Read Sangir YESAYA 1 Bible Online

YESAYA 1 - Sangir bible

YESAYA 1

¹ Bukẹ̌ ini e lohom manga tatanata mạanung Yehuda ringangu Yerusalem kụ nilahẹ u Ruata si Yesaya, anạ i Amos, su tempong i Uzia, i Yotam, i Ahas dingangu i Hizkia mẹ̌pẹ̌parenta su Yehuda.

²Daringihẹ̌ko ei langị, tatingangko ei dunia! MAWU e něhengetang, ”Manga rariọ kụ seng Takụ nitangkianenge nẹ̌pahuwungkadẹ̌ si Siạ.

³Sapi e makạkiral᷊a taghuange, kalide e makạkiral᷊a tampạ u kakanengange nisadiang mawune. Arawe umatẹ̌-Ku Israelẹ̌ e tala wue; i sire tawe makal᷊ahěngang.”

⁴Silakạ bue i kamene taumata warạdosa, taumata apang lulune nẹ̌ginsal᷊ẹ̌ dingangu ral᷊akisẹ̌. I kamene kai seng nanawo ual᷊ingu rosang kamene. I kamene kai seng tawe něnarimạ u MAWU ringangu timal᷊ikudẹ̌ Duata Kasusiange kụ harusẹ̌ sěmbaěng i kamene.

⁵Unụe i kamene měngkate turusẹ̌ dụdendehẹ̌? Mapulu tangu i kamene i hukung limembong kawěhạ e lai? Těmbọu e seng napenẹ u manga kěhene, naungu ringangu tiněnnanu e masakị.

⁶Bọu těmbọ sarang pal᷊edu laedẹ̌ e tawẹ apa reng mapia e su wadangu. I kamene měngkai napenẹ u manga sahěnụ e, manga l᷊iwị e ringangu manga l᷊esẹ e. Manga l᷊esẹ u tamai ene e bědang tawe nịburěsi arau nibawěkisẹ̌, tawe lai nịundangengu l᷊ana.

⁷Banuanu e seng nipakawinasa; manga soanu e nasue nitutung. Su těngom matanu e tau raghị něngal᷊ạ ěntananu ringangu nakagholang kěbị e.

⁸Kětạembeng i Yerusalem nal᷊ěmbe kai kere soa kụ nikal᷊iwung dingangu tawe nakakoạ manga apa, mẹ̌sul᷊ungu selo su rahaming anggorẹ̌ arau suěng su rahaming katimu.

⁹ Mangawe MAWU Limembong Kawasa e tawe měliwiru pirang katau e wọu i kitẹ e, i kitẹ e sembeng mawinasa marihutu kere Sodom dingangu Gomora.

¹⁰Yerusalem, manga těmbonange ringangu wansanu e seng nakoạ kere tau Sodom dingangu Gomora. Daringihẹ̌ko apang niweram MAWU e si kau; nẹ̌naungeko nitěntiron Duata e si kitẹ e.

¹¹MAWU e něhengetang, ”Su naungu e Iạ mapulung kěbị sasěmba kụ turusẹ̌-turusẹ̌ sẹ̌sěmbaěng si Siạ e? Iạ e seng nasaheng manga domba sasěmbanu tinongkạ dingangu tawang anạu sapinu. Dahang sapi esẹ, domba ringangu kambing tawe su kapuluku e.

¹²I sai něndolohʼi kamene nẹ̌bawa kal᷊awọu sasěmba ene su tempong i kamene riměnta nẹ̌kal᷊iomaneng si Siạ e? I sai něndolohi kamene pinẹ̌sawuhẹ̌ su Wal᷊e-Ku Susi e?

¹³ Měngkate tawẹ kěhase mẹ̌bawa sasěmbanu ene. Iạ e nẹ̌tahamutan darurune. Iạ e nawěnsing dingangu takatahang makasilo si kamene měmantugẹ̌ Bul᷊ang Buhu, manga ěllon Sabatẹ̌ dingangu manga ěllo ghaghuwạ ore lai manga pẹ̌kakakomol᷊u hal᷊ẹ̌ u agama. Kěbị e nipakaturạ i kamene ringangu manga rosang kamene kụ nakoạ kere wawawěng si Siạ e; Iạ e seng narul᷊ěpe namikul᷊ẹ̌.

¹⁵Kereu i kamene měhengkẹ l᷊imang kamene kụ mẹ̌doa, Iạ e tawe mẹ̌pandung. Tawe mahimang bae kereapa kanandune kakal᷊iomanengu, Iạ e tawe mapulu rumaringihẹ̌, batụu ringangu l᷊imang kamene e seng němate mal᷊awọ.

