Read Sangir MĚNANASẸ̌ 2 Bible Online

MĚNANASẸ̌ 2 - Sangir bible

MĚNANASẸ̌ 2

¹Iạ e seng něngal᷊ạ e putusang u mapakatul᷊ende em batangeng hala e waugu makakasingkạ u kai apa karal᷊unsemahẹ̌ e. Kaiso kasueěnge mang sia-sia.

²Iạ e nakahěngangke u ral᷊ěge e kai kawawodokẹ̌ dingangu ral᷊uasẹ̌ e kai tawẹ gunane.

³Mạbol᷊eng su ěnningku waugu makoạ pelesa, iạ e mạngantibu mẹ̌dal᷊uasẹ̌ dingangu měnginung anggorẹ̌ dingangu mẹ̌sal᷊iwang. Su naungku e seng ene e kakakoạ u pẹ̌bawiahẹ̌ kapiaěnge su taumata katemangenge tạ kararěnnane su dunia ini e.

⁴ Munara ghaghaghuwạ e sen takụ kinoạ. Takụ nipětị manga wal᷊eku. Iạ e nẹ̌koạ manga wedeng dingangu manga rahami kụ nisuangengu kalung anggorẹ̌ dingangu kal᷊awọu haghim bua-bua.

⁶Iạ němangka manga pahighi i pěněbohẹ̌ manga wedeng dingangu manga sasuang ene.

⁷ Iạ e piạ ěllangku napenẹ, baewe takụ niwělliang, dingangu apang piněhanạ su wal᷊eku. Binatangku e limembong kal᷊awọe marau wọu binatang i sai-sai kụ bọu nạung mạtanạ su Yerusalem.

⁸ Iạ e něnampung sal᷊aka ringangu wul᷊aeng pul᷊isu ghaghěllị bọu mararatu su apam banua paparentaěngku. Mẹ̌kakantarị esẹ arau wawine mapakạl᷊uasu naungku e ringangu manga kakantarị i sire e. Takụ l᷊ai nitaghuaneng kal᷊awọu rokạ kakěpal᷊eweng kinapuluku e.

⁹ Těngadẹ̌, iạ e limembong kasěllahe wọu i sai-sai nạung bọu mạtanạ su Yerusalem, dingangu pelesaku e mal᷊aing tẹ̌be matoghasẹ̌.

¹⁰Kal᷊awọu ěnningku e takụ niwatukang. Tawẹ běke iạ mẹ̌tingkědang u watangeng baugu mẹ̌batụ kapulun dal᷊uasẹ̌ měnsang sude. Iạ e lụlesạ u patikụ ual᷊in liaghan saghedẹ̌ku e, ringangu kai enẹ e tatendengku e.

¹¹Kaiso wọu ene e takụ tẹ̌titikang kal᷊awọu munaraku, dingangu lai kal᷊awọu saghedẹ̌ku waugu i pěngěnsue kal᷊awọu munara ene, tangu nakahěngangke iạ e kěbị ene e tawẹ mangal᷊ene. Munaraku ene e sia-sia kere měnẹ̌nahusu anging samatang.

¹²Baewe lai kereapa sěngkatau ratu e kětạeng botonge makakoạ apan sem bọu kinoạu manga ratu kal᷊imonan sie e. Bọu e iạ e nanětạ e mẹ̌tẹ̌tiněnna: Kai apa mangal᷊ene makoạ pelesa arau pěmparal᷊u arau wodo?

¹³Těngadẹ̌ iạ e masingkạ, ”Kapelesa e limembong kapiane wọu kawawodokẹ̌, mẹ̌sul᷊ungu tualagẹ̌ e mal᷊aing něngalembong kapiane wọu kararěndung.

¹⁴Taumata pande e makạsilo timona tẹ̌timonaěnge; taumata wodo e mẹ̌sul᷊ungu rụdal᷊eng mẹ̌sẹ̌sasaghipo.” Kaiso iạ e masingkạ l᷊ai u pal᷊edu l᷊ima e mẹ̌sul᷊ung e sarung mawuạ si sire kěbị.

