Read Sangir MĚNANASẸ̌ 8 Bible Online

MĚNANASẸ̌ 8 - Sangir bible

MĚNANASẸ̌ 8

¹Apạ e mal᷊uasẹ̌ taumata pelesa e. I sie masingkạ u sasimbahu waugu patikụ sạbarang. Kapelesa e makạdiadin sie lụhěmming u ral᷊uasẹ̌, hakịu ghatine e měngkai hanesẹ̌ matualagẹ̌.

²Pakararingihẹ̌ bue mạengu ratu e mẹ̌parenta, dingangu kumbahang měngkai mẹ̌sẹ̌sasahawụ mẹ̌kědo su Mawu Ruata.

³Datu e wotongewe mẹ̌koạ kapulune hala, mạengu i sie kawe tawe nihino ute, mapiawe pẹ̌těngkaraun sie.

⁴Datu kụ piạ pěhěngkinge, ute tawẹ u wahani rumendehẹ̌ e!

⁵Taumata kụ mararingihẹ̌ si sie e, sarung mal᷊enehẹ̌ dingangu tạ konsange apa; taumata pelesa e masingkạ u angerẹ dingangu kereapa tumuhụ datu e.

⁶Baugu patikụ sạbarang e piạ tempone ringangu piạ dal᷊enge hala, kaiso mahal᷊i wue kahěnganeng i kitẹ e.

⁷Tawẹu sarang sěngkatau l᷊ai masingkạ u kai pěbawiahẹ̌ apa měngẹ̌ngampal᷊ẹ̌ e, ringangu tawẹ u makawera u kai apa sarung mariadi.

⁸Tawẹu sarang lai sěngkatau makakědang arau měnohọ papatene. Ene e hal᷊ẹ̌be tawe i kateghang, dingangu i sie man tawe mal᷊iwirẹ̌ bọu ene e, manilaing piạ akal᷊e ringangu piạ pẹ̌kakal᷊ikụ e.

⁹Kěbị tamai ini e takụ kinasilo su tempon takụ tẹ̌tinganeng kal᷊awọu apam mạdiadi su dunia. Kạdingạ taumata e mẹ̌pẹ̌pakẹ u kawasane waugu mapakasilakạ u sěndinganenge.

¹⁰Bọu nạung takụ kinasilo taumata ral᷊akisẹ̌ e nate ringangu nilěbing. Kaiso piạ e nạung taumata napul᷊ẹ bọu pěndal᷊ẹ̌bingange, i sire e nẹ̌dalo si sie su soa pinẹ̌koatenge ral᷊akisẹ̌ ene. Kụ ene tangu mal᷊aing sia-sia.

¹¹Unụ e kereng kal᷊awọ e taumata mẹ̌koạ dal᷊akisẹ̌ e tangu? U hukumang e wal᷊inewe měngkai lighạ i nẹ̌nawo.

¹²Manilaing mahasụ haghine karal᷊akisẹ̌ e koatengu sěngkatau warạdosa e, i sie e man tatapẹ̌ biahẹ̌ dingangu sarangkewe umbure manandụ. Uade i saing mararingihẹ̌ su Mawu Ruata e, nal᷊ahẹ u pẹ̌bawiahe e apạ e mal᷊owọ-l᷊owọ.

¹³Arawe taumata ral᷊akisẹ̌ e makahombang susa l᷊awọ. Pẹ̌bawiahe mal᷊ighạ mapaghohẹ̌ kere kěngkau. I sie sarung mate wědang umbure makudạ ual᷊ingu i sie tawe tumatuhụ su MAWUne.

¹⁴Kaiso kěbị ene e mang bisara tạ gẹ̌sine samatang. Kakěllạ e měnsang apa nariadi su dunia: Piạ taumata maimang e nihukung tabidạu taumata duruhaka, piạ taumata ral᷊akisẹ̌ nihukung kere taumata maimange. Kụ ene e mal᷊aing sia-sia.

¹⁵Nimbụ e si siạ taumata e harusẹ̌ pakal᷊uasẹ̌. U su ral᷊ungu pẹ̌bawiahe su dunia e tawẹ dal᷊uasẹ̌ bal᷊ine si sie su l᷊iung kumaěng, měnginung dingangu měmpahul᷊uasẹ̌. Tumbạeng ene e i katemang su tal᷊oarangkewen saghede, karěngụeng pẹ̌bawiahe nionggọ u Ruata e si sie.

¹⁶Piạ iạ e mẹ̌tẹ̌tawakal᷊i makahombang kapelesa e, kutẹu tatinganengku e kal᷊awọu apang mạdiadi su dunia ini, tangu nakahěngangke iạ u manimbe i kitẹ e mẹ̌bẹ̌bangkuadẹ̌ ěllo hěbi tawẹ kirul᷊ene,

¹⁷i kitẹ e tawe makatohạ měngěnna kakanoạ u Mawu Ruata. Maning kereapa i kitẹ e mẹ̌tawakal᷊i, kai tawe makarating i kitẹ e makahěngang. Taumata pande e měngaku u i sie masingkạ, kaiso tumuhụ hinone i sie e wěga wue.