Read Sangir BAWERAN SALOMO 26 Bible Online

BAWERAN SALOMO 26 - Sangir bible

BAWERAN SALOMO 26

¹Mẹ̌sul᷊ungu tahiti su tempon něhangu ringangu saldu su tempom pědisẹ̌, kerene lai raralo waugu taumata longong e tawe hinone.

²Kere manụ u winalangeng timěllạ dingangu měnẹ̌nalang su winangaeng, kụ kerene lai laane e mal᷊aing tawe hinone su taumata kụ tawẹ sal᷊ane.

³Kalide e hinong sangetangu kakětinge, kawal᷊o e hinoʼm bẹ̌baheng, kerene lai taumata longong e harusẹ̌ geserang.

⁴Taumata kụ sumimbang kakiwal᷊on taumata kụ longong e mẹ̌sul᷊ung karal᷊ongonge ringangu tau ěndaị e.

⁵Kakiwal᷊ong longong e harusẹ̌be lai simbahengu sasimbahu longong, tadeạu makakiwal᷊o e makahěngangu i sie wal᷊inewe pande kere su tiněnnane.

⁶Měndolohu taumata longong i pěngekeng habarẹ̌ e, mẹ̌sul᷊ungu měmědi laede sẹ̌sane ringangu mẹ̌deạ silakạ.

⁷Kere taumata peosẹ̌ mẹ̌pakẹ u laede, kerene taumata longong e mẹ̌beran sasasa.

⁸Mẹ̌dalo taumata tạ kasingkạ e, mẹ̌sul᷊ungu měngikị u watu masěga-sěgadẹ̌ su katipolẹ̌.

⁹Mẹ̌sul᷊ungu miwawukang měnoẹ tune wọu l᷊imane, kerene taumata longong e mẹ̌beran sasasa.

¹⁰I saim mapěhal᷊ẹ̌ u taumata longong arau měngkate sěmbal᷊i taumata e, sarung makarugi taumata l᷊awọ.

¹¹ Mẹ̌sul᷊ungu saụ mẹ̌sul᷊e su mutane, kerene taumata longong e kụ mẹ̌sul᷊e su karal᷊ongong e.

¹²Taumata kụ tumanịu mạhěmpal᷊iung karal᷊ongonge bědaweng něngalembong kapiane wọu taumata kụ měngẹ̌ngěnna u watangenge kawe pande.

¹³I malaseng e puluange měngkai matanạ su wal᷊e; i sie mẹ̌bẹ̌bera u, ”Piạ singa su l᷊ikude, iạ měntěhang těmboěng su tal᷊oaran dal᷊eng.”

¹⁴Mẹ̌sul᷊ungu tukadẹ̌ tụtěnung su hensele, kerene i malaseng mẹ̌bẹ̌bawihuʼm badange su wowon dal᷊okaěnge.

¹⁵Piạ taumata malaseng tạ sihinge; měněnggungu kaěng su mohonge mal᷊ain tawe makakoạ.

¹⁶I malaseng e mạngěnna u watangenge limembom pelesa wọi sire pitu kụ makaonggọu sasimbange nihino.

¹⁷Taumata kụ lụlaụ sitori kụ bal᷊inewe urusange e mẹ̌sul᷊ungu taumata něnamẹ asu rul᷊u su tul᷊ine.

¹⁸Taumata nạung něngakal᷊ẹ̌ e nẹ̌bera, ”Iạ tumbạen tụtal᷊ewa,” mẹ̌sul᷊ungu taumata pulu měnẹ̌nalangu aghide makasilakạ.

²⁰Kereu kalu e nahěpusẹ̌ tantu putunge mate; kereu i mohong manantạ e sen tawẹ dise, sitori e mal᷊aing měngědo.

²¹Mẹ̌sul᷊ungu woheng dingangu kalu makariadi putunge měngkai rụděllị; kerene taumata puluang mẹ̌darendehẹ̌ e měnẹ̌nahowong sitori.

²²Lahinakang e enẹ e matemang; taumata e puluang měngěllụ ene.

²³Mẹ̌pẹ̌papangawẹ u kuring ěntana e nitampaleng u sal᷊aka, kerene taumata marěngang su mohong, kai arawe naunge kawe ral᷊akisẹ̌.

²⁴I mawinsị e marěngang kal᷊awọu wawerane kai naunge napenẹ u tahuakal᷊ẹ̌.

²⁵Manilaing i sie mahimumu e, kai abe kahimang; u pẹ̌bawinsị e kai nẹ̌kawasa su naunge.

²⁶Manilaing i sie měmẹ̌muning kawawinsị e, patikụ taumata e sarung makasilo karal᷊akise.

²⁷I saim měmangka lohang baugu taumata wal᷊ine, i sie sarung mataho su l᷊ohange. I saim mělungging batu kụ mihino su taumata wal᷊ine, sarung kaěpisang u watu ene hala.

²⁸Mẹ̌konti taumata e měngkate mẹ̌sul᷊ungu mẹ̌bẹ̌binsị i sie. Mohong marěngang e makạkaděntan silakạ.