Read Sangir BAWERAN SALOMO 9 Bible Online

BAWERAN SALOMO 9 - Sangir bible

BAWERAN SALOMO 9

¹Kapelesa e seng něndarisị bal᷊e, ringangu napakatein dihine pitu.

²I sie seng němotọ binatang baugu sal᷊iwang, něngongke akẹ u anggorẹ̌ dingangu něnadian simokol᷊ẹ̌.

³Apang kokị bawine e niorone tamai apẹ̌kẹ̌kui wọu tampạ mararangẹ su soa,

⁴”I sain tawẹ manga ěbạ e, ghẹ̌gausang den damahi!” Baugi sain tawẹ tahuěnnane, kapelesa e nẹ̌bera u,

⁵”Mahiko pěmpěngidopẹ̌ kaěngku ringangu pẹ̌temangko anggorẹ̌ takụ nikongke.

⁶Těntangko karal᷊ongong, tadeạu i kau e mẹ̌biahẹ̌ mal᷊unsemahẹ̌. Kụ tol᷊ei wue ral᷊engu taumata pelesa.”

⁷Kereu taumata e mạdiri těntiroěng kụ tọdekang pẹ̌sasal᷊ane, i sie sarung luměgeng kau e. Kereu taumata ral᷊akisẹ̌ e pěpẹ̌duangu, i sie sarung mẹ̌parohang si kau.

⁸Kumbahang měheghesẹ̌ taumata madiri těntiroěng; u i sie sarung mawěnsing i kau. Arawe kamagengu taumata pelesa e těbokangu sal᷊ane, i sie sarung měngarěgang batangengu.

⁹Arawe kamagengu taumata pelesa e tětěntiroěngu, i sie sarung makoạ něngalembong kapelesane. Dingangu kamagengu taumata kụ mararingihẹ̌ su Mawu kụ těntiroěngu e kasingkạ e sarung mahuntinamba.

¹⁰ Mẹ̌deạu makoạ pelesa, kahumotong-motongange taumata harusẹ̌ piạ maadate, ringangu mạtakụ u MAWU. Kereu i kau e masingkạbeng Limembong Kasusiange, i kau e sarungbe makahombang katatahuěnna e.

¹¹Kapelesa e sarungbe makaonggọu umurẹ̌ manandụ.

¹²Kereu kapelesa e taghuanengu, ute i kau sẹ̌sanu e mẹ̌barạuntu. Arawe kamagengu kapelesa ene e suhudangu e ute i kau hala e mal᷊aing i pakarugi.

¹³Karal᷊ongong e kai mẹ̌sul᷊ungu wawine mataradạ tawẹ manga ěbạ e ringangu tawẹ meane.

¹⁴Tampạ e tangu su tukadu wal᷊ene arau su tukadu pasěllangengu soa.

¹⁵Bọu tampạ ene i sie mẹ̌kẹ̌kui apan taumata sụsahe. Taumata kụ naunge matulusẹ̌ e lẹ̌lokeěnge.

¹⁶”Mahiko otong, e i kamene tạ kadiongeng ěbạ i kamene!” Ringangu su taumata longong kụ tawẹ apa tiněnnane mapia i sie nẹ̌bera,

¹⁷”Akẹ tako e temange marěngang, dingangu kaěng likosẹ̌ e limembong katemange.”

¹⁸I sire kụ apang nakoạ kinaěnge běga wue nạung taumata kụ nẹ̌tiwo si sie kawe nasue singongone ěndaị sene; kụ i sire nạung sen simuẹ̌ su ral᷊ungu wal᷊ene, orasẹ̌ ini e ene su ral᷊ungu runian tau nate.