Read Sangir MĚNANASẸ̌ 3 Bible Online

MĚNANASẸ̌ 3 - Sangir bible

MĚNANASẸ̌ 3

¹Patikụ sạbarang su dunia ini e mạdiadi su tempo niatoru Mawu Ruata e.

²Duata e něnantu tempo waugu měmantelẹ̌, dingangu tempo waugu maněntangu dunia, tempo waugu mẹ̌suang dingangu tempo waugu měngěbụ,

³tempo waugu měmate ringangu tempo waugu mapakaul᷊e, tempo waugu měnggolang dingangu tempo waugu měmangung.

⁴Duata e něnantun tempo waugu sumangị dingangu tempo waugu lumẹ̌ge, tempo waugu lụlungkang, dingangu tempo waugu mẹ̌sal᷊ai,

⁵tempo waugu mẹ̌sěngkapẹ̌tikị dingangu tempo waugu mẹ̌puhědangu ene, tempo waugu mělahěkụ dingangu tempo měngědal᷊u ene.

⁶Duata e něnantun tempo waugu makahombang dingangu tempo waugu kailangeng, tempo waugu měndesọ doitẹ̌ dingangu tempo waugu mẹ̌bawombarẹ̌,

⁷tempo waugu měnggehẹ, dingangu tempo waugu měnggepẹ, tempo waugu marěmasẹ̌ dingangu tempo waugu mẹ̌bisara.

⁸Duata e něnantu tempo waugu kuměndagẹ̌ dingangu tempo waugu mawěnsing, tempo waugu mẹ̌sekẹ dingangu tempo waugu mẹ̌dame.

⁹Apạ e měnsang kal᷊awọu lětạ u liaghang gating kitẹ e?

¹⁰Iạ masingkạ u Ruata e něngonggọu wawawaěng mawěhạ si kitẹ.

¹¹I Sie něnantu tempone masarạ-sarạ baugu patikụ sabarang. I Sie něngonggọu kal᷊aěnning si kitẹ e waugu makakasingkạ u ěllo ramahi, kaiso i kitẹ e tawe makaumal᷊ẹ̌ makahěngang kakanoạu Ruata e wọu panẹ̌takenge sarang pěngěnsueěnge.

¹²Iạ masingkạ u waugi kitẹ e tawẹ apa limembong kapiane wọu makal᷊uasẹ̌ dingangu makatemang pẹ̌bawiahẹ̌ kanandung umburi kitẹ e.

¹³Kapiaěnge i kitẹ kěbị e kumaěng dingangu měnginung ore lai mẹ̌teěng lětạu hal᷊ẹ̌ i kitẹ e. Ene e kai ghaghěllị u Ruata.

¹⁴Iạ masingkạ u kal᷊awọu munaran Duata e sarung těbe ene sarang marěngụ-děngụ. Taumata e tawe makatamba arau makaghaing. Dingangu Ruata e nẹ̌karạdiahang sěngapam botonge tadeạu i kitẹ e matakụ i Sie.

¹⁵Orasẹ̌ ini e mạdiadi, seng bọu nariadi kal᷊imonang ene e. Apan seng ene e, seng marěngụ ene. Duata e něnantu tadeạu apan seng nariadi e, saụ mariadi kạpia.

¹⁶Piạ l᷊ai takụ kinasilo su dunia ini: suapang hinone piạ kạadilẹ̌ dingangu kapia e, sene piạ karal᷊akisẹ̌.

¹⁷Su tiněnnaku e, Duata e sarung měhukungu taumata mapia arau manilaing dal᷊aị e, batụu walạewe hal᷊ẹ̌ apa ringangu apang kakanoạ e sarung mariadi su tempo kụ sen tinantu kahian Duata.

¹⁸Guwal᷊e si siạ ute: Duata e mẹ̌manikạ si kitẹ e waugu panodekang u nasipi kitẹ e tawẹ pẹ̌tatěntange ringangu pẹ̌bawiahu binatang.

¹⁹Manilaing kereapa, pal᷊edu pẹ̌bawiahu taumata ringangu binatang e mẹ̌sul᷊ung. Sěmbaụ e sarung mate, ute kerene lai wal᷊ine e. I rẹ̌dua e lawọ diadikang. Kụ taumata e tawe limembo warạuntu wọu binatang, u waugi rẹ̌dua e pẹ̌bawiahẹ̌ e ute sia-sia.

²⁰I sire e mẹ̌tẹ̌timona tampạ mẹ̌sul᷊ung. I sire e asal᷊e wọu awul᷊ẹ̌ dingangu sarung mẹ̌sul᷊e su awul᷊ẹ̌.

²¹I kitẹ e wěga wue, apa rohkẹ̌ u taumata e taraị maawị ringangu rohkẹ̌ u binatang e lumintụ sol᷊ong ěntana.

²²Ual᷊ingu ene iạ nakahěngang u tawẹ apa limembong kapiane waugu taumata wọu makateěng lětạ u munarane. Su l᷊iung ene e tawẹ apa kụ i kakoạ e? Tawe mariadi kụ i sie masingkạ u apan sarung mariadi samurim papatene.