Read Sangir MĚNANASẸ̌ 9 Bible Online

MĚNANASẸ̌ 9 - Sangir bible

MĚNANASẸ̌ 9

¹Kěbị ene takụ tẹ̌tiněnnaěng pakapia. Duata e měngatorẹ̌ pẹ̌bawiahu taumata kụ mapia e ringangu pelesa, saral᷊aing kamagengu tau ene mẹ̌bẹ̌binsị arau tụtal᷊ěntụ. Tawẹ u masingkạ apa sarung mariadi su tempo ramahi.

²Kahěngang, pẹ̌bawiahẹ̌ kụ mẹ̌sul᷊ung lụhombang suapan taumata: Taumata matul᷊idẹ̌ arau taumata tạ katul᷊ide, taumata mapia arau taumata ral᷊akisẹ̌ e, taumata wurẹ̌si arau taumata mal᷊amuhụ, taumata měnẹ̌narakangu sasěmba arau tala. Taumata mapia e tawe limembom kapiaěng bọu taumata warạdosa, taumata nẹ̌salu e měngkate mẹ̌sul᷊ungu taumata tawe mapulu mẹ̌salu.

³Kụ mal᷊aing pẹ̌bawiahẹ̌ mẹ̌sul᷊ung humombang si sire kěbị. Kụ ene kai hal᷊ẹ̌ sěmbaụ makạkěndung kerẹewe lai patikụ apam mạdiadi su dunia. Karěngụ u pẹ̌bawiahe naungu taumata e mạpenẹ u karal᷊akisẹ̌, dingangu tiněnnane e mal᷊aing napenẹ u karal᷊ongong. Kụ sěngkianu i sie e naminsul᷊u singongone.

⁴Arawe karěngụ u singongo e wědang su wadang, karěngụ u ene e piạ pělẹ̌harapeng. Kai wal᷊inewe asu ngae mẹ̌bẹ̌biahẹ̌ l᷊imembong kapiane wọu singa kụ tawẹ singongone?

⁵Mẹ̌těngkahal᷊i, taumata wiahẹ̌ e masingkạ u papatene mạngampal᷊ẹ̌, arawe taumata nate e wěgaweng apa-apa. Baugi sie e tawẹ apa tatendenge arau tatahul᷊ěndinge, dingangu arenge e seng nipakawul᷊e.

⁶Pěndangu tatal᷊ěntụ, pẹ̌bawinsị ore lai abul᷊ine, patikụ e seng nate ringange. I sie selain tawe něngal᷊ạ bahageange apa-apa su kěbị apang mạdiadi su dunia.

⁷Hotede, pěmpẹ̌kaěngke ringangu pěmpahul᷊uase, pěmpanginungke anggori kamene e su ral᷊ungu ral᷊uasẹ̌ e. Duata e tawe mẹ̌kabaratang, katewe mundangu i Sie mapakawala.

⁸Mal᷊owọko ghatinu e měngkai matualagẹ̌ dingangu mal᷊uasẹ̌.

⁹Apakawatụko pẹ̌bawiahu e ringangu kawingu i kẹ̌kěndagẹ̌ e karěngụewem pẹ̌bawiahu kụ sia-sia e, kụ nionggọu Ruata e si kau su dunia. Apakawatụko pẹ̌bawiahu e apang kal᷊aěllo manịeng tawẹ gunane. U wawaehẹ̌ liaghan saghedu e kětạembeng ene samatang.

¹⁰Koạ e kal᷊awọu munaranu e ringangu kasěllahu toghasu e. U kai sarung tawẹ apa tiněnna arau munara. Tawẹ apa kasingkạ dingangu kapelesa su wanuan taumata nate. Ringangu seng tamai kerene sarung dal᷊engangu e.

¹¹Su dunia ini piạ lai takụ i kasilo: pẹ̌tatanung e, wal᷊inewe hanesẹ̌ kauntungangu tumatal᷊ang mahawesẹ̌, pẹ̌sasekẹ e tawe měngkai hanesẹ̌ kauntungangu taumata matoghasẹ̌. Taumata pelesa e tawe měngkai hanesẹ̌ makahombang hambake. Dingangu taumata pande e tawe měngkai hanesẹ̌ makahombang kakakalạ. Kerene lai manga masasingkạ e tawe měngkai sěntiniạ timeleng. Batụu waẹbe i sai tawe mal᷊iwirẹ̌ bọu kahombangengu soe.

¹²Taumata e wěga wue angerẹ tempone marěntae. Mẹ̌sul᷊ungu manụ u winalangeng masedẹ dingangu kinạ kal᷊omboěng, kerene lai taumata e kahombangengu silakạ su tempone tawe kahěnganeng.

¹³Tuhụ e ini e piạ u nariadi kereapa taumata e měngarěgang kapelesa e:

¹⁴Piạ soa kạdodọ sěmbaụ kụ mahal᷊i taumata tumanạ e. Piạ sěhěllo sěngkatau ratu masaria e riměnta něnekẹ soa ene. I sie něliwung dingangu mẹ̌dẹ̌dariahi měněnehẹ̌ mesele.

¹⁵Su soa ene piạ sěngkatau kasiang pelesa. I sie nakaambang soa ene. Kaiso ual᷊ingu i sie kawe kasiang tangu budine mapia e mal᷊ighạ-l᷊ighạ kinawul᷊enang dingangu tawẹ u sarang sěngkatau lai nakatahěndung si sie.

¹⁶Kụ kahěngang bue suěbạku e kapelesa e něngalembo wọu katoghasẹ̌. Maningbe kerene, kapelesan taumata kasiang e tawe laarěgaěng. Kal᷊awọu wawerane e tawe masasuẹ̌ suěndumang.

¹⁷Mapiawe wawera matatěmudẹ̌ bọu sěngkatau piạ kasingkạ e sul᷊ungu wawansagu sěngkatau měngangawasa e su tal᷊oarang komol᷊angu taumata longong.

¹⁸Kapelesa e limembong piạ gunane wọu aghidẹ̌, arawe wawirụ sěntědọ e makagholọ susu sěngkuring.