Read Sangir BAWERAN SALOMO 24 Bible Online

BAWERAN SALOMO 24 - Sangir bible

BAWERAN SALOMO 24

¹Kumbahang sumingking su taumata ral᷊akisẹ̌ e, dingangu abe ěnningu mẹ̌dal᷊ahapị dingang i sire.

²I sire tumbạeng mẹ̌tẹ̌tiněnnang mẹ̌tingkaị dingangu kětạeng mẹ̌bẹ̌bisarang apam makạsilakạ.

³Rumah tangga e pětịbe su kapelesa ringangu katatahuěnna.

⁴Kụ kereu piạ kasingkạ, ute apang kamarẹ̌ e sarung kal᷊ohoěngu apal᷊iwụ maral᷊ěgadẹ̌ dingangu maral᷊ěnggihẹ̌ e masukụ.

⁵Taumata pelesa e limembombe piạ pěhěngkinge wọu taumata matoghasẹ̌; kasingkạ e limembong kapiane wọu katoghasẹ̌.

⁶U kal᷊amonang mẹ̌sekẹ e hinom piạ karaki masěgadẹ̌ kal᷊imona, kụ mangkeng kakạl᷊awọ e měnanasa e, mangkeng kakạsěllahe antibu makawatạ.

⁷Taumata wodo e tawe makahombang kapelesa. I sie tawe makawerang apa-apa kereu taumata e kapạhumbisaraneng hal᷊ẹ̌ mapapia e.

⁸Taumata kụ hanesẹ̌ mělẹ̌hingidẹ̌ karal᷊akisẹ̌ e sarung i sěbạ si měnggaghohaeng.

⁹Balạewe apang hingidu taumata wodo e ute kai rosa. Taumata kụ měngkate sěntiniạ mělẹ̌hinakang taumata wal᷊ine e, tawe makahimpulu si sai-sai.

¹⁰Kereu i kau e kuměndung su ral᷊ungu hombang masaria e, ute i kau e taumata lome.

¹¹Kumbahangbe ria-ria měliwiru taumata kụ seng nikanawoěngu hukumang papate; ambange wue taumata kụ seng lẹ̌ahakeng sol᷊ong tampạu pěnggaghantongang.

¹²Botonge wue i kau e mẹ̌bera u, ”Ene e wal᷊inewe urusangku.” Kaiso Ruata e měnẹ̌nahimata si kau. I Sie masingkạ dingangu mẹ̌manikạ tiněnnanu. I Sie měmal᷊isẹ̌ taumata tuhụewe kakanoạ e.

¹³Anạku, kaěngbe madu, u kai mapia. Kerẹewe madu e kawe wọu sal᷊ehu katiupang, marěngang mạengu kanengang,

¹⁴kerene lai kapelesa e mapia waugu himukudu. Kereu i kau e kawe pelesa, ute matal᷊uahẹ̌ bue temponu ramahi e.

¹⁵Kumbahangbe kere taumata ral᷊akisẹ̌ kụ mẹ̌sěngkanaung měhampasẹ̌ taumata matul᷊idẹ̌ e ringangu měngaho wal᷊ene.

¹⁶Batụu manilain taumata matul᷊idẹ̌ e masaun sul᷊ene manawo e kaiso i sie sěntiniạ mang makapẹ̌pětị kapia. Arawe su sěmběkane, taumata ral᷊akisẹ̌ e sarung mal᷊ahěmpung kahiang hombang masaria.

¹⁷Kumbahangbe lumuasẹ̌ kereu sědụ u e masilakạ, dingangu abe liagẹ̌ kereu i sie e manawo.

¹⁸U nal᷊ahẹu MAWU e sarung měmanda kakanoạ u ene ringangu makawera u ral᷊akisẹ̌, kụ bọu ene semben tawe měhukungu sědụ u ene.

¹⁹Abe kěngkasahe arau abe singking su taumata ral᷊akisẹ̌.

²⁰Taumata ral᷊akisẹ̌ e tawẹ apa tempone ramahi e ringangu tawẹ apa harapange.

²¹Anạku, katakụbem MAWU e, ringangu pěngadatẹ̌ be ratu e. Abe měngkai kạtol᷊ene ringangu taumata kụ dumokạ si sire.

²²Taumata kerene wotonge mahenẹ sěngkakondạ kahiang hombang iapasěpụ u Ruata arau ratu kụ bal᷊inewe hal᷊ẹ̌ kadodọ.

²³Taumata pelesa e nạung bọu mẹ̌bẹ̌bera kere ini: Mělahukung e tawe wotonge mawěhạ sěmběka.

²⁴Kereu sěngkatau nẹ̌sal᷊a e i pakakoạ e tawẹ sal᷊ane, tangu mělahukung ene e sarung aneěng dingangu sasěbakengu taumata.

²⁵Arawe mělahukung kụ měhukungbe taumata piạ sal᷊ane, tangu sarung mal᷊unsemahẹ̌ dingangu adateng.

²⁶Sasimbahẹ̌ mẹ̌tatal᷊ahino e ute kai tatialang pẹ̌dal᷊ahapị tutune.

²⁷Abe pẹ̌kawing kal᷊amonang kau e ren tawe něnạdiang sasuangu ringangu piạ hal᷊ẹ̌ u e.

²⁸Kumbahangbe makoạ sahidi waugu taumata wal᷊ine kụ tawẹ apa kapěngumpaedang pondol᷊e; kumbahang mẹ̌sahiding konti mạanun sie.

²⁹Kumbahangbe mẹ̌bera u, ”Iạ e sarung měmal᷊isẹ̌ si sie apan seng nikoạ e si siạ e!”

³⁰Iạ e wọuwe limiu rahami ringangu waelu anggoru sěngkatau malaseng o kawe lai wodo.

³¹Takụ kinasilo sene e kětạembeng sasuang piạ hanggange ringangu manga ěhe. Pagarẹ̌ meselẹ̌ e mal᷊aing seng naopehẹ̌.

³²Sarangke takụ kinasilo ringangu takụ sẹ̌sipirang hal᷊ẹ̌ ene e, kinaěbakengku těntiro ini:

³³ Dingangken lotahẹ̌ ore lai tikị kadodọ tempo e, kụ naiang mẹ̌tẹ̌tiningkondọ apidu něngirul᷊e kadodọ tempo,

³⁴kakakawusẹ̌ dingangu kakakasiange riměntạ e něngalo kere mělahampasẹ̌ piạ aghide.