Read Sangir KAKANTARỊ PATEBONE 8 Bible Online

KAKANTARỊ PATEBONE 8 - Sangir bible

KAKANTARỊ PATEBONE 8

¹Ah, manga i kau e sěmpụ u tinaiku e, kụ bọu simusu si mamạku, nal᷊ahẹ u i kau e takụ děnguang kereu takụ i pẹ̌sombang su manga ral᷊eng, tawẹ apa kụ deng měhinakang si siạ.

²I kau e takụ bawaěng sarang bal᷊eng mamạku, tadeạu i kau e makatěntirowe si siạ. I kau sarung takụ i panginung anggorẹ̌ marěngang, dingangu akẹ u wuan dělima.

³Limanu kaihi e mạnuilẹ̌ si siạ, limanu koaneng e mělẹ̌lahěkụ si siạ.

⁴Pẹ̌diandiko, ei manga mahualang Yerusalem, u i kamene tawe sarung měnahaghe kakěndagẹ̌, sarang i sie mawatụ kapulune.

⁵Kai i sai tangú riměnta wọu wanua l᷊inggi e, kụ mạngunsarehẹ̌ si tatuno naunge? Takụ bangunang i kau e wawa su al᷊ungu kalung apel, tampạu e su gandongang dingangu piněhanạ.

⁶Apakakoạko iạ e wuan naungu, ariẹbe mělahěkụ si sai-sai su l᷊iung iạ e; batụu kakěndagẹ̌ ene e kere katoghasu papate, ringangu abul᷊i e mẹ̌kẹ̌kawasa kere papate. Děllị e al᷊ingkai rěllị u putung, kụ mẹ̌dẹ̌daraẹ marasai.

⁷Akẹ mal᷊awọ e tawe makaumal᷊ẹ̌ mapakintal᷊u pẹ̌kakěndagẹ̌ e, ringangu lěba e tawe makakaonodu ene. Kereu sěngkatau e měngonggọu patikụ arětạ e kụ i pěmělli kakěndagẹ̌ e, nal᷊ahẹ u kětạeng lahinakang kaěbakenge.

⁸I kami e piạ tuaring kami e wawine kụ deng kạdodọ buam papohosange. Kụ kai apa hinong koateng i kami waugi sie e kereu piạ u ramahi mědorong?

⁹Mangawe i sie e kai meselẹ̌ sěmbaụ, tangú rarisikangbeng kami e měnara sal᷊aka su wowone. Mangawe i sie, pasěllangeng sěmbaụ e, tangú pal᷊eěngbeng kami e ringangu kalun cěmara.

¹⁰Iạ ini e meselẹ̌ sěmbaụ, dingangu wuan susuku e měnarane. I tatuno naungku e masingkạ u seng si sie e iạ makahombang karal᷊uasu naung mal᷊unsemahẹ̌.

¹¹I Salomo e piạ baelu anggorẹ̌ su Baal-Hamon; baelẹ̌ ene e nisarakange su manga mělahapane. Sěngkatau-sěngkatau e pěmaehu roite sal᷊aka sěhiwu su kal᷊ěpane waugu lětạ e,

¹²ringangu makaěbạ dua hasụ su kal᷊ẹ̌pane waugu liaghang gatinu e. Balạete roitẹ̌ ene e waugi kau, Salomo, ringangu manga mělahapa waelu. Arawe waelu anggorẹ̌ku e, tataghuanengku e hala, ene su těngoku.

¹³Ei, tumanạu sasuang, manga hapị e mapulu rumaringihẹ̌ tingihu; kụ apararingihẹ̌ko ene si siạ!

¹⁴Tatuno naungku, děntako kere kijang, kere anạu rusa su wawul᷊urangu Beter.