Read Sangir YESAYA 10 Bible Online

YESAYA 10 - Sangir bible

YESAYA 10

¹Kạěngkěhang i kamene kụ apang mapạkadiadin toratẹ̌ e tawẹ adile waugu ipangěpisẹ̌ bansa-Ku.

²Ual᷊ingu kakakoạ kerene ute i kamene měsẹ̌sěding u tau kasiang makaěbạ bahageange ringangu kạadile ringangu mělẹ̌hampasẹ̌ arětạ u apang bal᷊u ringangu manga rariọ kasisi ěndusẹ̌.

³Apa sarung koateng i kamene su ěllong Duata e měhukung si kamene ngae? Kai a akal᷊u su tempong i Sie mapakarěntan silakạ bọu wanua marau e? Kai si sai i kamene sarung mẹ̌dorong tul᷊ung? Kai suapạ e sarung pěmuniang kakakalạu tangu?

⁴Pal᷊edu e ute tumbạeng pateěng su ral᷊ungu pẹ̌seketang arau ahakeng kere tau kinataweng. Kaiso MAWU e wědang piạ langehe ringangu man tatapẹ̌ měhukung.

⁵ MAWU e něhengetang, ”Kạěngkěhang Asyurẹ̌ e. Asyurẹ̌ e Takụ nipakẹ kere ghagheserẹ̌ dingangu wawěbahẹ̌ ipěluwagẹ̌ si sire taumata apang kinahinoěngu ral᷊angehẹ̌-Ku.

⁶Iạ e rimolohu Asyur waugu ipěnekẹ bansa-Ku kụ nẹ̌tul᷊a e ringangu nakal᷊angehẹ̌ Siạ e. Iạ e rimolohu Asyur waugu ipěhampasẹ̌ dingangu pẹ̌tako ringangu apěndal᷊inda bansa-Ku e kere awul᷊ẹ̌ sural᷊eng.”

⁷Arawe ratung Asyur e piạ karakine hala. I sie piạ ol᷊ange waugu mẹ̌pakẹ u kal᷊ahasa ringangu mạminasa wansa l᷊awọ.

⁸I sie mạngobotu watangenge angkuěnge, ”Kal᷊awọu mol᷊ensekẹku e kěbị e kai mararatu!

⁹Takụ ahoěng manga soang Kalno ringangu Karkemis, Hamat dingangu Arpad. Takụ lai pul᷊ahoěng manga soan Samaria dingangu Damsyik.

¹⁰Takụ ipakawatạ kal᷊awọu kararatuang apang kụ měmpạněmba manga mahan duata kụ limembong kawasa wọu apang ene su Yerusalem dingangu Samaria.

¹¹Samaria ringangu patikụ mahan duatane sen takụ nipakawinasa. Apang mẹ̌sul᷊ung sarang takụ koateng su Yerusalem dingangu kěbị mahan duata kụ sěmbaěng paịse.”

¹²Kaiso MAWU e něhengetang, ”Kereu apan Takụ koateng su Wongkon Sion dingangu su Yerusalem ene sembeng nasue, Iạ e měhukungu ratung Asyur ual᷊ingu kal᷊aobotẹ̌ dingangu kararangẹ u naunge.”

¹³Datung Asyurẹ̌ e tẹ̌tahawisaraěng tạ l᷊ohone, angkuěnge, ”Kěbị ene e takụ kinoạ dingangu kawasaku e hala. Iạ e pelesa ringangu pintarẹ̌. Takụ niěmmụ pẹ̌saraěngu wěllạu manga wansa, ringangu takụ nipul᷊aho rariahin sire. Mẹ̌sul᷊ungu banteng iạ e něndal᷊inda taumata apang mẹ̌pẹ̌parenta.

