Read Sangir BAWERAN SALOMO 5 Bible Online

BAWERAN SALOMO 5 - Sangir bible

BAWERAN SALOMO 5

¹Anạku, daringihẹ̌ko siạ! Naungeko kapelesaku ringangu katatahuěnna kụ takụ nitěntiro si kau,

²tadeạu i kau e masingkạ u kereapa i kau harusẹ̌ manodẹ u watangengu ringangu mahumbisara kere hinone sěngkatau piạ kasingkạ e.

³Manga wawine mananakalẹ̌ e,[1] mohonge mararěngang kere ghul᷊ang madu ringangu wawerane makạiwogẹ̌ dal᷊ungu naung,

⁴arawe kamagengu kěbị e seng mapal᷊usẹ̌ e, mal᷊ěmbe seng kate paị e ringangu sigěsạ e.

⁵I kau e nipakawunsal᷊e su wanuan tau nate; dal᷊eng dẹ̌dal᷊engange mẹ̌tẹ̌timona papate.

⁶I sie tawe matatatapẹ̌ su ral᷊eng kụ mẹ̌tẹ̌timona pẹ̌bawiahẹ̌; tawe kinahěnganenge nạung i sie kawe seng nělenga wọu ral᷊eng ene.

⁷Ual᷊ingu ene i kamene manga anạ, daringihẹ̌ bue waweraku dingangu kumbahangbe kawe tawẹ igase.

⁸Pẹ̌teghambeng bawine kerene! Dingangu kumbahang mẹ̌těngkaranim bal᷊ene.

⁹Kereu i kau mẹ̌dal᷊ahapị u wawine ene, i kau e sarung kailangengu kawawantugu ringangu niawanu e sarung hěngkaseng su tempong kangangudạ u e kahiang apam běgang kakěndagẹ̌ e.

¹⁰Kakakalạu e sarung masueng kaěnge su taumata wal᷊ine, ringangu ual᷊ing liaghang gatinu e makoạ tataghuanengu apam běganu e.

¹¹Pěngěnsueěnge ute i kau e sarung kuměndung, kereu wadangu e masueng kinạ e su sakị.

¹²Mase i kau sarung mẹ̌bera, ”Uh kawe unụ e iạ e mẹ̌bẹ̌binsị u sasasa? Unụ e iạ e kawe mạdiri těguang?

¹³Iạ e mạdiri rumaringihẹ̌ apang měnaněntiroku e ringangu tawe mapulu tumuhụ si sire.

¹⁴Bẹ̌gaweng nạung iạ e kawe seng[2] nanawo su matang kawanua e.”

¹⁵Ual᷊ingu ene pakasatia wue su marehokangu e hala ringangu kakěndagu e ghěllịko si sie samatang.

¹⁶Tawẹ gunane si kau e mẹ̌deạ kal᷊ahuwusẹ̌ e su wal᷊inẹ kawingu.

¹⁷Kal᷊ahuwusẹ̌ ene e samatang baugi kau ringangu kawingu e wal᷊inewe ringangu taumata wal᷊ine.

¹⁸Ual᷊ingu ene hinone i kau e mal᷊unsemahẹ̌ dingangu kawingu e hala, deakẹ e kal᷊ahuwusẹ̌ ene e su mahuala nạung seng pinẹ̌kawingu —

¹⁹mahuala maholẹ dingangu mal᷊ingkidẹ̌ kere kijang. Balạekere kal᷊aholẹ u wadange sěntiniạ makapělẹ̌longehẹ̌ si kau ringangu wirahine makạbukang si kau.

²⁰Apawe gunane abul᷊i e su wawine wal᷊ine, anạku? Pẹ̌kapura wue tangu mẹ̌dal᷊ahapị u wawine manakalẹ̌ e?

²¹MAWU e mẹ̌manda patikụ apang kinoạ u taumata. Baewe makoạ sol᷊ong apa taumata e, kai MAWU e mang mạnitị.

²²Dosan taumata ral᷊akisẹ̌ e tabidạu sedẹ nanedẹ tau ene hala.

²³I sie nate ual᷊ingu tawe něnarimạ sasasa. Karal᷊ongehe nakawalu si sie sarang kawawawinasa.