Read Sangir BAWERAN SALOMO 23 Bible Online

BAWERAN SALOMO 23 - Sangir bible

BAWERAN SALOMO 23

¹Kereu i kau e maiang sěngkakaěng dingangu taumata mapapangkatẹ̌ e, tahěndunge wue kai i sai tangu i sie.[7]

²Kereu i kau e piạ giangu kumaěng mal᷊awọ e kẹ̌kědang bue kapulunu kerene e.

³Abe karal᷊ehẹ su kaěng matatemang sẹ̌sadiange, kibasị u i sie kai měnangkạ si kau.

⁴Maningke tawe mẹ̌bangkuadẹ̌ mẹ̌deạ u makalạ. Punase karakinu ene.

⁵U kětạeng su ral᷊ungu sěngkakondạ arětạu e wotonge mapuạ, al᷊ingkai piạ papanide i sie kụ tuměllạ sol᷊ong binangaeng kere kasiahe.

⁶Kumbahang kumaěng sěngkakaěng dingangu taumata masikěkudẹ̌. Piawe lai luměngkudu kaěng masasědapẹ̌ e.

⁷U i sie sarung mẹ̌bera u, ”Bọete kumaěng; kụ pěnamba wue saụ,” sumbal᷊iau timonane wal᷊inewe kerene. Mohonge marěngang bue, kaiso naunge kawe wal᷊ine.

⁸Kụ apan seng niěllụ u e i pěmutanu kapia kụ patikụ baweranu mararěngang e kawe tawẹ mangal᷊ene si sie.

⁹Kumbahang měnasa taumata wodo e, i sie tawe měngarẹ̌gang sasasanu.

¹⁰Kumbahang-bahang měngkai kạal᷊inge pẹ̌saraěngu ěntana tataghuaneng arau měngkai kạal᷊inge ěntanang manga rariọ kasisi ěndusẹ̌ e.

¹¹Batụu MAWU e kai tumatatawang matoghasẹ̌, u kai i Sie sarung tumatawang si sire rumokạ si kau.

¹²Pěnẹ̌naungbe těntirom mananěntironu e ringangu pěngěndungbe sěngapang kakěpal᷊e.

¹³Kumbahangbe ghumoẹ̌ měnentiro manga anạ u. Kamagengu i kau e měměbahu ue si sie, i sie tawe mate,

¹⁴kaiso kawe masal᷊amatẹ̌.

¹⁵Anạku, iạ e mal᷊ua-l᷊uasẹ̌ kereu i kau e pelesa.

¹⁶Iạ e mal᷊uasẹ̌ kereu i kau e makaringihẹ̌ u i kau e mẹ̌berang manga wawera kere hinone.

¹⁷Kumbahang sumingking su taumata waradosa. Pakararingihẹ̌ bue sěntiniạ su Ruata,

¹⁸tadeạu temponu ramahie tawẹ konsange ringangu lẹ̌harapengu tawe mailang.

¹⁹Daringihẹ̌ko anạku! Pakapelesa wue. Pakal᷊aingatẹ̌ bue kahěngang su kakakoạu pẹ̌bawiahu e.

²⁰Abe pẹ̌těngkal᷊aụ u miwawukang dingangu taumata kakombangeng,

²¹batụu i sire e sarung makoạ kasiang. Kereu i kau e měngkai mẹ̌tẹ̌tikị e, tangu tạ kararaěngụ e lai i kau e sarung měluheng pakeang gaghonaị.

²²Daringihe wue i amangu e; batụu mạeng tawẹ i sie, tawẹ apa i kau e. Kereu i ninangu e seng naghurang, todẹko u i kau e mẹ̌ngarěgangben sie.

²³Těntiro kụ kahěngang, kapelesa, těntiro, ringangu katatahuěnna, — kěbị ene hinone wělliang, kaiso kawe enẹ e kal᷊ěgade wal᷊ukang.

²⁴Sěngkatau i amang e sarung mal᷊uasẹ̌ kereu anạ e piạ lulune kụ mapia e; i sie sarung luliagẹ̌ kamagengu anạ e pelesa.

²⁵Mal᷊owọko i amangu ringangu i ninangu e lụluasẹ̌beng kau e; karimạko mal᷊unsemahẹ̌ bawine kụ němantelli kau e.

²⁶Pakatahěndunge pakapia, ringangu pẹ̌těnnoko kakakoạu pẹ̌bawiahẹ̌ku e anạku!

²⁷Bawine manakalẹ̌ kụ mẹ̌sẹ̌sundal᷊ẹ̌ e kai sedẹ makasilakạ.

²⁸I sire kai mělẹ̌hěgạ kere tahapěhampasẹ̌ dingangu makạdiading manga esẹ lawọ e mawuang.

²⁹Masingkạ bue i kau e tangu? kai a mariadi su taumata tahainung matědụ? dingangu sěntiniạ měngkate makạteeng inumang makakětị. Taumata ene masunsara ringangu masigěsạ. I sie hanesẹ̌ mẹ̌dẹ̌darendehẹ̌ dingangu nẹ̌kẹ̌kiaratagẹ̌. Matane mahamụ dingangu wadange napenẹ u l᷊esẹ e, sumbal᷊iau kěbị ene e wotonge i kateghang.

³¹Abe pakawala anggorẹ̌ e mamodaị si kau, maningbe awạ e mạminsana ringangu kakěllaěnge kụkerong su ral᷊ungu galasẹ̌ dingangu lụelehẹ̌ sụsuẹ̌ matemang su ral᷊ungu tinggol᷊ang.

³²Sěngkariọěllone mal᷊ukadẹ̌ e i kau makapěndang kere nikikin těmpu mawisa.

³³Matanu mẹ̌manumpite, tiněnnanu e nẹ̌sambungkal᷊ehẹ̌ mase mohongu e tẹ̌tahaweraěng.

³⁴I kau e makạpěndang kere su pusungu palalahengu kapal᷊ẹ̌ su l᷊audẹ̌ mal᷊oang; těmbọu e mẹ̌bẹ̌buhị, i kau e mạpahị tamai ramahi.

³⁵Bọu e i kau sarung mẹ̌bera u, ”Luhude iạ e wẹ̌baheng dingangu peruangu taumata kaiso iạ e tawe makatahěndung apan seng nariadi e. Aduu! Iạ e lotahẹ̌ marasai! Iạ e hinong mangimang kapia.”