Read Sangir MĚNANASẸ̌ 6 Bible Online

MĚNANASẸ̌ 6 - Sangir bible

MĚNANASẸ̌ 6

¹Saụ kapia takụ i kẹ̌kasilo tạ kạadile apạ e mẹ̌nẹ̌nědạ taumata su dunia ini e.

²Pẹ̌sěngkakuhuang Duata e mạngonggọu kakakalạ, lẹ̌adateng, dingangu arětạ su pẹ̌sěngkatau, hakịu semben tawẹ u l᷊ai i lẹ̌ěnninge. Kaiso Ruata e tawe iapakawalan sie makateěng kal᷊awọu ghaghěllị ene. Su sěmbẹ̌kane, taumata kụ tawe i kakiral᷊an Sie sarung makateěng kakakalạ ene. Kụ patikụ ene e sia-sia ringangu makạsusa naung.

³Manilaing sěngkatau e piạ anạ e mahasụ su kataune ringangu mẹ̌biahẹ̌ marěngụ hakịu makạdatingu umburẹ̌ manandụ, kaiso kamagengu i sie tawe makapěndang mal᷊unsemahẹ̌ dingangu tawe lai makahombang pěndal᷊ẹ̌bingang mapia e, tangu pěndangengku, rariọ buhu piněhěnding kụ nate e limembong kapiane pal᷊edu l᷊imane wọu tau ěndaị e.

⁴U waugu rariọ kạdodọ e tawe makoạbe apa-apa měnsang i sie e i pěhěnding arau tala; i sie e makoạ sol᷊ong dal᷊ungu kararěndung, mase lighạ kawul᷊enang.

⁵I sie tawe nakạsilo sěnnangu matangěllo, ringangu iạ e wědang lai tawe nakạhěngang kai apạ e pẹ̌bawiahẹ̌ ini e, hakịu i sie makaral᷊okawe tawẹ sungkal᷊ange.

⁶Dingangu ene e limembombeng kapiane wọu taumata kụ nẹ̌biahẹ̌ dua hasụ su taunge, kaiso tawẹ běke reng mal᷊unsemahẹ̌. Kai wal᷊inewe i rẹ̌dua e mal᷊ain nakoạ sol᷊ong tampạ mẹ̌sul᷊ung ngae?

⁷Taumata měhal᷊ẹ̌ e kětạeng baugu kumaěng, kaiso i sie tawẹ běke reng mạbul᷊ugẹ̌ e.

⁸Kụ apạ e untune su taumata pelesa e i wanding su taumata wodo e tangu? Apawe gunane kereu taumata kasiang e lulune mapia su tal᷊oarang kawanua?

⁹Kěbị ene e sia-sia mẹ̌sul᷊ungu tawakal᷊i měnẹ̌nahusu anging. Mapiawe i kitẹ e seng mawul᷊ugu apang piạ e sul᷊ungu i kitẹ měngkai lụěnningu limembong kal᷊awọe lai.

¹⁰Kal᷊awọu sạbarang sem piạ e, sem piạ nạung dokeng marěngụ. I kitẹ masingkạ u taumata e tawe makarendehẹ̌ taumata limembong katoghase wọi sie e.

¹¹Mangkeng kakạděngụ e i sie rumendehẹ̌, mangken tawẹ mangal᷊ene kal᷊awọu wawerane, katewe mundangu i sie tawe makareạ untune apa-apa.

¹²Kereapa wue taumata makakasingkạ u apang kapiaěnge si sie su pẹ̌bawiahe manimbụ e ringangu tawẹ gunane, dingangu mạpaghohẹ̌ kere kěngkau? Kereapa sěngkatau e makaěnna apa sarung mariadi su dunia ini sarangke i sie e sen tawẹdise?