Read Sangir BAWERAN SALOMO 6 Bible Online

BAWERAN SALOMO 6 - Sangir bible

BAWERAN SALOMO 6

¹Anạku, aramanung i kau e wọu nẹ̌kẹ̌do su sěngkatau waugu měmaehẹ̌ utange.

²Dingangu wotonge mariadi i kau e seng kinasedẹ u apam baweranu e ringangu nikahẹ̌gatengu kẹ̌donu e hala.

³Kereu mambeng kahěngang kerene anạku, i kau e seng su kawasan tau ene. Kaiso seng ini e katatainge kụ i kau e makal᷊ěsọ: pakasahawụ lighạ kakoạ sol᷊ong anun tau ene; pẹ̌dorong sěngapam botonge tadeạu i sie mapulu měliwiri kau e.

⁴Kumbahangbe kawe tamai mẹ̌tikị kal᷊imona, ringangu abe pěngirul᷊e.

⁵Pẹ̌těngkapěllọkom batangengu e wọu sedẹ ene kere manụ u winalangeng arau kijang mẹ̌těngkal᷊ěsọ u watangenge wọu měnganganụ.

⁶Taumata malaseng e harusẹ̌ tatingang kakakoạ u pẹ̌bawiahu kahěmisẹ̌ mase pěngěndung bọu ene.

⁷Kahěmisẹ̌ e tawẹ měngangahạ e, tawẹ apa měngangawasane arau měnanitị e,

⁸kaiso karěngụeweng musungu pěmaměnsạ e, i sire měngẹ̌ngomol᷊ẹ̌ sinasạ i sire waugu musungu karal᷊unusẹ̌.

⁹Sarang kạnge tau malaseng ene e měngkai mẹ̌tẹ̌tikị tangu? Kạnge i sie e mapulu mẹ̌bangung?

¹⁰ I sie mạiang mẹ̌tẹ̌tiningkondọ mạngirol᷊o, mase i sie nẹ̌bera, ”Uh, iạ e mẹ̌tikị kạdodọ tempo, u iạ e kai nal᷊otahẹ̌.”

¹¹Kaiso těntal᷊ang i sie kạtikị e, i sie nikahumagengu kakakawusẹ̌ dingangu kakakasiang kụ diměnta kere mělahampasẹ̌ piạ aghide.

¹²Taumata ral᷊akisẹ̌ dingangu tawẹ atorange makonti waewe suapa.

¹³I sie měnẹ̌nalangu matane ringangu kụkerẹ baugu měngakal᷊ẹ̌.

¹⁴Tiněnnane mawuhụ e napenẹ u karaki ral᷊akisẹ̌ dingangu makạkaděntang pẹ̌dararendehẹ̌ balạewe měnsang suapa.

¹⁵Kěbị ini e sarung makawodaị silakạ humombang su watangenge sěngkělěndị e, kụ i sie mawihua marasai.

¹⁶Piạ hal᷊ẹ̌ pitu haghine i kẹ̌kawěnsingu MAWU ringangu tawe i kawala-Ne: Lulune kụ maobotẹ̌ e, mohonge kụ makonti, limane i pěmate taumata tawẹ apa sal᷊ane, otake i pẹ̌kẹ̌karaking kal᷊awọu karal᷊akisẹ̌ e, laede i pẹ̌bẹ̌bal᷊ikěkasẹ̌, i pẹ̌tẹ̌timona karal᷊akisẹ̌ e sahidi kụ sěntiniạ mang mẹ̌kẹ̌konti, dingangu taumata kụ makạkaděntam pẹ̌sasitori su tal᷊oarang hapị.

²⁰Anạku, pẹ̌koạ e apang i lẹ̌orong amangu, ringangu abe kiwul᷊eng kal᷊awọu sasasan ninangu.

²¹Tahěndunge sěntiniạ baweran sire ringangu resọ bue ene su ěndumangu.

²²Kal᷊awọu těntiron sire e sarung měnata si kau su raral᷊engang, mělẹ̌lukadẹ̌ si kau su tempong hěbi, ringangu mạngonggọu tatiala si kau su tempong i kau e mẹ̌bangung.

²³Sasal᷊ěntihọ u manga ghaghurangu e tabidạu sol᷊o matualagẹ̌; těntiron sire e měnẹ̌něbọu kakakoạ u mẹ̌biahẹ̌ mapia e si kau.

²⁴Ual᷊ingu kerene, tangu i kau e niapakarau wọu manga wawine mananakalẹ̌ e, dingangu wọu wawitaugu kawingu manga esẹ bal᷊ine, kụ mawawisa e.

²⁵Kumbahangbe i kau kasal᷊ukatengu kal᷊aholẹ i sire, kumbahangbe kawitaugangu matan sire měmpẹ̌kẹ̌kerẹ e.

²⁶Tahapẹ̌sundal᷊ẹ̌ e wotongewe kawaehangu arěgang kaěng sělamạ, arawe mawuang dingangu kawingu esẹ bal᷊ine e harusẹ̌ baehe ringangu niawa.[3]

²⁷Botonge ngae taumata makasarul᷊u putung kụ tawe makahěngisẹ̌ pakeange?

²⁸Botonge ngae taumata makatahida tětuhẹ̌ kụ laede tawe mal᷊oso?

²⁹Kěbị ene mẹ̌sul᷊ung silakạ e ringangu měnakalẹ̌ kawingu esẹ bal᷊ine. I saing mẹ̌koạ ene e tawe mal᷊iwirẹ̌ bọu hukumang.

³⁰Kereu taumata mẹ̌tako kaěng, manimbe lai ual᷊ingu mạhutung e i sie sarung tahumeang.

³¹Dingangu kamagengu i sie i kasamẹ, i sie harusẹ̌ pěmaehẹ̌ kapia pitu sul᷊e; kụ baugu ene i sie tangu harusẹ̌ kailangengu patikụ darotonge.

³²Kai kereapa ringangu manga esẹ mawuang e? I sie nẹ̌gagholọ u watangenge hala! I sie mamben těngadẹ̌ longong.

³³I sie sarung sigẹ̌sakeng dingangu i pěheghesẹ̌. Arenge sarung i pẹ̌tateleng dal᷊akisẹ̌ sarang marěngụ-děngụ.

³⁴Batụu ual᷊ingu kakanoạ e ene kawingu tau wawine ene makoạ matanudẹ̌, hakịu pẹ̌dune sụsahoka. Kụ kamagengu i sie měmal᷊isẹ̌ une, tangu i sie sarung tawẹ apa kakěndage.

³⁵I sie tawe kaologangu roitẹ̌; maning poroseěng kereapa kakěpal᷊e, tawe makapurạ pědune.