Read Sangir KAKANTARỊ PATEBONE 4 Bible Online

KAKANTARỊ PATEBONE 4 - Sangir bible

KAKANTARỊ PATEBONE 4

¹I kau e maholẹ, ikẹ̌kěndagẹ̌ku, mamben těngadẹ̌ i kau e maholẹ. Matanu su sěmběkan tatakạ gati e al᷊ingkai paluma e; utạ u e al᷊ingkai ghapaěngu kambing kụ mạhunděsung bọu manga wěntihu Gilead.

²Isinu e mahumbira kere ghapaěngu domba kụ buhu kakul᷊ụ dingangu wuhu rarenọ; mẹ̌pẹ̌parẹ̌ kere manga anạ u domba hindua, kal᷊ingu sěmbaụ kai man tawẹ u nailang.

³Biwihu e al᷊ingkai pita mahamụ sěmběsụ, o kawe mal᷊ěnggihẹ̌ mohongu. Pipịu e al᷊ingkai wuan dělima sěmběka, kạdal᷊indung su sěmběkan tatakạ gatinu.

⁴Lehẹu e al᷊ingkai měnaran Daud, kụ nipětị baugu pěnděpehang aghidẹ̌. Kalongu e tạ beong-beonge kěllung sěhiwu su waụ e, pal᷊ọ-pal᷊om bawahani e kěbị.

⁵Susunu e al᷊ingkai anạ u rusa rarua, anạ u kijang hindua kạkaěnge rěmpugẹ̌ su wěllạu manga bungangu ghal᷊oghong.

⁶Iạ e mapulu sarang bawul᷊urangu mur, sarang bul᷊udu kamania, sarang tatiụ u rahěndongu mal᷊ukadẹ̌, kụ mạngěnsue kararěndungu hěbi.

⁷I kau e mal᷊ěnggihẹ̌ tawẹ sihinge, holẹku, kụ tawẹ kạdionge turạ e wadange.

⁸Bọete i kitẹ lumintụ bọu Libanon, ei kaghiangku, bọete i kitẹ lumintụ bọu Libanon. Lintụ e wọu pusigu Amana, wọu pusigu Senir dingangu Hermon, tampạ katatanakengu masang kambal᷊ọ dingangu singa.

⁹I kau e něnaweng naungku e, polọ, kaghiangku, i kau e něnaweng naungku e kahiam pěmamandanu, piạ paramatane mal᷊ěnggihẹ̌ su kalongu e.

¹⁰Apạ e makạbirahi kakěndagu, polọku, kaghiangku, limembong kawirahine marau wọu anggorẹ̌. Lananu e rụdal᷊uru mawěngi, mạmal᷊iu kal᷊awọu haghin dampa.

¹¹Maudupẹ̌ baweranu e kaghiangku, mẹ̌sul᷊ungu madu sahị dingangu susu. Pakeangu e mawěngi kere kawěngim Bul᷊udu Libanon.

¹²I kẹ̌kěndagẹ̌ku e kai rahami nitěndakengu meselẹ̌, dahami nimeselang, simbul᷊ẹ̌ e mạl᷊ahěping.

¹³Paị sene nituwoěngu manga kalung dělima, ringangu manga wua-bua kụ mal᷊ahuwusẹ̌. Bungangu lahamụ kanuku, dingangu narwastu,

¹⁴narwastu, kunị, kalu manisẹ̌ dingangu tuwu, dingangu kal᷊awọu haghing kalung kamania. Mur dingangu kalu mawěngi, dingangu kal᷊awọu haghin dampa pinile.

¹⁵Simbul᷊ẹ̌ su rahamiku e měnẹ̌nokal᷊u akẹ biahẹ̌ kụ lụelehẹ̌ bọu Libanon!

¹⁶Pẹ̌bangungke angingu sawěnahẹ̌, děntạ e anging u timuhẹ̌! Tiụ e sarang dahamiku, tadeạu wěngine rumal᷊uru. Mal᷊umbạko i kẹ̌kěndagẹ̌ku e ruměnta sarang dahamine, ringangu kumaěng manga wua-buane kụ mal᷊ahuwusẹ̌.