Read Sangir BAWERAN SALOMO 8 Bible Online

BAWERAN SALOMO 8 - Sangir bible

BAWERAN SALOMO 8

¹ Pẹ̌daringihẹ̌! Kapelesa e mẹ̌gẹ̌gio, kapelesa e něhengkẹ tingihe.

²I sie rimarisị su manga wěntihe su wiwihu ral᷊eng, dingangu su pělellangengu manga ral᷊eng.

³Su manga tukadu pasěllangeng, su ral᷊eng sasuěkang sol᷊ong manga soa, kụ seng ěndaị sene i karingihẹ̌ tingihe.

⁴”Ei, manga umatẹ̌, iạ e mẹ̌kẹ̌kui si kamene; patikụ taumata su dunia e pěnaungbe těguku!

⁵E i kamene apan den tạ ěbạ i kamene, pěmpangěndungko mẹ̌deạ u piạ tiněnnang kamene mal᷊ahoro; i kamene kụ mawawagal᷊ẹ̌ e, pangěndungko mědeạu měngkatilang.

⁶Nẹ̌naunge wue apam baweraku e, u kěbị e mạtumang dingangu maghẹ̌si.

⁷Takụ pinẹ̌bera e kěbị mang kahěngang, u iạ e mẹ̌bẹ̌binsị u konti e.[4]

⁸Kal᷊awọu waweraku e matul᷊idẹ̌ kěbị, tawẹ u sarang sěmbaụ mẹ̌kẹ̌kalelọ arau nẹ̌sal᷊a.

⁹Baugu apam pelesa e, baweraku e těngadẹ̌, baugu apam matahuěnna e, baweraku e natumang.

¹⁰Pěngarěgawen sasasaku e nangělembo wọu sal᷊aka tutune, pěnẹ̌naungbe kasingkạ něngalembo wọu wul᷊aeng tutune.

¹¹Kai iạ e kapelesa, limembong kaarẹ̌gane wọu berlian; tawe i kasukạ baewe su manga apa i pẹ̌kẹ̌kahumangu.

¹²Kai iạ e kapelesa; si siạ e kai piạ katatahuěnna kapelesa ringangu kasingkạ.

¹³Měngadatẹ̌ MAWU mangal᷊ene ute mẹ̌bẹ̌binsị u karal᷊akisẹ̌; iạ e mạdiring kal᷊aobotẹ̌ dingangu kararangẹ u naung. Iạ e mạběnsingu lulu ral᷊akisẹ̌ e ringangu kal᷊awọu wawera tondol᷊ikụ.

¹⁴Kai iạ e mẹ̌gẹ̌gěllịu sipirang. Dingangu mal᷊aing iạ mapakal᷊ahẹ u ene. Iạ e masal᷊ikodẹ̌ dingangu l᷊ai matoghasẹ̌.

¹⁵Manga ratu e takụ tẹ̌tongkaěng měndal᷊engu paparentaěng, apang makakawasa e takụ ontol᷊ang mapakateing kạadilẹ̌ e.

¹⁶Ual᷊ingu karạdiahangku e, apan těmbonange, ringangu mararatu e mẹ̌pẹ̌parenta ringangu mẹ̌děndal᷊engu kạadilẹ̌ e.

¹⁷Iạ e kụkěndagi sire apam mapulung iạ; apam měmpẹ̌dẹ̌deạ siạ, sarung mẹ̌sombangu iạ.

¹⁸Si siạ e kạdariahi kakakalạ dingangu lai kal᷊aadatẹ̌, ore lai tawe kakawusangu apa.[5]

¹⁹Apang kinareạu wọu iạ e něngalembo wọu wul᷊aeng sahị; limembong kaarẹ̌gane wọu sal᷊aka tutune.

²⁰Iạ e tụtol᷊e ral᷊engu kạadilẹ̌, iạ e rụl᷊empang su ral᷊engu katul᷊idẹ̌ e.

²¹Taumata apang kụkěndagu iạ e, takụ i pakakalạ; bal᷊ene takụ ipakapenẹ u arětạ.

²² Iạ e niriadim MAWU e mẹ̌sul᷊ungu kahumotongange, iạ e kai lětạ u karạdiahangʼE kụ humotong nạung su tempong nạung-nạung.

²³Iạ e kinoạ den su tětạ u dunia, su tempong kal᷊imona, den dunia ta nịdiadi.

²⁴Iạ e piněhěnding kal᷊imonang laudẹ̌ mal᷊oang ta nịdiadi, den tawẹ simẹ̌sěpụ kal᷊awọu simbul᷊u akẹ.

²⁵Iạ e piněhending kal᷊imonang manga wul᷊ude pinakatei kal᷊imonang manga wukide pinakarararisị,

²⁶kal᷊imonang MAWU e něndiadi runia ringangu manga wimbaenge, mal᷊ạ katewe kal᷊imonang niriadi-Ne kempangu ěntana kal᷊imona.

²⁷Iạ e nẹ̌sahidi su tempong langị e niěmpahẹ̌, dingangu sarul᷊uange niwingkahẹ̌ su wowong laudẹ̌,

²⁸piạ MAWU e naměllọ u winawa su winangaeng, dingangu nanope apan simbul᷊u taghal᷊oang,

²⁹piạ i Sie nangoro sasị tadeạu kumbahangbe lumiu kal᷊awọu pẹ̌saraěnge. Iạ e mal᷊aing ene paị sene piạ e laěmpahẹ̌ dunia e piněllọ e.

³⁰Iạ e ene su sěndihangʼE kere anạ kẹ̌kapiaěngʼE, apang kal᷊aěllo e seng iạ e makạl᷊ahimpulu si Sie; sěntiniạ iạ měngkai měnẹ̌nalang su těngo-Ne.

³¹Iạ e měngkai sěntiniạ lụluasẹ̌ su wowon dunia-Ne, dingangu makạpěndang mal᷊uasẹ̌ su tal᷊oaran taumata.

³²Ual᷊ingu ene, daringihẹ̌ko si siạ, ei laumbaseng! Tuhuke wue sasal᷊ěntihọku e, tangu i kau e sarungbe mal᷊unsemahe.

³³Tarimạko sasal᷊ěntihọ dingangu kakoạko pelesa, kumbahangbe i kau e kawe tawẹ pandungange.

³⁴Kariangkamang apan taumata kụ dụdaringihẹ̌ si siạ kụ apang kal᷊aěllo e kụkaiang mạngampal᷊ẹ̌ su tukadu wal᷊eku, kụ mẹ̌dẹ̌dal᷊ukadẹ̌ su pasěllangengu katatanakengku.

³⁵I saing nakaěbạ si siạ, makahombang pẹ̌bawiahẹ̌, kụ si sie tangu MAWU e pakawala.

³⁶I sai tawe makaěbạ si siạ e, makarugi watangenge hala e; taumata kụ mẹ̌bẹ̌binsị u iạ e, lụalong papate.”