Read Sangir BAWERAN SALOMO 28 Bible Online

BAWERAN SALOMO 28 - Sangir bible

BAWERAN SALOMO 28

¹Taumata ral᷊akisẹ̌ e tụtal᷊ang tawẹ u měnanahusu si sie, arawe taumata matul᷊idẹ̌ e wahani kere singa.

²Kereu wansa e nẹ̌baradosa tangu, mangangawasane e sarung měmpẹ̌papangaweng; kereu těmbonange pelesa, bansa e sarung mẹ̌daragẹ̌ dingangu tatapẹ̌be matul᷊ende.

³Mangangawasa kụ měnẹ̌nẹ̌dạ taumata kasiang e, mẹ̌sul᷊ungu tahiti kụ mẹ̌gěnggolọ pěnsạ e.

⁴I sain tawe měngangarěgan toratẹ̌ e mạnumběka taumata ral᷊akisẹ̌; arawe i saiʼm mạtakụ u toratẹ̌ e mẹ̌sẹ̌sekẹ u taumata ral᷊akisẹ̌.

⁵Kạadilẹ̌ e tawe kal᷊aěnnaěngu taumata duruhaka, arawe taumata kụ měnẹ̌němbawe MAWU e, mamben těngadẹ̌ makạěnna.

⁶Ěndokangbe tau kasiang naunge matul᷊idẹ̌, sul᷊ungu taumata kalạ kụ maakal᷊ẹ̌.

⁷Manga esẹ mangudạ kụ mararingihẹ̌ su toratẹ̌ e, ute kai taumata pelesa. Arawe taumata kụ mẹ̌dẹ̌dal᷊ahapị u taumata kụ mawombarẹ̌ e makạmea si amange.

⁸I saim mạkalạ ual᷊ingu kụkaěng rentene ringangu měngẹ̌ngahụ untune kereng kal᷊awọ e, kakalạ ene e sarung manawo su taumata piạ tatal᷊ěntụ e su taumata kasiang.

⁹Kereu i kau tawe tumatuhụ toratu Mawu Ruata e, Ruata e mal᷊ain sarung makapěndang mẹ̌bakuelu kakal᷊iomanengu.

¹⁰I saim mạmitaugẹ̌ taumata matul᷊idẹ̌ pẹ̌kẹ̌koạ dal᷊akisẹ̌ e, i sie hala manawo su ral᷊ungu sedẹ. Taumata kụ naunge wurẹ̌si e sarung al᷊amateng hakịeweng kawe mal᷊unsemahẹ̌.

¹¹Taumata kalạ e hanesẹ̌ makạpěndang batangenge pelesa, arawe taumata kasiang kụ naunge mapia e, masingkạ u i sai i sie tuhụ hinone.

¹²Kereu taumata mapia e piạ kawasane, tangu patikụ taumata e mal᷊uasẹ̌, arawe kamagengu taumata ral᷊akisẹ̌ e mẹ̌parenta, kawanua e kawe mẹ̌kẹ̌kěmbuni.

¹³I saim měmẹ̌munin dosane e sarung tawe mẹ̌barạuntu. I saing mạngakun dosane, ringangu maněntangu ene e, sarung kěndagengu MAWU e.

¹⁴Pěngadatẹ̌ko MAWU e sidutu, tangu i kau e sarung mal᷊unsemahẹ̌. Kereu i kau e rumokạ si Sie, i kau e sarung makahombang silakạ.

¹⁵Taumata ral᷊akisẹ̌ e kụ mẹ̌kawasa taumata wiahe masigěsạ e, mẹ̌sul᷊ungu singa lụhuang arau běruang kụ měnẹ̌němbo.

¹⁶Měngangawasa kụ měnẹ̌nědạ taumata wal᷊ine e, tawẹ tiněnnane mapia, měngangawasa kụ mẹ̌bẹ̌binsị u akal᷊ẹ̌ e sarung mẹ̌parenta ringangu taunge.

¹⁷Sěngkatau tahapěmate e sarung makapěndangu sẹ̌sahusuang sidutu sarang papatene; tawẹ u sarang sěngkatau e makapěmetọ si sie.

¹⁸Taumata kụ mẹ̌biahẹ̌ tawẹ turạ e sarung masal᷊amatẹ̌. Taumata kụ mẹ̌kẹ̌kakal᷊ikụ pẹ̌bawiahe sarung manawo.

¹⁹Mělahěnsinuang kụ mělẹ̌hal᷊ẹ̌ masěgadẹ̌ e sarung kumaěng masukụ; arawe taumata kụ mẹ̌gẹ̌gagholọ u tempo e sarung kẹ̌kakawusange.

²⁰Taumata kụ matul᷊idẹ̌ e sarung al᷊amatengu MAWU, arawe taumata kụ lụěnningu lighạ makalạ e, tawe mal᷊iwirẹ̌ bọu hukumang.

²¹Dal᷊akisẹ̌ kụ mapẹ̌dal᷊ahaedu taumata e; kaiso kawe piạ lai mělahukunge mapulu mẹ̌koạ su tawẹ kạadile kụ kětạeng baugu makaěbạ doitẹ̌ maning kadodọ.

²²Taumata kụ mal᷊auagẹ̌ lụěnningu lighạ makalạ e, i sie wěga wue u kakakasiange tawẹ karěngụ e maěnsạ su watangenge.

²³Taumata kụ mẹ̌gěllị u tẹ̌gu e, pěngěnsueěnge limembong arěgaěng bọu taumata mẹ̌gẹ̌gěllịu tatěndiọ.

²⁴I saing kụ mẹ̌tako su ghaghurange kụ mělẹ̌harapẹ̌ u ene e wal᷊inewe rosa, ute mẹ̌sul᷊ungu manga tahatako lai wal᷊ine.

²⁵Tumbạeng měnẹ̌nanung gunang batangeng hala e ute makạkaděntang hal᷊ẹ̌ u pẹ̌dararendehẹ̌; i kau e limembong barạuntu kereu i kau e mangimang su MAWU.

²⁶I saim mangumbala su ěbạ e sěsane e, tawẹ tiněnnane mapia. Arawe i sain tụtol᷊e těntiron taumata pelesa e sarung masal᷊amatẹ̌.

²⁷I saim mẹ̌gẹ̌gěllị su taumata kasiange tawe kakawusang. I saim měnẹ̌nakạ u matane waugu pandungangu taumata kasiang e, sarung kahinoěngu laane.

²⁸Kereu taumata ral᷊akisẹ̌ e mẹ̌kawasa; kawanua e mẹ̌kẹ̌kěmbuni; kereu taumata ral᷊akisẹ̌ e mawinasa; taumata kụ adilẹ̌ e sarung měngahạ dingangu tawẹ u makasahaghe.