Read Sangir BAWERAN SALOMO 29 Bible Online

BAWERAN SALOMO 29 - Sangir bible

BAWERAN SALOMO 29

¹I sai tangu měngkai tinalung tụtěndihẹ̌ kereu sasaěng, sěnsul᷊e tempo e sarung magholang dingangu semben tawe saụ i kaul᷊ị kạpia.

²Kereu taumata adilẹ̌ e mẹ̌parenta, kawanua e mal᷊uasẹ̌. Arawe kereu taumata ral᷊akisẹ̌ e mẹ̌parenta, kawanua e masunsara.

³I saiʼm papuluang su kapelesa e, makạl᷊uasẹ̌ naungi amange. I saim mẹ̌dẹ̌dal᷊ahapị u tahapẹ̌sundal᷊ẹ̌ e mẹ̌bẹ̌bawombaru roitẹ̌.

⁴Kereu měngangawasa e měnẹ̌naungbe kạadilẹ̌ e, wanuane sarungbe matoghasẹ̌. Arawe kamagengu i sie kawe limembong měnẹ̌naung doitẹ̌ e, ute wanuane sarungbe maopehẹ̌.

⁵I saiʼm mạněndiọ sěndinganenge, ute mẹ̌tẹ̌taingu sedẹ baugu watangenge.

⁶Taumata ral᷊akisẹ̌ e kẹ̌kasedẹ u rosane, arawe taumata matul᷊idẹ̌ e makạpěndang mal᷊uasẹ̌ dingangu mal᷊unsemahẹ̌.

⁷Taumata mapia e masingkạ u hakẹ̌ u taumata lome e, arawe taumata ral᷊akisẹ̌ e tawe makal᷊aěnna.

⁸Taumata kụ puluang měheghesẹ̌ e makạgolang soa, arawe taumata pelesa e makạputị sitori.

⁹Kereu taumata pelesa ringangu taumata l᷊ongong mẹ̌pěrkara e, taumata l᷊ongong ene e tumbạembeng mẹ̌bẹ̌bawal᷊uang dingangu rụl᷊ěge hakịu makạkoạ gahẹ.

¹⁰Taumata kụ naunge matul᷊idẹ̌ e kẹ̌kawěnsingu taumata kụ mạdoun daha e, kaiso lẹ̌ěllungangu taumata mapia e.

¹¹Taumata l᷊ongong e mẹ̌bawal᷊uang tawẹ sěnsahabe, arawe taumata pelesa e mẹ̌sẹ̌sabarẹ̌ dingangu měngẹ̌ngědal᷊ẹ̌ pědune.

¹²Kereu měngangawasa e měnitị habarẹ̌ niusẹ̌ e, kal᷊awọu sawohị e sarung makoạ dal᷊akisẹ̌ kěbị.

¹³Sěngkatau kasiang dingangu měnananědạ e piạ sul᷊unge; baugi rẹ̌dua kěbị e MAWU nẹ̌gěllị u mata waugu pěmanda tualagu pẹ̌bawiahẹ̌ e.

¹⁴Kereu ratu e tumatawang hakẹ̌ u taumata lome e, tangu ringangu taunge i sie sarung mẹ̌parenta e.

¹⁵Těntiro ringangu sasal᷊ěntihọ e makạpelesa taumata. Anạ kụ hanesẹ̌ tẹ̌tuhukang kapulune e sarung makamea si ninange.

¹⁶Kereu taumata ral᷊akisẹ̌ e mẹ̌kawasa, ral᷊ampa e mạhuntinamba. Arawe taumata matul᷊idẹ̌ e sarung makasilo kaghagholọ u taumata ral᷊akisẹ̌ e.

¹⁷Těntiroiko anạ u e, tangu i sie sarung měngonggọ u karal᷊enehẹ̌ si kau, dingangu makoạ lahiborẹ̌ si kau.

¹⁸Bansa kụ tawe makaěbạ laahạ u MAWU e, makoạ bansa kụ napenẹ u pẹ̌gagharạ. Kariangkamang taumata kụ mararingihẹ̌ su toratu MAWU e.

¹⁹Sěngkatau ěllange tawe tumbạ u katěntiroěngu wawera. I sie makaěnna, kaiso sarung tawẹ naungange sene.

²⁰Limembong lawọ kapěharapeng su taumata l᷊ongong e, sul᷊ungu su taumata tahawisarang kụ tawe mẹ̌tatiněnna kal᷊imona.

²¹Ěllang kụ kẹ̌kapiang deng mangudạ e, pěngěnsueěnge sarung makětị těmbọ e. [9]

²²Taumata kụ mal᷊ighạ mẹ̌bawal᷊uang e makapẹ̌darendehẹ̌ taumata ringangu makạbarạdosa.

²³Taumata maobotẹ̌ e sarung i pakasanạ; taumata naunge masanạ e sarung daloěng.

²⁴Taumata sěngkahal᷊ẹ̌ dingangu taumata tahatako e, mangal᷊ene mẹ̌bẹ̌binsị u watangenge hala. Kereu i sie mẹ̌těngkal᷊ahẹ u watangenge su pěngadilang e tangu i sie sarung kahinoěngu hukumang. Arawe kamagengu i sie měngkate mẹ̌těngkarěmasẹ̌ kerene, ute, i sie sarung kahinoěngu laanen Duata.

²⁵Matakụ u tiněnnan taumata e, makakoạ sigěsạ. Pangimangke su MAWU, kụ i kau e sarung tạ konsange apa.

²⁶Mal᷊awọ taumata kụ mẹ̌dẹ̌deạ gati su těngoʼm mangangawasa, kaiso mẹ̌gaghěllị u kạadilẹ̌ e samatang MAWU sẹ̌sane.

²⁷Taumata mapia e tawẹ dal᷊uase su taumata ral᷊akisẹ̌; taumata ral᷊akisẹ̌ e mẹ̌bẹ̌binsị u taumata mapia.