Read Sangir BAWERAN SALOMO 25 Bible Online

BAWERAN SALOMO 25 - Sangir bible

BAWERAN SALOMO 25

¹Bọu ini e piạ lai sasal᷊ěntihọ bal᷊ine pira-pira wọi Salomo kụ nial᷊ingu manga sawohị u istanang Hizkia ratung Yehuda.

²Duata e wẹ̌bantugang ual᷊ingu apang kụ i rẹ̌děmasʼE; datu lẹ̌adateng ual᷊ingu apang kụ botonge katualagenge.

³Mẹ̌sul᷊ungu laudẹ̌ mal᷊oang kụ maral᷊ung dingangu langị kụ marangẹ, kerene tiněnnan datu e tawe kasẹ̌suiange.

⁴Burěsiko kal᷊imona sal᷊aka e wọu manga taine, buhụewe mapiane i kal᷊uhudu kipung.

⁵Sekehẹ̌ko kal᷊awọu měnanasa raral᷊akisẹ̌ e wọu istana, wuhụewe kararatuange mauwuhẹ̌ ual᷊ingu kạadilẹ̌.

⁶ Kereu tumatěngon datu e pẹ̌těngkasanạben naung, abe kai makịbilangu piạ kal᷊aianenge marangẹ.

⁷Mapiawe i pakawala wotonge sumengkang sol᷊ong tampạ limembong adateng, sul᷊ungu i oro pẹ̌gěllịu tampạ su taumata pangkate limembong karangẹ e.

⁸Kumbahangbe měngkai mẹ̌sẹ̌sasahusung manowang pěrkara su pěnggaghutaěng, u kereu samurine kawe nal᷊ahẹ i kau nẹ̌sal᷊a, ute kai a i kakoạu tangu?

⁹Pẹ̌sasal᷊a ěnna ringangu hapị u, pakasuewe urusẹ̌ dingange samatang, arawe rahasiaʼm bal᷊ine e kumbahangbe i wombengu.

¹⁰U i kau e hědowe i sěbạ kere tau mohonge masẹ̌ga, ringangu arengu e maral᷊akisẹ̌ kananduʼm pẹ̌bawiahu e.

¹¹Tingirang kụ i sẹ̌sowa su tempone ute mẹ̌sul᷊ungu wuam bul᷊aeng su ral᷊ungu lainumang sal᷊aka.

¹²Těgun taumata pelesa su taumata mararingihẹ̌ e, kai mẹ̌sul᷊ungu sinsing bul᷊aeng arau ral᷊ẹ̌gahẹ̌ bul᷊aeng.

¹³Darolohang kụ satia e, makạdiading měndarolohe mal᷊uasẹ̌, kere akẹ maral᷊ěnding baugu měmaměnsạ e su rahami.

¹⁴Kal᷊awọu kědo kụ tawe i pakasěhụ e, tabidạu winawa ringangu anging kụ tawe naparasehu tahiti.

¹⁵Pẹ̌sasabarẹ̌ kụ i pẹ̌sẹ̌sarětạ u manga wawera mal᷊ahimumu e, makạbal᷊insahẹ̌ taumata kawasa e, ringangu makạgoghahẹ̌ kal᷊awọu sasukung.

¹⁶Abe raral᷊awọ kumaěng madu mạdiring i kau e tahamuta.

¹⁷Abe měngkai hanesẹ̌ dụděnta su wal᷊eng lampungu, mạdiring i sie masahe kụ bọu ene mawěnsing i kau e.

¹⁸Ěnsilẹ̌ kụ tawẹ katěngade tangu makạpate, al᷊ingkai peda, rarupa, arau papitị mal᷊ahoro.

¹⁹Mangimang tahakontiang su tempon susa e al᷊ingkai měnẹ̌něpang isi kụkiọ arau rụdal᷊engu laedẹ̌ kempal᷊ẹ̌.

²⁰Mẹ̌kantarị baugu taumata lụlahunsusa e al᷊ingkai mạněntol᷊e si sie su tempon těho, arau mẹ̌děndal᷊ingu haesẹ̌ su manga lesẹ e.

²¹ Mạengu sědụ u e mal᷊unusẹ̌, i sie ghěllirembeng kaěng; dingangu kamagengu i sie marou, gěllirembeng inumang.

²²Ual᷊ingu kawe kerene ute i kau e mapạkamean sie dingangu MAWU e sarungbe měngal᷊amatẹ̌.

²³Anging sawěnahẹ̌ e nal᷊ahẹ u mang mapakarěntan tahiti, kerẹewe lai lahinakange mang makạkaděntan dal᷊angehẹ̌.

²⁴Matanạ su wukung lotenge limembong kal᷊uase sul᷊ungu matanạ sěmbal᷊e ringangu kawing kụ puluang mẹ̌sitori.

²⁵Makatarimạ habarẹ̌ mapia wọu wanua marau e al᷊ingkai mạnginung akẹ maral᷊ěnding su tempong kararoune.

²⁶Taumata mapia makiwatạ su taumata duruhaka e, al᷊ingkai simbul᷊u akẹ mal᷊ěbuhẹ̌ arau pahighi kotorẹ̌.

²⁷Dal᷊akisẹ̌ kumaěng madu mạhěmpal᷊iu e, kerene lai ral᷊akisẹ̌ tumanịu masau mẹ̌berang [8] daralo.

²⁸Taumata kụ tawe makaědal᷊ẹ̌ batangenge, mẹ̌sul᷊ungu soa kụ seng naopehẹ̌ bal᷊oarị e.