dal᷊enge měkẹ̌kakal᷊ikụ; taumata mapia e matul᷊idẹ̌ pẹ̌bawiahe.

⁹Matanạ su wukung loteng limembong kapiane sul᷊ungu matanạ su wal᷊e sěmbaụ dingangu marehokang puluang mẹ̌bul᷊o.

¹⁰Taumata ral᷊akisẹ̌ e měngkate puluang mẹ̌koạ dal᷊akisẹ̌; waẹbe miěbạ si sai-sai watụ u i sie wẹ̌gaweng kakěndagẹ̌ e.

¹¹Hukumang baugu apang mělẹ̌hinakang e mạkoạ těntiro su taumata kụ tawẹ ěbạ u pẹ̌bawiahe. Taumata mapia e těguang, kai i sie sahuneng mahuntinambang kapelesane.

¹²Duata Limembong Kạadile e masingkạ u apa-apa mariadi su ral᷊ungu wal᷊en taumata duruhaka. I Sie sarung mapakawul᷊usi sire sarang i sire mawinasa.

¹³I sain tawe rumaringihẹ̌ kakahiorọ u taumata kasiange tawe lai raringihang kereu i sie sẹ̌sane mẹ̌gausẹ̌ tul᷊umang.

¹⁴Mẹ̌deạ u mapakal᷊ěmạu pědu ringangu wawal᷊uang e pěngonggọ e poroseěng pakarěmmasẹ̌.

¹⁵Kereu kạadilẹ̌ e i ral᷊eng, tangu taumata mapia e makapěndang mal᷊uasẹ̌, arawe taumata ral᷊akisẹ̌ e ute kai piạ pěndangu sẹ̌sahusuang.

¹⁶Taumata kụ tawe tumatol᷊e kakakoạ u pẹ̌bawiahẹ̌ mapapia e nal᷊ahẹ u i sie makahumpạ u wanuan tau nate.

¹⁷Taumata kụ měngkai puluang su pilisirẹ̌ e sěntiniạ mang su kakawusang; arawe taumata kụ měngkate mělẹ̌lambaihang e tawe makalạ.

¹⁸Kereu kawanua e i hukungu MAWU, bal᷊inewe taumata mapia e makahombang sigěsạ, kaiso kawe taumata ral᷊akisẹ̌ e.

¹⁹Mạěndokangbe mạtanạ su wanua l᷊inggi, sul᷊ungu mạtanạ dingangu marehokang kụ měngkai ghụgalumị dingangu wawal᷊uang.

²⁰Taumata pelesa e měngkai tatapẹ̌ tawẹ konsange apa ringangu kalạ; arawe taumata wodo e mẹ̌bẹ̌bawombaru arětạ e.

²¹I saim mẹ̌tẹ̌tawakal᷊i mẹ̌deạ u kạadilẹ̌ dingangu pẹ̌kakakěndagẹ̌ e kẹ̌koateng e, ute sarung makahombang karal᷊unsemahẹ̌ dingangu kal᷊aadatẹ̌ dingangu umburẹ̌ manandụ.

²²Taumata kụ pelesa e makaumal᷊ẹ̌ měmul᷊aho soa kụ dẹ̌diagateng u sordado wawahani; i sie makạgoghahẹ̌ kal᷊awọu těndạ pạngumbalaěng i sire e.

²³Mẹ̌deạ u mělisadu sigěsạ e tangu pakatateghang bue su hal᷊ẹ̌u pal᷊ahumbisara.

²⁴Taumata maobotẹ̌ dingangu naunge marangẹ e puluang měhinakang dingangu mahal᷊i kasingkạ e.

²⁵Taumata malaseng e tawe mapulu měhal᷊ẹ̌ e; mạmate watangenge ringangu ěnninge.

²⁶Kanandung ěllo e i sie kětạeng mẹ̌tẹ̌tiněnnang apa ilẹ̌ěnninge. Su sěmbẹ̌kane taumata wiahe matul᷊idẹ̌ e, makạonggọ matatimu.

²⁷MAWU e tawẹ karal᷊uase su sasěmban taumata duruhaka, něngalembọe wue kereu i sěmba ringangu timona makạsamedẹ̌.

²⁸Sasahidin taumata kontiange tawe kapangimangeng; arawe wisaran taumata masingkạ u kakakoạ u pěrkara e sarung i tarimạ.

²⁹Taumata matul᷊idẹ̌ e mạngiakingu watangenge; arawe taumata ral᷊akisẹ̌ e ghatine masuwenehẹ̌.

³⁰Tawẹ apa kapande, kasingkạ, arau kapelesa kụ makararagẹ̌ su těngom MAWU.

³¹Manilaim pẹ̌sasekẹ e pakasukụ u kawal᷊on sekẹ e, měnilakehu makawatạ e kai MAWU.