Read Sangir KAKANTARỊ PATEBONE 2 Bible Online

KAKANTARỊ PATEBONE 2 - Sangir bible

KAKANTARỊ PATEBONE 2

¹Iạ e tumbạem bungang rosi wọu Saron, bungangu ghal᷊oghong su manga wal᷊ane.

²Mẹ̌sul᷊ungu bungangu ghal᷊oghong su wěllạu rěmpugẹ̌ mal᷊ahoro, kerene i tatuno naungku e su wěllạu manga sangiang.

³Kere kalung apel su wěllạu manga kakaluang su kěhu, kerene i tatuno naungku e su wěllạu manga kal᷊endesang. Iạ e lẹ̌lahimpuluangu mẹ̌těngkaěllung su al᷊unge, manga wuane temange marěngang.

⁴Niparingange iạ e sarang huangu sal᷊imbang, timonaʼm matane si siạ e napenẹ u lundangu naung.

⁵Bahansangeko iạ e ringangu akẹ u wuang anggorẹ̌ marěngang, bal᷊insahẹ̌ko iạ e ringangu wuang apel, watụ u iạ e kai masakị u rụdareạ i kau.

⁶Limane kaihi e mạnuilẹ̌ těmbọku, limane koaneng e pělẹ̌lahěkụ siạ.

⁷Pẹ̌diandiko, ei manga sangiangu Yerusalem, baugu manga rusa ringangu manga kijang su rahami, u i kamene tawe měnahaghe lundangu naung, sarangkewe i sie mawatụ kapulune.

⁸Pẹ̌daringihẹ̌ko, Ikẹ̌kěndagẹ̌ku e nasongo! I sie mẹ̌sul᷊ungu pẹ̌gol᷊u rusa arau kijang. Mẹ̌kẹ̌kakěse su manga wawul᷊urange, mẹ̌pẹ̌paral᷊ingkidẹ̌ su manga wěntihe. Kakěllạ e, i sie rụdarisị su sěmbẹ̌kam meselẹ̌, dingangu matane mẹ̌pẹ̌paiwuhị; mẹ̌pẹ̌pahimang bọu wowon těba.

¹⁰Ene wědị i kẹ̌kěndagẹ̌ku e mẹ̌bisarang iạ. Děntạ e i holẹku, mahịe i andịku!

¹¹Kakěllạ e musungu matěho e seng napaghohẹ̌, musungu tahiti e seng nal᷊iu.

¹²Su wedeng, manga bungang e seng němpěměsị; musungu měměbasẹ̌ e seng tempone; tingihu těkukurẹ̌ e seng kinaringihẹ̌ su wanuang kitẹ.

¹³Kalung ara e nanětạ e nẹ̌bua, kalung anggorẹ̌ e rimal᷊urụ e bungang e. Děntạ e polọku, mahịe i holẹku.

¹⁴Oi palumaku e su wěllạu manga watu, su pẹ̌kakěmbuniang su manga l᷊engehe matatigal᷊ụ, kiwuạko iạ e makasilo ghatinu, ringangu makaringihẹ̌ tingihu, batụu ghahịu e masadadạ, tingihu e mal᷊ěno.

¹⁵Samẹko manga longgoi ene, longgoi e rararodọ kụ makạgolọ baelu anggorẹ̌ e, u waelu anggori kami e bungange kapẹ̌sẹ̌sahěnsonge.

¹⁶I kẹ̌kěndagẹ̌ku tataghuanengku, kụ iạ e tataghuanenge, i sie něngahạ manga dombane su tal᷊oarang manga bungangu ghal᷊oghong

¹⁷sarangke timiụ e rahěndongu mal᷊ukadẹ̌ kụ nakaghěngging kararěndungu hěbi e. Pẹ̌sul᷊ẹ e i kẹ̌kěndagẹ̌ku e, kere kijang, al᷊ingkai pẹ̌gol᷊u rusa su wawul᷊urangu Beter.