Read Sangir MĚNANASẸ̌ 10 Bible Online

MĚNANASẸ̌ 10 - Sangir bible

MĚNANASẸ̌ 10

¹Kasuangu l᷊ango e nakawuhụ lana mawěngi sěmbotol᷊ẹ̌, diọ bodo e makạilang kapelesa marangẹ.

²Kai su ral᷊enge mạengu taumata pande e makakoạbe munara, ringangu taumata wodo e mẹ̌kẹ̌koạ karal᷊akisẹ̌.

³Kawawodoke ikẹ̌kasilo su kěbị kakanoạ e. Ringangu manga patikụ taumata e i tẹ̌todẹ e karal᷊ongonge.

⁴Kereu i kau e pěpẹ̌duangu měngangawasa e, kumbahangbe mẹ̌dorong měngědo wọu hal᷊ẹ̌ u. Manimbe sal᷊anu e ghẹ̌guwạ, i kau e ghěllirangbeng ampunge kereu mal᷊enehẹ̌ dingangu masabarẹ̌.

⁵Piạ karal᷊akisẹ̌ bal᷊ine takụ nikasilo su dunia, kụ kai pẹ̌daral᷊ewangu apang měngangawasa.

⁶Taumata wodo e ghẹ̌gěllirangu kal᷊aianeng mawantugẹ̌, arawe taumata su horone tawe makahombang apa-apa.

⁷Bọu takụ kinasilo manga ěllang němpẹ̌sake kawal᷊o arawe manga ghal᷊ipohong mapapangkatẹ̌ e maạhundal᷊engu laedẹ̌ kere ěllang.

⁸ I saim měmangka lohange, sarung manawo su ral᷊unge; i saim měměka meselẹ̌ sarung kikiangu těmpu maghiadẹ̌.

⁹I saim měhal᷊ẹ̌ su l᷊ohange mawatu e sarung kawanggoěng kụ mal᷊esẹ. I saim měmare kalu, aramanung batongewe masilakạ.

¹⁰Kereu pedanu e mamomo ringangu tawe laasaěngu, i kau e harusẹ̌ měhal᷊ẹ̌ masěgadẹ̌. Pẹ̌pakẹkon tahuěnnanue mapia, ringangu pẹ̌koạko hingide kal᷊imona.

¹¹Kereu těmpu e měngiki kal᷊imonang haroěngu lahopa e tangu iněngen těmpu e sembelain tawẹ gunane.

¹²Baweran taumata pelesa e makạadatẹ̌ si sie, arawe taumata wodo e mạbinasa ual᷊ingu wawerane hala.

¹³I sie nanětạ dingangu wawerane tạ l᷊ohone kere wiasa, kaiso pěngěnsueěnge wisarane e kere wisaran tau pulu.

¹⁴Kerene, taumata wodo e lawọ bisarane. Ěllo ramahi e mạbawuni waugi kitẹ kěbị. Tawẹ apa kụ makatul᷊angu apa sarung mariadi samuring kitẹ e sen tawẹdise.

¹⁵Kětạembeng taumata wodo e wěgan dal᷊eng sol᷊ong bal᷊ene, i sie mělẹ̌hal᷊ẹ̌ masěgadẹ̌ tawẹ i rul᷊ene.

¹⁶Silakạ bue wanua kụ datune mangudạ-ngudạ e, ringangu apan tembonange sěhěbi tiwatu e su sal᷊iwang.

¹⁷Apạ e kapiane banua kụ datune e piạ pẹ̌hěngkinge, kụ těmbonange kụkaěng be su orase, tawẹ kapulune mẹ̌timbukang dingangu pande mẹ̌puhědangu watangeng.

¹⁸Atụ u wal᷊e e sarung tumuro kereu tawe surikang, kụ pěngěnsueěnge wal᷊e ene e mahupadẹ̌ kahiang malasẹ̌.

¹⁹Sal᷊iwang e makạdiadi lěge, ringangu anggorẹ̌ e makạkoạ dal᷊uasẹ̌. Kaiso hinom piạ doitẹ̌ baugu i pěmaehẹ̌.

²⁰Kumbahang měněngkul᷊ẹ̌ datu, manilaing su ral᷊ungu naung. Kumbahang měhinakang taumata kalạ, manilaing su kamaru pẹ̌tatikilangu e hala. Kiwuạ u manụ u winalangeng sěmbaụ e makaringihẹ̌ apan niweranu, bọu e měnepasu ene su taumatane.