¹⁶Uhasẹ̌ko wadangu e sarang mawurẹ̌sị. Pědungko kěbị karal᷊akisẹ̌ kụ seng kinoạ i kamene ene. Kụ kumbahang saụ mẹ̌koạ dal᷊akisẹ̌,

¹⁷pěmpěngěndungko mẹ̌koạ mapia. Apakateiko kạadilẹ̌ e ringangu punasẹ̌ko pananědạ e; ghěllịko su manga rariọ kasisi ěndusẹ̌ e hakẹ̌ i sire, ringangu tatawange wue pěrkarang manga wawine wal᷊u.”

¹⁸MAWU něhengetang, ”Boete hanggosang i kitẹ e pěrkara ini. Manimbe i kamene mahamụ kamumụ ual᷊ingu kal᷊awọu rosang kamene, i kamene sarung Takụ uhaseng pakawira kere kapesẹ̌.[1] Manimbe rosang kamene e mal᷊awọ dingangu mawěhạ, i kamene sarung Takụ ampungang sěngapang botonge.

¹⁹Kereu i kamene mapulu tumuhụ si Siạ e, i kamene sarung makateěng kěbị apang mapia kụ apang gěsing banuanu.

²⁰Kaiso kereu i kamene rumokạ si Siạ e, i kamene sarung mate su ral᷊ungu pẹ̌sengketangnga. Iạ e MAWU, seng nẹ̌bera.”

²¹Soa nạung kal᷊amona e masatia, ini e seng nakoạ kere sěngkatau tahasundal᷊ẹ̌! Kal᷊imona, kěbị tumanạ e adilẹ̌ dingangu matul᷊idẹ̌, arawe ini e seng nịpẹ̌tanakengu tahapate.

²²Yerusalem, kal᷊imona e i kau mẹ̌sul᷊ungu sal᷊aka, arawe ini e semben tawẹ arẹ̌gane lai. Kal᷊imona e i kau mẹ̌sul᷊ungu anggorẹ̌ mahuwusẹ̌, arawe ini e kětạeng akẹ marihutu.

²³Manga pangahạ u e měnggaghohaeng dingangu paparentaěngu manga tahatako; i sire papuluang měnarimạu poroseěng dingangu roitẹ̌ sasorokẹ̌. I sire tawe mapulu tumatawang apang kasisi ěndusẹ̌ e su pěngadilang; tawe mapulu rumaringihẹ̌ kạbaratangu apam bal᷊u.

²⁴Ual᷊ingu ene MAWU Limembong Kawasa Ruatang Israelẹ̌ e něhengetang: ”Ei manga sekẹ-Ku e, Iạ e sarung měmal᷊isẹ̌ uneku e si kamene, sarang i kamene seng tawe lai manigěsạ si Siạ.

²⁵Iạ sarung měngal᷊ạ tindakangu si kamene. Mẹ̌sul᷊ungu taumata měnahị bul᷊aeng i kamene sarung Takụ sahikang; apang mal᷊amuhụ sarung Takụ ipakawembang bọu anunu.

²⁶I kamene e sarung Takụ gělirangu l᷊ai manga mělahukung dingangu manga měnanasa kere nạung kal᷊imona. Tangu Yerusalem sarung isěmba soa adilẹ̌ dingangu satia.”

²⁷MAWU e adilẹ̌ e, tangu i Sie sarung mapakasal᷊amatʼu Yerusalem dingangu taumata apan němpẹ̌sasěsilẹ̌.

²⁸Arawe taumata apam barạdosa kụ němpěnggohaeng si Sie e sarung ipakawinasa-Ne, dingangu patikụ apang něněntangu i Sie e sarung ipakaupu.

²⁹I sire sarung makahombang kamamea ual᷊ingu měmpạněmba manga kakaluang dingangu mapakạtaning manga rahami e waugu manga mahang duata.[2]

³⁰I sire sarung makoạ kere kalu ghẹ̌guwạ kụ malolang daunge ringangu mẹ̌sul᷊ungu sasuang tawe sasẹ̌bohang.

³¹Mẹ̌sul᷊ungu kalung ěmme mahěgu natutung u wungam putung sěngkaměsị, kerene lai taumata kawasa sarung ipakawinasa ual᷊ingu kal᷊awọu kakanoạ i sire hala ral᷊akisẹ̌ e, kụ tawẹ apa taumata makapetọ kaghagholang ene.