Read Sangir BAWERAN SALOMO 27 Bible Online

BAWERAN SALOMO 27 - Sangir bible

BAWERAN SALOMO 27

¹ Kumbahang měngkai mẹ̌kẹ̌kotarilang ěllo rịěllo, batụu i kau e wěga wue apa kụ sarung mariadi.

²Kumbahang mẹ̌dalo watangengu e hala; balạekere taumata wal᷊ine kụ nẹ̌koạ ene, saral᷊aing taumata wěganu e.

³Batu ringangu ěne e wědang mahang, kereu i wanding su tědụ u naung ual᷊ingu taumata longong.

⁴Pẹ̌du e kai tingkaị dingangu makạgolang, kaiho tumatěngo tanudẹ̌ e i sai wue makakědang?

⁵Mapiawe tẹ̌gu kụ mal᷊ahẹ bue, sul᷊ungu kakěndagẹ̌ kụ tawe i ukahẹ̌.

⁶Hapị e mạměbahu tatal᷊ěntụ, arawe sědụ e kai mělẹ̌lahěkụ dingangu wisane.

⁷Mạeng kal᷊aedang e sarang madu e suhudang; arawe mạengu kal᷊unusang e manilaing mapaị e mal᷊aing katemangeng masědapẹ̌.

⁸Taumata kụ maněntangu wal᷊ene, mẹ̌sul᷊ungu manụ u winalangeng kụ mạněntangu sal᷊ehe.

⁹Kerẹewe lai lana mawěngi ringangu manga wawěngi e makạl᷊ahimpulu naung, kerene lai kapiang hapị e makạhuweka diwa.

¹⁰Abe kiwul᷊eng hapị u arau hapị i amangu. Su ral᷊ungu kasasěsẹ e kumbahangbe mẹ̌gausẹ̌ laontol᷊u anạu sěmbaụ u; lampung karěduhange limembong kapiaěnge sul᷊ungu anạu sěngkatau kụ marau e.

¹¹Anạku, i kau e pakapelesa wue, tadeạu iạ e mal᷊uasẹ̌ dingangu wotongewe makasimbang mạengu heghesang.

¹²Taumata pelesa e mẹ̌teghang kereu makasilo silakạ; taumata longong e rụdal᷊eng turusẹ̌ mase kahombangengken silakạ masaria.

¹³I saiʼm mapulu měnal᷊udẹ̌ utangu taumata wal᷊ine e, botongewe al᷊akeng arětạ e koạewe kere sasal᷊iune natuhụewe su kědone.

¹⁴I sain deng mal᷊uka-l᷊ukadẹ̌ e měngonggọu adatẹ̌ su hapịe ringangu tingihe maihạ ene kai kere měbẹ̌berang laane.

¹⁵Marehokang kụ puluang su sitori e mẹ̌sul᷊ungu tingihu tahiti rimasehẹ̌ gěnnangu sěhěllo.

¹⁶Tawe hinone i sie orong pakarěmmasẹ̌, mẹ̌sul᷊ungu anging tawe i kaědal᷊ẹ̌ dingangu lana kụ tawe i kahěngkung.

¹⁷Mẹ̌sul᷊ungu uada nangasa uada, kerene lai taumata e mangěndung bọu sěndinganenge.

¹⁸I saim mẹ̌pẹ̌padul᷊i kakaluange sarung kumaěng buane. Mẹ̌tatangkiange sarung arěgaěng kereu mẹ̌těngkahimumu su mawune.

¹⁹Kerẹewe akẹ e mapạsilong gatinu e, kerene lai naungu e měnodẹ u watangengu e.

²⁰Su wanuan tau nate e, mang sěntiniạ piạ tampạ; kerene lai ěnningu taumata e tawẹ pẹ̌kẹ̌takenge.

²¹Bul᷊aeng dingangu sal᷊aka e wẹ̌banikateng su ral᷊ungu rakilang e; taumata e i kakiral᷊a wọu lulune su hal᷊ẹ̌ u raralo.

²²Manilaing taumata longong e wẹ̌baheng kereng kaihạ e, kai tawe mailang karal᷊ongong e.

²³Hikingbe pakapia manga binatangu e,

²⁴u kakakalạ e wal᷊inewe kakalẹ̌, ore lai kawasa waugu mẹ̌parenta mal᷊aing tawe měngkai tatapẹ̌ sarang marěngụ-děngụ.

²⁵Děmpugẹ̌ su rahami ringangu su wul᷊ude wẹ̌basẹ̌ dingangu tampung baugu binatangu e, arawe těntal᷊ang ene e timuwo l᷊ai rěmpugẹ̌ buhu.

²⁶Bọu rukụ u manga dombanu e i kau makahombang pakeangu, dingangu bọu roitu kambingu sěngkamonaěng niwal᷊ụ e i kau e makawělliwe ěntananu wuhu.

²⁷Bọu manga kambingu wal᷊ine e i kau e makaěbạbe susu waugu watangengu ringangu ral᷊ohom bal᷊enu ore lai manga mẹ̌tatangkiangu.