Read Sangir KAKANTARỊ PATEBONE 7 Bible Online

KAKANTARỊ PATEBONE 7 - Sangir bible

KAKANTARỊ PATEBONE 7

¹O, mahuala maholẹ, masadadạ kahěngang laedu e piạ sandalẹ̌ e ene. Kolọu palangu e mẹ̌sul᷊ungu ral᷊ěgahẹ̌, karạdiahangu sěngkatau taumata tahal᷊anging.

²Puidu e mẹ̌sul᷊ungu lainumang mal᷊imbolong kụ tawe kakawusangu anggorẹ̌ kal᷊aukang. Tiangu e al᷊ingkai niěndukangu gandung, nilikutangu manga bungangu ghal᷊oghong.

³Buan susunu e al᷊ingkai anạ u rusa rarua, kijang hindua.

⁴Lehẹ u e al᷊ingkai měnaran sunge. Matanu e al᷊ingkai manga talagạ su Hesybon, maranin tukadu pasěllangengu Batrabim. Irungu e al᷊ingkai měnara su Wul᷊udu Libanon, kụ tụtatěngo saran soang Damsyik.

⁵Těmbọu e al᷊ingkai Wongkong Karmel; utạu e nipẹ̌sal᷊apidẹ̌ al᷊ingkai bungang awạ e, wol᷊ahẹ̌, makạbirahi sarangkutẹu sěngkatau ratu.

⁶Mambeng masadadạ maholẹ i kau e, i makạtuno naung su tal᷊oarang patikụ apang makạl᷊ahimpulu.

⁷Badangu e maholẹ al᷊ingkai kalung korma, buan susunu e ghopol᷊angu wuane.

⁸Iạ e lụěnningu maawị kalung korma ene, ringangu makahombang manga wuane. Karimạko wuan susunu e al᷊ingkai ghopol᷊angu wuang anggorẹ̌ e, singongonu e al᷊ingkai kawěnging buang apel,

⁹mohongu e marěngang al᷊ingkai akẹ u anggorẹ̌! Balạekere anggorẹ̌ ene e laelehe, sarang anung tatuno naungku e, kụ tawẹ pontode; ringangu makạbahansang pẹ̌kakakěndagẹ̌ e, saranglai waugu apang kụ kạpahuntikị e.

¹⁰Iạ e kai tataghuaneng i tatuno naungku, i sie e lụěnningu iạ e.

¹¹Bọete i kaduạ sarang bimbaenge, tatuno naungku, kụ mẹ̌tikị su rahami, su tal᷊oarang manga bungangu kalu rarodọ.

¹²Bọete i kaduạ deng mal᷊uka-l᷊ukadẹ̌ e sarang dahami tatuno naungku, kụ měmanda měnsang kalung anggorẹ̌ e seng piạ manga mungkul᷊e, dingangu manga bungange měnsang seng němesị; dingangu kalung dělima e měnsang seng piạ bungange. Hědo paịsene takụbe ionggọ kakěndagẹ̌ku e si kau.

¹³Kalung arakẹ̌ e mawěngi rarurune, su rěduhu tukadi kitẹ e piạ manga wuane mal᷊ahuwusẹ̌ e, kụ seng marěngụ nitipo ringangu lai apam buhu; ene e takụ niresọ si kau e tatuno naungku.