Read Sangir MĚNANASẸ̌ 5 Bible Online

MĚNANASẸ̌ 5 - Sangir bible

MĚNANASẸ̌ 5

¹Pẹ̌tiněnnako těntal᷊ang den ta nẹ̌bẹ̌bisara, dingangu kumbahang tumanị u masahawụ mẹ̌diandi su Mawu Ruata. I Sie ene su sorga, ringangu i kau ene su dunia, kụ pakakětạ bue su waweranu.

²Mangkeng piạ gěnggange, mangkeng kakạsariane makahombang ipi ral᷊akisẹ̌. Mangkeng kakạl᷊awọe wisara kakạl᷊awọe lai suměbang bawera tawe hinone.

³Kụ kereu i kau e mẹ̌kědo su Mawu Ruata e, pakasěhụ bue sěngapam botonge. I Sie tawe mapulu su taumata kụ mẹ̌tẹ̌těngkal᷊ongong. Ual᷊ingu ene pakasěhụ bue su kědonu.

⁴ Mạpiaěng be tawe mẹ̌kědo, sul᷊ungu mẹ̌kědo kụ tawe apakasěhụ.

⁵Kumbahangbe kal᷊awọu waweranu e makawarạdosa si kau, hakịu i kau e kate masihasa mẹ̌bera su manga imang mẹ̌tangkiang MAWU, u i kau e nẹ̌sal᷊a kědo. Kai waugu apa tangu mapal᷊angehu Mawu Ruata e hakịu i pakagholọ e lětạ u munaranu.

⁶Kerẹewe ipi mal᷊awọ e tawẹ apa mangal᷊ene, kerene lai mal᷊awọ su wisarane tawẹ gunane apa. Kaiso katakụben MAWU e.

⁷Abe kaherang kereu makasilo měngangawasa e manědạ tau kasiang, měmul᷊aho hakẹ̌ i sire ringangu tawe měngonggọu kạadilẹ̌ e si sire. Apan sawohị e kạdal᷊indung suapan těmbonange ringangu i rẹ̌dua e lẹ̌ěllungang u mapapangkatẹ̌ limembong karangẹ e.

⁸Sarang pẹ̌bawiahu ratu e mạngumbala su l᷊ětạewem pamaměnsạ.

⁹Taumata maanggang su roitẹ̌ e kai taumata tawe mawawatụ kapulune su roitẹ̌ e; taumata i pẹ̌pulune su arětạ e tawe masasaheng kal᷊auntu e. Kěbị e mang sia-sia.

¹⁰Mangkeng kạkakal᷊awọe kakakalạ u pẹ̌sěngkatau e mangkeng kakal᷊awọe taumata wal᷊ine e hinong gěllirangu kaěng. Tawẹ apa untune su taghuange, i sie kětạeng masingkạ u i sie kalạ.

¹¹Sěngkatau mělahal᷊ẹ̌ e wotongewe mariadi tawe nasukụ kaěnge, kaiso mẹ̌těngkahal᷊i i sie e wotongewe kahuntikilang ual᷊ingu ghụgiantang mal᷊ěnabẹ̌. Arawe taumata kalạ arětạ e kereng kal᷊awọe, hakịu i sie tawe kahuntikilang ual᷊ingu kal᷊inso naunge.

¹²Takụ i kẹ̌kasilo su dunia ini hal᷊ẹ̌ makạl᷊ahunsusa: Pẹ̌sěngkatau e měnẹ̌nampung arětạ baugu tempong kakawusange.

¹³Kaiso arětạ ene matạdise ual᷊ingu kinahinoěngu hombang, hakịben tạu i katěntang su manga anạ e.

¹⁴I kitẹ e nipěhěnding těntol᷊e; kerene lai i kitẹ e naněntang u dunia ini, tawe mẹ̌bawa apa-apa wọu kal᷊awọu wuan saghedi kitẹ e.

¹⁵ Enẹ e mambeng makạsusa nạung! I kitẹ e tamai kerẹewe su tempo ini i kitẹ e riměnta. I kitẹ e mẹ̌tẹ̌těngkasaghedẹ mẹ̌deạ u měnahusu anging, kụ apạ e pul᷊ise?

¹⁶Karěngụ u pẹ̌bawiahẹ̌ e, i kitẹ e mẹ̌tẹ̌těngkasusa, ghụgiantang, mạběnsing dingangu mạtẹ̌dụ su ral᷊ungu naung.

¹⁷Tangu nakahěngangke iạ e u kapiaěnge si kitẹ e ute kumaěng, manginung, dingangu mẹ̌teěng lěnnạu saghedi kitẹ karěngụeweng pẹ̌bawiahẹ̌ manimbụ e kụ nionggọu Ruata e si kitẹ; kụ seng ene e ral᷊engu pẹ̌bawiahi kitẹ e.

¹⁸Kereu pẹ̌sěngkatau e měnarimạu kakakalạ dingangu arětạ bọu Ruata e, kụ i sie ipakawala mẹ̌teěng kakakalạ ene, i sie hinong makạpěndang makitarimakasẹ dingangu mẹ̌teěng kal᷊awọu l᷊ěnnạ u saghede. Ene e mal᷊aing gaghěllị u Mawu Ruata.

¹⁹Duata e mal᷊aing napẹ̌papinunụ u naungu tau ene ringangu ral᷊uasẹ̌ e, tangu i sie semben tawẹ taghiawahe měngẹ̌ngěnnang kanimbụ u pẹ̌bawiahẹ̌ ini e.