Read Sangir MĚNANASẸ̌ 11 Bible Online

MĚNANASẸ̌ 11 - Sangir bible

MĚNANASẸ̌ 11

¹Pěnělẹkon doitu e su ral᷊ungu tawakal᷊inu e su wanua su l᷊ikude. Kụ i kau e makareạbe untune susamurine.

²Pẹ̌suangkom modalu e su apạeweng haghin dagang; pẹ̌deạko tawakal᷊inu e sěngapang kakěpal᷊e. U taumata e hinong pakatateghang těntal᷊ang hombang e tawe nạěnsạ e.

³Sol᷊ong batuhu sude ngae kalu ene mahaka, kụ mang těbe lụlimbatang su tampạ kinahakaěnge. Kereu winawa e nawěhạ ual᷊ingu akẹ e, ute tahiti e mal᷊aing dimasehẹ̌ mal᷊awọ su dunia.

⁴I saim měngampal᷊ẹ̌ sarang anging dingangu runia e matilang, tawe sarung mẹ̌suang dingangu tawe lai měnipo wuane.

⁵Duata e nẹ̌koạ patikụ, dingangu taumata e tawe nakahěngang kakanoạʼE; kerene lai i sie tawe nakaěnna sasombọu pẹ̌bawiahẹ̌ buhu su ral᷊ungu gandongangu sěngkatau marehokang.

⁶Sawuhẹ̌ko winenu e su tempom mal᷊ukadẹ̌ e dingangu kumbahangbe měngirul᷊e su tempong hěbi. Batụu i kitẹ e wěga wue měnsang sasuang sude mapia tatuwone. Aramanung i rẹ̌dua e lai timuwowe mapia.

⁷Sěnnangu matangěllo e makạl᷊uasẹ̌; kụ enẹewe kal᷊uase kereu makatemang ene.

⁸Pakitarimakasẹ bue i kau e kereu umburu e i pakaraluhẹ̌. Kaiso pẹ̌tahěndung, maning i kau e mẹ̌biahẹ̌ marěngụ su dunia, temponu e su runiam papate e wědang lai limembong karěngụ e. Kụ kai apạ e hinong pěharapeng kapia? Kěbị e tawẹ gunane ringangu sia-sia.

⁹Pakẹko tempong kangangudạ u e ei manga kawuhuang! Pakal᷊uasẹ̌ bue těntal᷊ang i kau e dem bědang kal᷊ahětune. Pakawatuke wue kal᷊awọu ěnningu e, koạbe kěbị kal᷊awọu karakinu. Kaiso pẹ̌tahěndung bue, Ruata kụ ene su sorga, sarung měhukung kal᷊awọu kakanoạ u.

¹⁰Tokol᷊ẹ̌ko kaghaghěnggang dingangu susan naungu e, watụ u tempong kangangudạ u e masahawụ mapaghohẹ̌.