Read Sangir MĚNANASẸ̌ 4 Bible Online

MĚNANASẸ̌ 4 - Sangir bible

MĚNANASẸ̌ 4

¹Bọu ene takụ saụ kẹ̌kakěllaěng kal᷊awọu tawẹ kạadile su dunia ini e mang mạdiadi. Taumata kụ sẹ̌sědakeng e sụsangị dingangu tawẹ apa kụ mapulu mẹ̌tul᷊ung si sire. Tawẹ u sarang sěngkatau mapulu měnongkạ, ual᷊ingu apang měmpạnědạ e piạ kawasane masaria.

²Iạ e sụsingking mẹ̌tahěndung taumata apan seng marěngụ naněntangu dunia ual᷊ingu i sire něngalembong kal᷊unsemahe wọu taumata apam bědam biahẹ̌.

³Kaiso něngalembong kal᷊unsemahe lai e ute taumata apam bẹ̌dang tawe naiwantelẹ̌, batụu i sire rem bědang tawe nakasilo karal᷊akisẹ̌ e nikoạ su dunia ini.

⁴Iạ masingkạ l᷊ai u taumata e němunara kereng kaihạ e, ual᷊ingu kětạeng sụsingkingu nakasilo lětạ u tawakal᷊ing lampunge. Kěbị ene e mang sia-sia mẹ̌sul᷊ungu munara měnẹ̌nahusu anging.

⁵Uade, sal᷊a kětạeng taumata wodo samatang mạiang mẹ̌tẹ̌tiningkondọ dingangu mạpakawalaʼm batangenge mateng lunusẹ̌.

⁶Aramanung ene e kahěngang, kaiso limembong kapiane arětạ mahal᷊i tẹ̌tapengangu karal᷊enehu naung sul᷊ungu mělẹ̌hal᷊ẹ̌ mawěhạ lẹ̌hal᷊ěkangu lima ruamběka ringangu měnẹ̌nahusu anging.

⁷Bẹ̌dang piạ l᷊ai sia-sia su ral᷊ungu pẹ̌bawiahẹ̌ ini.

⁸Piạ taumata mẹ̌bẹ̌biahẹ̌ batangeng hala tawẹ anạ e, arau anạ u sěngkataune. Manimbeng kerene, i sie mělẹ̌hal᷊ẹ̌ masěgadẹ̌ turusẹ̌-turusẹ̌ dingangu naunge tawe mawawul᷊ugu arětạ e. Waugi sai i sie mapạsěbangu liagha ringangu seng běgang kal᷊awọu ral᷊uasẹ̌ e? Ene e mal᷊ain sia-sia, ringangu sěmbaụ lulun pẹ̌bawiahẹ̌ masunsara.

⁹Duang katau e limembong kapiane wọu sěngkatau hala. Kereu i sire měmunara e, lětạ e sarung limembong kapiane.

¹⁰Kereu sěngkatau e manawo, apam bal᷊ine e wotonge mẹ̌tul᷊ung. Kaiso kereu sěngkatau e manawo, sěmbal᷊iau i sie e kawe sẹ̌sane, masilakạ bue i sie, batụu tawẹ u makatul᷊ung i sie.

¹¹Su hěbi matěho e ruang katau mẹ̌tẹ̌tikị mẹ̌dẹ̌dẹ̌duhẹ̌ e botongewe makakailang darung, kaiso makoạ kerea kamagengu tumbạu sěngkatau hala?

¹²Duang katau kụ mẹ̌dẹ̌daral᷊eng sěngkaral᷊enge wotongewe makasighe pěngangalo, arawe sěngkatau hala e mal᷊ighạ i kawatạ. Tal᷊i těllu lelang i pakasěmbaụ u putagẹ̌ e makětị mạběsụ.

¹³Tau kasiange wotonge maratu, dingangu sěngkatau kạtatahungkụ e wotonge mawensọ sol᷊ong bowong kal᷊aianeng. Kaiso kereu su umbure marangẹ datu ene tumanịu wodo waugu měnarimạ sasasa, tangu pẹ̌bawiahe limembong karal᷊akise wọu laumbaseng kasiang kaiso kawe pande.

¹⁵Takụ lẹ̌ěnnaěng u patikụ taumata su dunia ini e, tangu nakahěngangke iạ u wọu tal᷊oaran sire nal᷊ahẹ u piạ sěngkatau umbaseng kụ sarung měngaweng datu.

¹⁶Kawanua lẹ̌ahakenge wotonge mariadi tawe kinarekenang kal᷊awọe, kaiso sarạeng i sie rimal᷊eng, tawẹ apa reng makitarimakasẹ u mẹ̌tahěndung budine. Těngadẹ̌, kěbị e mang sia-sia mẹ̌sul᷊ungu mẹ̌nahusu anging.

¹⁷Pakatateghang bue kereu mapulu makoạ sarang Bal᷊em MAWU. Mạpiangbe makoạ sol᷊ong ene mẹ̌deạu měngěndung sul᷊ungu měngonggọu sasěmba kere kẹ̌koatengu taumata kụ longong e. I sire ene tawe makakoạ mapẹ̌dal᷊ahaedu sude kahěngang dingangu sude nẹ̌sal᷊a.