Read Sangir KAKANTARỊ PATEBONE 5 Bible Online

KAKANTARỊ PATEBONE 5 - Sangir bible

KAKANTARỊ PATEBONE 5

¹Iạ simongo su waelẹ̌ku e, polọ, kaghiangku, takụ tampungang mur dingangu manga rampaku, takụ kanengang sal᷊ehu katiupang dingangu maduku, susu takụ inungang dingangu akẹ u anggorẹ̌ku. Ei manga hapị, pěmpẹ̌kaěngke ringangu pěmpanginungke, pěnginungke sarang miwukangu pẹ̌kakěndagu pẹ̌tatal᷊ěntụ.

²Iạ e kinahumperongang kai naungku e mahěkosẹ̌ bue. Daringihẹ̌ko i kẹ̌kěndagẹ̌ku e měnẹ̌nengkelẹ̌ tukadẹ̌. Topeko tukadẹ̌ e polọ! i kẹ̌kěndagẹ̌ku, palumaku, tatuno naungku, těmbọku e naholo kahian namuhẹ̌, utạku e napenẹ u tědọ u namuhu tempong hěbi.

³Pakeangku e seng takụ niluạ; kụ delaing mẹ̌pakẹ u apa tangu iạ e? Laedẹ̌ku e sen takụ niuhasẹ̌, kụ kai apạ e relain takụ lamuhukang tangu?

⁴Mamben tụtaghiawahẹ̌ naungku e ual᷊ingu i kẹ̌kěndagẹ̌ku e měngẹ̌ngumpaedẹ̌ duhim pintu.

⁵Tangú nẹ̌bangungke iạ e mẹ̌deạ u manope tukadẹ̌ baugu i kẹ̌kěndagẹ̌ku e. Mur tụtědọ bọu limaku ringangu manga tal᷊imědoku, mělẹ̌holo pěngangumpaedangu papal᷊e tukadẹ̌ e.

⁶Iạ měnope tukadẹ̌ baugu i kẹ̌kěndagẹ̌ku e, kutẹu i sie kawe seng nạung nẹ̌sul᷊e apidu rimal᷊eng. Iạ e kai mẹ̌kẹ̌karalọu tingihe; kụ takụ deakeng i sie, kai kawe sia-sia. Takụ kuiang arenge, kaiso i sie tawe simimbahẹ̌.

⁷Iạ e pinẹ̌sombang u apang lukadu soa; i sire němpěmẹ̌bahẹ̌ si siạ, sělendangku e nial᷊ạ i sire ringangu sihasa.

⁸Pěmpẹ̌diandịe, ei manga wawineng Yerusalem, kamagengu i kamene mẹ̌sombangu i kẹ̌kěndagẹ̌ku e, apaul᷊ịko si sie, u iạ e kai masakịu rụdareạ.

⁹Unụ e i tatuno naungu e něngalembo wọu manga i tatuno naung bal᷊ine tangú? Ei mahuala kaholekange? Kai i tatuno naungu e něngalembo wọu manga i tatuno naung bal᷊ine, hakịu i kau e něngoro si kami e pẹ̌dẹ̌diandi e?

¹⁰I tatuno naungku e masadadạ dingangu mal᷊epatẹ̌, nakoạ kapiaěnge wọu tal᷊oarang mapul᷊o hiwu su kataune.

¹¹Těmbọ e mẹ̌sul᷊ungu wul᷊aeng, kụ bul᷊aeng sahị, utạ e wěmběladẹ̌ dingangu maitung, kere kaitung u manụ gaga.

¹²Matane al᷊ingkai paluma su simbul᷊u akẹ, paluma narenọu susu, naiang su wiwihu talagạ.

¹³Pipị e al᷊ingkai wedengu rampa mawawěngi, biwihe al᷊ingkai bungangu ghal᷊oghong kụ mạnẹ̌dọu mur tutune.

¹⁴Limane mal᷊ěnggihẹ̌, sinsinge wul᷊aeng, napenẹ u paramata, badange al᷊ingkai sunge nilẹ̌gahengu watu wirụ.

¹⁵Laede al᷊ingkai manga rihing marmarẹ̌ uhisẹ̌, dingangu pal᷊edu laede al᷊ingkai wul᷊aeng sahị. Bal᷊akane mal᷊ěnggihẹ̌ kere wawul᷊urangu Libanon, dingangu maholẹ kere kalung aras.

¹⁶Apạ e mararěngang bisarane, dingangu patikụ sạbarang e makạl᷊ahimpulu si sie. Kerene kakakoạ i tatuno naungku ringangu hapịku, ei manga wawineng Yerusalem!