¹⁵Tangu su tiněnnaku e, ”Kakakoạu pẹ̌bawiahẹ̌ kụ mihombang su taumata wodo e mal᷊ain sarung kahombangengku e lai. Kụ apawue gunane kal᷊awọu pelesaku e?” Tangu takụ nial᷊ạ gẹ̌sine u kapelesa e mamben tawẹ gunane marihutu.

¹⁶Taumata wodo e sarung mal᷊ighạ kawul᷊enang, arawe taumata piạ pelesane e mal᷊ain tawe katiwakeng. Mararěna i kitẹ kěbị e sarung mapaghohẹ̌ bọu ěndumang. I kitẹ kěbị e harusẹ̌ mate, baewe taumata pande arau apam bodo.

¹⁷Ual᷊ingu ene tawẹ mangal᷊ene lai pẹ̌bawiahẹ̌ku e, tawẹ apa wal᷊ine. Kěbị e sia-sia; iạ e seng něnahusu anging samatang.

¹⁸Kal᷊awọu lětạu hal᷊ẹ̌ku e ringangu ěbạku e tawẹ lai gunane si siạ, u iạ e harusẹ̌ měněntangu ene su měngangaweng si siạ e.

¹⁹Kụ měnsang i saị e masingkạ u i sie e pande arau wodo? Kaiso waewe kereapa lai i sie sarung makoạ měnanaghuang lětạ u tawakal᷊iku kụ sen takụ kinaual᷊i karěngụ u pẹ̌bawiahẹ̌ku su dunia ini al᷊amatu liaghang gatiku ringangu pelesaku. Kụ ene e mal᷊aing sia-sia.

²⁰Orasẹ̌ ini e iạ něsasěsilẹ̌ něhal᷊ẹ̌ kereng kasaghede.

²¹U taumata e měhal᷊ẹ̌ masěgadẹ̌ e mẹ̌pẹ̌pakẹ u kal᷊awọu kapelesa, kasingkạ dingangu katatahuěnna waugu makakahumpạ u karaki. Kaiso pěngěnsueěnge i sie e harusẹ̌ mẹ̌něntangu kal᷊awọu lětạ u liaghang gati su taumata kụ mang tawe napạsěbangu liaghane waugu ene. Kụ ene e mal᷊aing sia-sia, ore lai mamben tạ kạadile!

²²Kanandung biahu taumata e mělẹ̌hal᷊ẹ̌ masěgadẹ̌ dingangu mẹ̌bẹ̌bangkuadẹ̌, kụ bọu ene sudẹ e pul᷊isu saghede i kal᷊esạ e?

²³ Baewe apa kinoạ e karěngụ u pẹ̌bawiahe, makạbawa sigěsạ dingangu tědụ u naung si sie. Su tempong hěbi naunge mal᷊aing tawẹ kal᷊oahenge. Kụ kěbị-kěbị e mang sia-sia samatang.

²⁴ Tawẹ kụ limembong kapiane waugu taumata e su l᷊ikudu kumaẹ̌ng, měnginung dingangu mẹ̌teěng ual᷊ing liaghang gatine. Iạ masingkạ u ene e mal᷊aing gaghěllị u Mawu Ruata.

²⁵I sai wue makakaěng dingangu mẹ̌dẹ̌dal᷊uasẹ̌ tawẹ Duatane?

²⁶ Duata e nẹ̌gěllịu kapelesa, kasingkạ, dingangu karal᷊unsemahẹ̌ baugu taumata kụ mạpakal᷊uasu naungʼE. Arawe taumata warạdosa e nioro-Ne piněmunara nẹ̌deạ pẹ̌bawiahe ringangu mạnampung ual᷊ine waugu isarakang su taumata kụ makạl᷊uasẹ̌ naungu Ruata. Kụ kěbị-kěbị e sia-sia kere kal᷊uandagu mẹ̌nahusu anging.