Read Sangir BAWERAN SALOMO 4 Bible Online

BAWERAN SALOMO 4 - Sangir bible

BAWERAN SALOMO 4

¹Ei manga anạ, daringihẹ̌ko sasasang amangu! Naungeko ene, tangu i kau e sarung mapelesa.

²Takụ i tẹ̌těntiro si kau ini e mapia, ual᷊ingu ene kumbahang be i kau kawe tawe mẹ̌pandung ene.

³Nạung iạ deng kạdodọ, anạu ghaghurangku sěmbaụ tudẹ,

⁴iạ e tẹ̌těntiroěng i amangku. Angkuěnge, ”Tahěndunge wue kal᷊awọu sasasaku, kumbahang-bahang i kau e miwul᷊eng ene. Koạ bue kal᷊awọu sasal᷊ěntihọku e, mẹ̌deạu wiahu e mal᷊unsemahẹ̌.

⁵Pakapelesako ringangu pakapapentesẹ̌ko! Hanesẹ̌be tahěndunge sasal᷊ěntihọku e kumbahangbe i hipe.”

⁶Arěgai wue kapelesa e, kụ kapelesa ene e sarung mangěllung si kau; nẹ̌naunge wue i sie, kụ i sie sarung mělukadẹ̌ si kau e kụ i kau kạtatanạbe mal᷊enehẹ̌.

⁷Hal᷊ẹ̌ kahumotong-motongange harusẹ̌ koatengu e ute kai mẹ̌tawakal᷊i mẹ̌deạu makoạ pelesa. Balạewe lai apa sẹ̌sahusuangu e, kai kahumotongange pẹ̌tawakal᷊iwe mẹ̌deạu makahěngang.

⁸Suěng bue kapelesa e tangu i kau e sarung i pakarangẹ e. Lahẹ̌kutẹ e i sie, kụ i sie sarung mapakarěntang adatẹ̌ si kamene.

⁹I sie sarung mangonggọu kantem bungang maholẹ si kau, mẹ̌deạu makoạ makotanu.

¹⁰Daringihẹ̌ bue siạ anạku! Naungewe pakapia kal᷊awọu sasal᷊ěntihọku, tangu umuru e ipakanandụ.

¹¹Iạ e seng naněntirong kapelesa e si kau ringangu nanodẹ u kakakoạu pẹ̌bawiahu e kahěngang.

¹²Kereu i kau e mẹ̌biahẹ̌ kerene, tangu i kau e sarung tawẹ sahaghene su tempong i kau e rumal᷊eng, dingangu tawe mitangga su tempong i kau e kạtal᷊ange.

¹³Tahěndunge wue sěntiniạ těntiro kụ seng kinatarimạ u e, wọu iạ. Diagate wue ene pakapia-pia, u kahian těntiro ene e pẹ̌bawiahu e sarumbe piạ ual᷊ine.

¹⁴Abe tuhụ kakakoạ u pẹ̌bawiahu taumata ral᷊akisẹ̌ e, ringangu kumbahangbe mẹ̌těno kakakoạ i sire.

¹⁵Manịen tawe mẹ̌pandung si sire. Pẹ̌teghangben sire e ringangu měngkate ral᷊eng turusẹ̌.

¹⁶Taumata ral᷊akisẹ̌ e tawe kal᷊ahuntikilang těntal᷊ang den tawe nẹ̌kẹ̌koạ dal᷊akisẹ̌ e. I sire tawe kal᷊ahuntikilang kal᷊imonan tawe nạnilakạ taumata wal᷊ine.

¹⁷Karal᷊akisẹ̌ e ringangu pěnanumbiagẹ̌ ene e kai mẹ̌sul᷊ungu kaěng dingangu inumang baugi sire.

¹⁸Dal᷊engu taumata ral᷊akisẹ̌ e mẹ̌sul᷊ungu kalalalělubu hěbi. I sire e mitangga ringangu mạpěpạ tawe kal᷊ahěnganeng. Su sěmbẹ̌kane, ral᷊eng lẹ̌liuangu taumata mapia e kai kere sasěpụ u matangěllo, kakạděngụ e kakạtualage, sarang pěngěnsueěnge makoạ matuala-tualagẹ̌.

²⁰I kau anạ pẹ̌tahěndung bue apan seng takụ niwera! Daringihe wue kal᷊awọu sasasaku e.

²¹Kumbahangbe i rěmmẹ u, kaiso kawe resọ u ene su naungu.

²²Taumata kụ makahěngang ene e, sarung mẹ̌biahẹ̌ dingangu mahuweka.

²³Pakaudupẹ̌ bue ral᷊ungu naungu e, u naungu e kai mẹ̌tẹ̌timona ral᷊engu pẹ̌bawiahu e.

²⁴Kumbahang-bahang mẹ̌beran tạ katẹ̌ngade. Pẹ̌teghangbeng kal᷊awọu wawera konti ringangu kal᷊awọu wawera makapal᷊idẹ̌ taumata.

²⁵Mal᷊owọko ghatinu e mapasěnnangu katul᷊idu naungu; tawahal᷊uasu i kau e mẹ̌těngkakoạ kere piạ urang su l᷊ikudu watu e.

²⁶ Pěngěnnawe pakapia těntal᷊ang tawe nẹ̌kẹ̌koạ e, tangu i kau e sarung makaual᷊i su ral᷊ungu kal᷊awọu munaranu.

²⁷Pẹ̌teghangkon dal᷊akisẹ̌ e, ringangu pẹ̌biahẹ̌be pakatul᷊idẹ̌. Kumbahang-bahang mělenga wọu ral᷊eng tutune.