Read Sangir BAWERAN SALOMO 3 Bible Online

BAWERAN SALOMO 3 - Sangir bible

BAWERAN SALOMO 3

¹Abe kiwul᷊eng apan takụ nitěntiro si kau anạku e. Sěntiniạ pẹ̌tahěndung bue parentaku,

²tadeạu maumburẹ̌ dingangu mal᷊unsemahẹ̌ pẹ̌bawiahu.

³Pakatatapẹ̌ko pangangimangu e ringangu pakasatiako i kau su Mawu Ruata ore lai susěndinganengu e. Tahěndungeko ene ringangu resọko ene su ral᷊ungu naungu,

⁴ tadeạu i kau e i kẹ̌kahimpulu, arẹ̌gaěngu Mawu Ruata ore lai taumata.

⁵Pangimangke su MAWU ringangu kasěllahu naungu, ringangu abe pangumbala tiněnnanu hala e.

⁶Tahěndunge wue MAWU e su ral᷊ungu patikụ apang kẹ̌koatengu, tangu i Sie sarung mělahẹ si kau kakakoạ u pẹ̌bawiahu mapia e.

⁷ Abe pěngěnna u watangengu kai něngalembo pande wọu tumuhụ hinone; daringihe wue MAWU e, dingangu pẹ̌teghangben dal᷊akisẹ̌ e.

⁸Kakanoạ u e sarungbe makoạ undangu, makapia wadangu ringangu makatal᷊ěmbuhu ěndumangu.

⁹Pangadatẹ̌ko MAWU ringangu paněmbang kapiaěnge si Sie wọu patikụ arětạ, dingangu ghẹ̌sing ěntananu,

¹⁰tangu wakudu e sarung mapenẹ u gandung, dingangu akẹ u anggoru e sarung mạhěmpal᷊iu hakịu tawe mẹ̌kiong pěndaresoěnge.

¹¹ Kereu MAWU e měhěgisẹ̌ si kau anạku, tarimạ e ene kere sěmbaụ tatahěndung, dingangu kumbahangbe naungu mẹ̌sasěsilẹ̌ ual᷊ingu těntiro-Ne ene.

¹² MAWU e měhěgisẹ̌ taumata tẹ̌tal᷊ěntukangʼE, mẹ̌sul᷊ungkewen sěngkatau i amang měhěgisẹ̌ anạ e i kẹ̌kěndagẹ̌ e.

¹³Barạuntu taumata kụ nakoạ pelesa e ringangu makạhombang katatahuěnna.

¹⁴Untune limembong kasěllahe wọu kinaẹ̌bakenge wọu sal᷊aka, ringangu limembong kaarẹ̌gane wọu wul᷊aeng.

¹⁵Kapelesa e limembong kaarěgane wọu watum paramata; patikụ apang ilẹ̌ol᷊angu e tawe makasul᷊ung.

¹⁶Kapelesa e mẹ̌gẹ̌gěllịu umburẹ̌ manandụ, kakalạ dingangu lẹ̌adateng.

¹⁷Kapelesa e makạkoạ pẹ̌bawiahu e mal᷊uasẹ̌ dingangu mal᷊unsemahẹ̌.

¹⁸Taumata kụ mạngumbelẹ matoghasẹ̌ su kapelesa e sarung makahombang pẹ̌bawiahẹ̌ tutune ringangu mal᷊unsemahẹ̌.

¹⁹Ual᷊ingu kapelesa e MAWU něndiadi runia; ringangu sipirange i Sie namingkahu l᷊angị su tampạʼE.

²⁰Ringangu kasingkạʼE i Sie napẹ̌giasu kal᷊awọu manga simbul᷊u akẹ su al᷊ungu ěntana ringangu napaelehu akene ore lai winawa su l᷊angị naměmbingu akẹ su wowon dunia.

²¹Ual᷊ingu ene, pangumbelẹ e kapelesa ringangu sipirangu e mauwuhẹ̌, anạku! Kụ kumbahang-bahang maměllọu ene,

²²tangu pẹ̌bawiahu e sarung mapạdul᷊i — mal᷊ěnggihẹ̌ dingangu makal᷊uasẹ̌.

²³I kau e měngkate ral᷊eng pakapia, kụ tawe kạdiongeng mitangga.

²⁴I kau sarung sumohọ mẹ̌tikị tawẹ pěndangu takụ, mase i kau e mẹ̌tikịbe mal᷊ěnabẹ̌ kanandung hěbi.

²⁵Tawahal᷊uasu i kau e matakụ u hombang duměnta sěngkělěndị e kere rěllang, kụ i humage su apan taumata ral᷊akisẹ̌ e.

²⁶MAWU sarung měndiagạ si kau. I Sie tawe mapakawalang kau e maseẹ̌ su ral᷊ungu sedẹ.

²⁷Kereu i kau e piạbe katatoelu mẹ̌koạ mapia su taumata mẹ̌gausẹ̌ kapianu e kumbahangbe, tawe měnarimạ baugu mẹ̌koạ hal᷊ẹ̌ ene.

²⁸Abe pangoro sěndinganenge mahědo sarang sěngkarịěllone, kereu su tempo ini e i kau sembem botonge mẹ̌tul᷊ung i sie.

²⁹Kumbahangbe mẹ̌karaking hal᷊ẹ̌ makarugi sěndinganengu kụ mạtanạ su rěduhu e ringangu mạngumbala si kau.

³⁰Kumbahangbe měmpẹ̌darendehẹ̌ kụ tawẹ banggile dingangu sěngkatau kụ tawe nẹ̌kẹ̌koạ dal᷊akisẹ̌ e si kau.

³¹Kumbahangbe sumingking su taumata mẹ̌kẹ̌koạ mahasa ringangu abe pẹ̌těno lulun sire.

³²U MAWU e mẹ̌bẹ̌binsịu taumata mẹ̌kẹ̌koạ dal᷊akisẹ̌ e, kaiso i Sie kawe hapị mapia su taumata kụ pẹ̌bawiahe matul᷊idẹ̌ e.

³³MAWU e mạngane wal᷊en taumata ral᷊akisẹ̌ e, katewe mạngal᷊amatẹ̌be wal᷊en taumata kụ matuhụ si Sie.

³⁴ MAWU e mẹ̌bẹ̌binsị u taumata naunge marangẹ, kutẹu kawe mạngal᷊amatẹ̌be taumata naunge masanạ.

³⁵Taumata pelesa e sarung něngalembong kawěngine arenge, arawe taumata wodo e makạsamedẹ̌.