Read Sangir BAWERAN SALOMO 22 Bible Online

BAWERAN SALOMO 22 - Sangir bible

BAWERAN SALOMO 22

¹Areng mapia e limembong kaarẹ̌gane wọu arětạ mal᷊awọ e; i kěndagu taumata e limembong kapiane wọu onggotangu sal᷊aka ringangu wul᷊aeng.

²Taumata kalạ dingangu kasiang piạbe hal᷊ẹ̌ sěmbaụ sul᷊unge: Seng MAWU e něndiadi si sire kěbị e.

³Taumata pelesa e mẹ̌tẹ̌teghangu kamageng makasilo silakạ; arawe taumata wodo e měngkate rụdal᷊eng turusẹ̌ mase kahombangengken silakạ masaria.

⁴Taumata mararingihẹ̌ su MAWU e ringangu mẹ̌tẹ̌těngkasanạu watangenge, sarung mal᷊unsemahẹ̌, biahe tạ konsange, ringangu lẹ̌adateng.

⁵Sedẹ dingangu pahěba e kẹ̌kaěbakeng su ral᷊engu taumata maakal᷊ẹ̌; pẹ̌teghangu kěbị ene e kereu i kau e mapulu masal᷊amatẹ̌.

⁶Paněntiro su anạ sěngkatau e kakakoạ u pẹ̌bawiahẹ̌ tuhụ dal᷊enge, tangu sarang tempong kaghaghurange i sie sarung kạtatanạ biahẹ̌ kerene.

⁷Tau kasiange pẹ̌kẹ̌kawasaěngu taumata kalạ; taumata mạngědang e pẹ̌kẹ̌kawasaěngu taumata mẹ̌gẹ̌gěllị su ědang.

⁸Taumata kụ mẹ̌sẹ̌suangu akal᷊ẹ̌ e sarung maměnsạ u silakạ; pěngěnsueěnge kawasane waugu mẹ̌batụ kapulune e sarung mapuạ.

⁹Taumata naunge mapia e al᷊amateng u MAWU, ual᷊ingu i sie e mẹ̌tẹ̌tintẹ u asěki su taumata kụ kẹ̌kawusange.

¹⁰Tokol᷊ẹ̌ko taumata kụ puluang měhinakang, kụ mangědọ e pẹ̌sasilontahẹ̌ e, pẹ̌sasitori ringangu pẹ̌tatatongkeang.

¹¹Taumata kụ makěhagẹ̌ su katul᷊idẹ̌ e ringangu maudupẹ̌ bisarane, sarung makoạ hapị u ratu.

¹²Ual᷊ingu pěnanongkahu kontin tau tahakontiange, MAWU e mẹ̌děndiagạ tadeạu kasingkạ tutune e kạtatanạbe kạpapadul᷊i.

¹³I malaseng e měngkai mạtanạ su wal᷊e e; mẹ̌bẹ̌bera u, ”Piạ singa su l᷊ikude kụ iạ měntěhang těmboěng su tal᷊oaran dal᷊eng.”

¹⁴Laologu wawine taha pẹ̌sundal᷊ẹ̌ e mạngawẹ pahěba; taumata i kẹ̌kawěnsingu MAWU e mạhěbọ su ral᷊unge.

¹⁵Seng su tampạ e manga rariọ mẹ̌kẹ̌koạ kal᷊awọu hal᷊ẹ̌ u kawawodokẹ̌, arawe ue tangu makạtěntiro si sire ipěmal᷊ui lulu.

¹⁶I saim mapulu makalạ, kụ kai ual᷊ingu mạnigěsạ tau kasiang dingangu mạngonggọu poroseěng su taumata kalạ su samurine ute masilakạ.

¹⁷Daringihẹ̌ko, iạ e sarung maněntiron sasal᷊ěntihọ u taumata pelesae! Nẹ̌naunge wue sasal᷊ěntihọku.

¹⁸I kau e sarung mal᷊uasẹ̌ kereu sasal᷊ěntihọku ene resokangu su ral᷊ungu naungu. Batụu ual᷊ingu ene e i kau e seng sadia kereu i kau e mapulu mẹ̌pakẹ u ene.

¹⁹Iạ e naněntirong ene si kamene ini e ual᷊ingu iạ e lụěnningu tadeạu i kau e mangimang bue su MAWU Ruata.

²⁰Seng katěllum pul᷊one sasal᷊ěntihọ takụ niwohẹ baugi kau e — mangạ e sasal᷊ěntihọ kụ piạ gẹ̌sine kasingkạ dingangu sasasa maral᷊ěnggihẹ̌;

²¹dingangu sarungbe i paněntiro si kau e hal᷊ẹ̌ kụ mamben těnga-těngadẹ̌ kahěngang. Kụ kamagengu i kau e pakiwal᷊oěnge, i kau e makaonggọbe sasimbahe matumang.

²²Kumbahangbe makarugi tau kasiang, tumbạeng ual᷊ingu i sie kawe lome, kụ su sidangu pěngadilang e kumbahangbe mẹ̌taghunalangu hakẹ̌ u taumata kụ tawe makakoạ manga apa-apa.

²³Batụu MAWU e sarung tumatawang pěrkaran sire ringangu měnawụ singongon taumata kụ měnědạ si sire.

²⁴Kumbahangbe mẹ̌dal᷊aụ u taumata wawal᷊uangeng dingangu masahawụ maawị dahane.

²⁵I kau e hědo sarung mẹ̌těnno si sie kụ semben tawe lai makailangu lulune kerene.

²⁶Kumbahangbe mẹ̌kědo waugu měnanggung utangu taumata wal᷊ine.

²⁷Kụ mạgengu i kau e tawe makaumal᷊ẹ̌ měmaehẹ̌ e, daral᷊okaěngu e mal᷊ain sarung i weslakẹ̌.

²⁸Kumbahang-bahang měngal᷊ingu pẹ̌saraěng ěntana kụ seng niturantungu manga i upungu e.

²⁹I kau e wọu nakasilo taumata kụ pelesa mẹ̌koạ hal᷊ẹ̌ e? Tau ene sarung i pěhal᷊ẹ̌ su istanang mararatu e, wal᷊inewe su wal᷊en taumata wiasa.