Read Sangir KAKANTARỊ PATEBONE 3 Bible Online

KAKANTARỊ PATEBONE 3 - Sangir bible

KAKANTARỊ PATEBONE 3

¹Su apang hěbi e, su raral᷊okaěngku, su ral᷊ungu ipiku e iạ mẹ̌dẹ̌deạ polọku; takụ dẹ̌deakeng i sie, kaiso kawe sia-sia.

²Iạ mapulu mẹ̌bangung kụ mělikụ soa, mangumpěpidẹ̌ kal᷊awọu ral᷊eng dingangu manga wěhịe. Iạ mapulu mẹ̌deạ si tatuno naungku; takụ deakeng i sie kaiso kawe sia-sia.

³Iạ e pinẹ̌sombangu lukadu soa, kụ takụ pinakiwal᷊oěng, ”I kamene e reng nakasilo si tatuno naungku e?”

⁴Buhụewe napal᷊usẹ̌ bọu anun sire e, takụ pinẹ̌sombang i tatuno naungku. I sie takụ niumpaedẹ̌, dingangu tawe takụ nipěllọ sarang takụ niwawa su wal᷊eng ninangku, su ral᷊ungu wal᷊eng tau něhěndingu iạ.

⁵Pẹ̌diandiko manga sangiangu Yerusalem, baugu manga rusa ringangu manga kijang su rahami, u i kamene mamben tawe měnahaghe lundangu naung, sarang i sie mawatụ kapulune.

⁶Kaia ramahi wọu kěhu l᷊inggi, al᷊ingkai tatiowol᷊u tipu? Běngine mẹ̌sul᷊ungu mur dingangu kamania, dingangu manga pupurẹ̌ mawawěngi wọu mal᷊ahumbalụ.

⁷Kakělla, ene kai papasanengang si Salomo, nilikutangu taumata mal᷊ahasa ěnnungu pul᷊o su kataune, apang mal᷊ahasang Israel

⁸kụ apang narapal᷊ẹ̌ su pẹ̌seketang. I sire kěbị němpěngehẹ pedaʼn sire su kal᷊uwaeng i sire ringangu sạdia tumatěngo pěngangalo su tempong hěbi.

⁹I Salomo nẹ̌koạ pěmamasaěng si sie sěmbaụ, bọu kalu kapapiaěnge.

¹⁰Rihine nikoạ bọu sal᷊aka, ringangu pěnanandehange wọu wul᷊aeng. Kal᷊aianenge awạ e kamumụ, nisujị dingangu naung mal᷊uasẹ̌ kahiang manga sangiangu Yerusalem.

¹¹Pěmpahunsěbangko ei manga sangiangu Sion tatinganeko Ratu i Salomo dingangu makotane kụ nisangẹ i ninange, su ěllong pẹ̌kakawinge, su ěllong i sie limuasẹ̌ e.