Read Sangir KAKANTARỊ PATEBONE 6 Bible Online

KAKANTARỊ PATEBONE 6 - Sangir bible

KAKANTARỊ PATEBONE 6

¹Nakoạ sarang apa i tatuno naungu e, ei mahuala kaholekange? Nakoạ sarang apa i tatuno naungu e, mẹ̌deạu i kami e mẹ̌deạ dingang?

²I tatuno naungku e nakoạ sarang bedenge, bẹdengu manga rampa mẹ̌deạ u mělukadẹ̌ manga dombaku e su wedeng, ringangu měnipo manga bungangu ghal᷊oghong.

³Iạ e kai tataghuaneng i tatuno naungku, ringangu i sie tataghuanengku, i sie kai mělukadẹ̌ manga domba su tal᷊oarang manga bungangu ghal᷊oghong.

⁴I kau e masadadạ, i holẹku, kere kaholẹ u soang Yerusalem, kere kal᷊ěnggihu soang Tirzah. I kau e apạe makạbinsana, kere manga wuntuangu sordado ringangu manga wanehane.

⁵Pẹ̌bihungkong gatinu wọu anuku, u pěmamandanu e makạbingọ si siạ. Utạu e al᷊ingkai ghapaěngu kambing kụ dụděsung u manga wěntihu Gilead.

⁶Isinu e mawira kere ghapaěngu domba kụ buhụ e nikul᷊ụ dingangu nirenọ; dingangu mẹ̌pẹ̌paparẹ̌ kere manga anạu domba hindua, kụ tawẹu sarang sěmbaụ nailang.

⁷Pipịu e mẹ̌sul᷊ungu wẹ̌kam manga wuan dělima, kạbawuni su l᷊ikudu sloyeru.

⁸Manilaing piạ bokine 60 su kataune, ringangu rokạe 80 su kataune, ringangu manga mahuala mal᷊awọ-l᷊awọ,

⁹kaiso tumbạeng sěmbaụ palumaku, ilẹ̌ol᷊angku, anạ mang sěmbaụ tudẹ kẹ̌kapiaěng i ninange. Manga mahuala e makạsilo ringangu mẹ̌dẹ̌dalo si sie, manga woki ringangu manga rokạ e rụdal᷊inaụ i sie.

¹⁰I sai tangú i sie kụ diměnta al᷊ingkai tualagu mẹ̌běmbanaho, kere kal᷊ěnggihu wul᷊ang limangu, kere katualagu matangěllo e? I sie e kai makạbinsana, mẹ̌sul᷊ungu wuntuangu sordado ringangu manga wanehane.

¹¹Iạ e ruměnta su pinẹ̌suangengu lěhi, makạsilọ e manga mungkul᷊e su manga wimbaenge; měnsang ute kalung anggorẹ̌ kụ seng piạ mungkul᷊e, ringangu kalung dělima kụ seng nẹ̌bungang.

¹²Iạ e mẹ̌kẹ̌karalọu kakěndague, kụ al᷊ingkai mẹ̌kẹ̌karalọu sumake karetan sekẹ sěngkasake ringangu apang papuěng.

¹³Pěmpẹ̌sal᷊aiko, ei manga mal᷊ahualang Sulam, pěmpẹ̌tirin-těnungke tadeạu, i kami e rumal᷊inaụ. Unụe i kamene e mapulu měmanda si siạ, kụ iạ e kawe kạpẹ̌sal᷊aine su tal᷊oarang barisangu mẹ̌bawiala e?