Read Sangir BAWERAN SALOMO 31 Bible Online

BAWERAN SALOMO 31 - Sangir bible

BAWERAN SALOMO 31

¹Seng ini e kal᷊awọu wawera kụ niwerang inang i Lemuel, datung Masa su anạ e,

²”Anạku, wuan naungku e, takụ piněhěnding kere sasimbahu kakal᷊iomanengku e. Kai apạ e takụ i pẹ̌bera si kau e tangu?

³Abe pẹ̌gagholọ u toghasu arau mẹ̌bawombaru kuatu e su wawine. Seng mal᷊awọ datu e nagholọ ual᷊ingu wawine.

⁴Pẹ̌tahěndung, i Lemuel! Mạnginung anggorẹ̌ dingangu mạhěmpal᷊iu měnginung inumang makạbukang, kụ tawe hinone su měngangawasa.

⁵U kereu ratu e měnginung inumang makawukang e, i sie mẹ̌biwul᷊en tita e ringangu tawe mẹ̌papandung hakẹ̌ u taumata lome e.

⁶Inumang makạbukang e kai waugi sire apang mạhunturuhẹ̌ dingangu naunge nasusa.

⁷I sire mạnginung e mẹ̌deạu mẹ̌timbul᷊eng kakasiang dingangu kasasusan sire e.

⁸Tatawange wue i sire apan tawe makatahutěndạ u watangenge hala e. Ěllunge wue hakẹ̌ u kal᷊awọu taumata apan tawe makakoạ manga apa.

⁹Pẹ̌tawakal᷊i wue waugi sire e, ringangu kakoạko mělahukung kụ adilẹ̌ e. Ěllunge wue hakẹ̌ u taumata kasiang dingangu taumata sẹ̌sědakeng.”

¹⁰Marehokang pelesa e susa kaěbakeng; i sie limembong kaarěgane wọu intan běrlian.

¹¹Kawinge tawe kakawusangu apa, ual᷊ingu pangangumbalane su kawinge.

¹²I sie tawẹ běke mẹ̌kẹ̌koạ dal᷊akisẹ̌ e su kawinge; kanandung umbure i sie mẹ̌kẹ̌koạ mapia si sie.

¹³I sie makěhagẹ̌ měngomol᷊ẹ̌ hote ringangu manga rukụ u domba e, bọu ene měngkate mẹ̌kẹ̌kahiwuang.

¹⁴Bọu maraune i sie mapạděntang kaěng, kerẹewe kẹ̌koatengu manga kapal᷊u manga pẹ̌dagang.

¹⁵Deng bědang marěndung i sie mẹ̌bangung měnadiang kaěngu apan dal᷊ohom bal᷊ene, ringangu mapẹ̌papahiạu hal᷊ẹ̌ u manga ěllange.

¹⁶I sie mẹ̌dẹ̌deạ ěntana sěngkempang, kụ běliange; i sie mělẹ̌hingidu mẹ̌koạ dahaming anggorẹ̌ e wọu ěbạ e.

¹⁷I sie mẹ̌děndiahing batangenge měhal᷊ẹ̌ mẹ̌bangung suagẹ̌.

¹⁸I sie masingkạ u kal᷊awọu sạbarang kẹ̌koatenge, kụ mawarạuntu, tangu i sie e mělẹ̌hal᷊ẹ̌ sarang hěbi kětung.

¹⁹I sie mẹ̌děndul᷊i banaěngu hote, wọu ene mẹ̌kahiwuang makoạ bal᷊ị.

²⁰I sie tawe měngangilěmụ su taumata kẹ̌kakawusange; i sie mapia naunge su taumata kụ mẹ̌gẹ̌gausẹ̌ tul᷊umang.

²¹I sie tawe ghumaghěnggang kereu rěntaěngu musungu těho e, watụ u jeketẹ̌ e kạsasadia waugu ral᷊ohom bal᷊ene.

²²I sie hala mẹ̌kẹ̌koạ pěrmadani waugu wal᷊ene; pakeange wọu hekạ u leneng kamumụ maholẹ.

²³Kawinge kai taumata timeleng — sěngkatau wọu tal᷊oarang manga těmbonangu soa e.

²⁴I sie mẹ̌kẹ̌koạ pakeange ringangu papehẹ e mase i wal᷊ụ e su manga pědagang.

²⁵I sie piạ pěhěngkinge ringangu lẹ̌adateng; dingangu tawe ghumaghěnggangu tempo ramahi.

²⁶Dingangu masikome i sie mẹ̌bisara; kụ bawerane měngkate masasimạ-simạ.

²⁷I sie měngkai hanesẹ̌ marading měhal᷊ẹ̌ dingangu mẹ̌kẹ̌kakělla urusangu ral᷊ohom bal᷊ene.

²⁸I sie lẹ̌arěgaěngu manga anạ e, ringangu rẹ̌daloěngu kawinge.

²⁹”Kai mal᷊awọ bawine masasadadạ,” angkuěngu kawinge, ”arawe i kau e kapaelange wọi sire kěbị e.”

³⁰Gahị mal᷊ěnggihẹ̌ e tawe kapěngumbalaěng, dingangu kasasadadạ e sarung mailang, arawe wawine kụ mararingihẹ̌ su MAWU e hinone makaěbạ daralo.

³¹Bal᷊inewe kal᷊awọu kapiane e; i sie e kai wawine e kụ hinone adateng suapan tampạ.