Read Sangir MĚNANASẸ̌ 7 Bible Online

MĚNANASẸ̌ 7 - Sangir bible

MĚNANASẸ̌ 7

¹ Areng mapia e limembong kapiane wọu l᷊ana arěgane marangẹ e; ringangu ěllom papate e limembong kapiane wọu ěllong kal᷊aiwantelẹ̌.

²Ěndokangbe makoạ sol᷊ong bal᷊en susa e sul᷊ungu sol᷊ong tampạ u sal᷊iwang. U i kitẹ e harusẹ̌ hanesẹ̌ mẹ̌tẹ̌tahěndung u papate e mạngampal᷊ẹ̌ apan taumata e.

³Susa naunge limembong kapiane wọu ral᷊ẹ̌ge. Maning gati e mal᷊uẹ̌, asal᷊u naunge mal᷊enehẹ̌ bue.

⁴Taumata wodo e sěntiniạ mang měnẹ̌nahusu ral᷊uasẹ̌, arawe taumata pelesa e sěntiniạ mẹ̌sẹ̌sipiru papate e.

⁵Mapiawe sasaěngu taumata mapia sul᷊ungu raloěngu taumata makětị makaěnna.

⁶Lẹ̌gen taumata l᷊ongong e tawẹ mangal᷊ene, kere tingihu kuhangkang nikaěngu putung.

⁷Pěngangakal᷊u taumata pelesa e, ute kai kakanoạu l᷊ongong; kereu taumata měnarimạ u sasorokẹ̌ e ute naghoghahẹ̌ sipirange.

⁸Mapiawe seng su pěngěnsueěngu munara e sul᷊ungu wuhụ e manětạ; mapiawe pakasabarẹ̌ sul᷊ungu tumanịu l᷊umesạ.

⁹ Abe kasasahawụ mẹ̌bawal᷊ětohẹ̌ e; tumbạeweng taumata longong e mẹ̌děndesọ u une.

¹⁰Kumbahangbe makiwal᷊o u, ”Unụ e nạung tempo kạngerẹ e limembong kapiane wọu tempo orasẹ̌ ini e?” Kětạeng taumata longong e makiwal᷊o kerene.

¹¹Taumata wiahẹ̌ hinong pelesa; arěgang kapelesa e mẹ̌sul᷊ungu pusakạ;

¹²mẹ̌sul᷊ung lai ringangu roitẹ̌ gaghěllị tạ sungkal᷊ene apa. Něngalembọete wue kasingkạ mạanung kapelesa! I saing mạnaghuange sarung masal᷊amatẹ̌.

¹³Tatingangko wue munaran Duata. U i sai wue makatul᷊idẹ̌ apan niwengkọ u Ruata e tangu?

¹⁴Kụ pakaral᷊uasẹ̌ kereu i kau e piạ mal᷊unsemahě. Kaiso kereu i kau e hombangengu silakạ, abe kiwul᷊e u Mawu Ruata e měngonggọ i rẹ̌dua kěbị. I kitẹ e wěga wue měnsang apa nariadi tuhụ e.

¹⁵Pẹ̌bawiahẹ̌ku e tawẹ gunane, arawe karěngụ u pẹ̌bawiahẹ̌ku e takụ i kẹ̌kasilo ute pira-pira ini: Pẹ̌sěngkakuhuang e tangu taumata mapia e mạbinasa; manimbe i sie maagimatẹ̌. Kạdingạ taumata ral᷊akisẹ̌ e manandụ umbure, manimbe i sie hanesẹ̌ mẹ̌bẹ̌barạdosa e.

¹⁶Kumbahangbe tumanịu mapia ringangu kumbahangbe lai tumanịu pelesa. Kaia gunane mẹ̌tumpatem batangeng?

¹⁷Kumbahangbe lai tumanịu ral᷊akisẹ̌ arau tumanịu longong. Baugu apa tangu mate wědang bal᷊ine tempone?

¹⁸Pẹ̌tihọbeng hal᷊ẹ̌ darua kanini e. Kereu i kitẹ mạtakụ u Mawu Ruata e nal᷊ahẹ u i kitẹ e makareạbe pul᷊ise mapia.

¹⁹Kapelesa e makakoạbe taghuange limembong mahuagatẹ̌, sul᷊ungu i sire měngangawasa mapul᷊ong katau su soa sěmbaụ e.

²⁰Su dunia ini e tawẹ apa taumata nasukụ; tawẹ apa kụ hanesẹ̌ mẹ̌kẹ̌koạ mapia e ringangu tawẹ bẹ̌ke kụ tawẹu nẹ̌dẹ̌dosa e.

²¹Abe kapulu rumaringihẹ̌ taghunalangu mohong, i saiwe masingkạ u i kau e lẹ̌aneěngu sěngkatau mẹ̌tatangkiang.

²²I kau hala e mal᷊aing makạhěngang u taumata wal᷊ine e wọu l᷊ai lẹ̌aneěngu.

²³Kěbị ene takụ bẹ̌banikatengu kapelesaku e. Kaiso mangken takụ dẹ̌deakeng kapelesa ene e, mangkeng kakạdaune i sie e wọu anuku.

²⁴I sai makahombang mangal᷊em pẹ̌bawiahẹ̌ ini e? Tumanịu maral᷊ung pěngěnnaěnge!

²⁵Kaiso iạ e maamumang měngěndung dingangu mẹ̌deạ kasingkạ, tadeạu makahombang kapelesa ringangu sasimbangu su kal᷊awọu kakiwal᷊o e. Iạ e mẹ̌tawakal᷊i měngěnna u rosa e kai karal᷊ongong, dingangu karal᷊akisẹ̌ e kai lẹ̌ol᷊angeng.

²⁶Takụ kinareạ u wawine e kai něngalembong kapaị e wọu papate. Kakěndagu wawine e kai mẹ̌sul᷊ungu ral᷊ombo ringangu sedẹ kụ seng kạdariahi i pěnamẹ kinaěnge. Ral᷊ahěkụ e kai mẹ̌sul᷊ungu wěntung i pěhakụ masěgadẹ̌. Taumata kụ mẹ̌koạ kapuluʼm Mawu Ruata e mal᷊iwirẹ̌ bọu sedẹ e, arawe taumata warạdosa e nal᷊ahẹ u sarung i tawenge.

²⁷Kakělla angkuěngu wawerang Mẹ̌tatiněnna e: Kěbị ene e sen takụ pinẹ̌sombang, piạ e sěngkal᷊empang tambaěngu sěngkal᷊empang takụ pẹ̌dẹ̌deakeng sasimbange.

²⁸Bẹ̌dang lai takụ dẹ̌deakeng manga sasimbange wal᷊ine, kaiso wẹ̌dang tawe nakạumal᷊ẹ̌. Wọu tal᷊oaran sěhiwu su kataune, takụ kinareakeng sěngkatau esẹ takụ lẹ̌adateng. Kaiso su tal᷊oaran sire e tawẹ apa wawine kụ botonge takụ arẹ̌gaěng.

²⁹Kětạeng ini e takụ kinaěbakeng: Duata e mapakạdiading kitẹ e su sarạ e ringangu wiasa. Kaiso kawe i kitẹ hala e mapẹ̌tẹ̌tasibung kitẹ e ringangu mẹ̌kẹ̌kakal᷊ikụ e.