¹⁴Manga wansa su dunia e mẹ̌sul᷊ungu sal᷊ehu manụ u winalangeng; kụ tawẹ susane arětạ i sire takụ al᷊akeng kere taumata mạngokọ tělluhẹ̌ nitěntang su sal᷊ehẹ̌. Tawẹ apa panide kụ mẹ̌kẹ̌kal᷊ipěpahẹ̌, tawẹ u ghumangangan tatodọ e arau su sio.”

¹⁵Arawe MAWU e něhengetang, ”Botonge wal᷊iung e lumesạ u watangenge su mẹ̌papakẹ e? Apa lahaghari e limembong kapiane wọu měndal᷊ahaghari tangu? Bal᷊inewe wawanggo měhengkẹ taumata e, kaiso kawe taumata měhengkẹ bawanggo.”

¹⁶Ual᷊ingu tau Asyur kawe seng něngobotu watangeng, tangu MAWU Lembong Kawasa e sarung maparěntan sakị baugu pěhukung manga pěrwira maral᷊intoị e. I sire e sarung songkanengu lěhabẹ̌ marangẹ kere putung měhengisẹ̌ turusẹ̌.

¹⁷Duata susi, Tualagu Israelẹ̌ e sarung makoạ kere tualagu putung kụ su ral᷊ungu sěhěllo e makatutung kal᷊awọu sạbarang, sarangkate manga rěmpugẹ̌ mal᷊ahoro.

¹⁸Manga kěhu maghahundung dingangu rahami matatuwo su wanuang Asyurẹ̌ e sarung ipakawinasa marihutu, kere tau masakị kụ rụdal᷊umpasiang sarang mate.

¹⁹Manga kakaluange kate mal᷊ěmbe mahal᷊i, hakịu manga rariọ darodọ e mal᷊aing botonge makarekeng.

²⁰Tempone sarung marěnta, lěmben tau Israel nal᷊iwirẹ̌ e sen tawe lai měngumbalang biahe su wansa kụ kawasa kụ maraning maminasa si sire, kaiso kawe su MAWU, Ruatang Israel kụ susi.

²¹Lěmbene kadodọ tau Israelẹ̌ e sarung mẹ̌tobatẹ̌ su Mawu Ruata pěrkasa.

²² Manilaing tau Israel orasẹ̌ ini lai e mẹ̌sul᷊ung kal᷊awọe ringangu manga ěnne su apeng kaiso kětạeweng pirang katau sarung mẹ̌sul᷊e. Papahangu MAWU e seng masandigẹ̌, dingangu mambeng hinone ringangu adilẹ̌ bansa ene e ipakawinasa.

²³Ore, kasěllahu wanua e sarung goghaheng u MAWU Limembong Kawasa e; seng ene e putusangu MAWU e, ringangu semben tawe lai ikawal᷊ui.

²⁴MAWU Limembong Kawasa e něhengetang su manga umatʼE mạtanạ su Sion, ”Abe kěngkatakụ u tau Asyur, manilaing i sire měmpěnẹ̌nahida ringangu měmpạnumbiagẹ̌ si kamene kerẹewe kẹ̌koatengu tau Misirẹ̌ e nạung kal᷊imonane.

²⁵Su ral᷊ungu tempo manimbụ ral᷊angehẹ̌-Ku e si kamene maědo, mase i sire Takụ sarung ipakawinasa.

²⁶Iạ e kai MAWU Limembong Kawasa sarung měnggeserẹ̌ si sire ringangu ghagheserẹ̌, kerẹewe naněntiro tau Midian su wul᷊udu watung Oreb. Asyur sarung ihukung, kerẹewe Iạ něhukungu Misirẹ̌.

²⁷Su tempo ene Iạ sarung měliwirẹ̌ si kamene wọu pěnanědạu tau Asyur, dingangu i sire sembelain tawe mẹ̌kawasa si kamene.”[21]

²⁸Sordadong Asyurẹ̌ e seng němul᷊aho soang Ayat.[22] I sire seng limiu Migron! Manga sinasạ i sire e seng nitěntang su Mikhmas!

²⁹I sire seng su sěmběkan dal᷊iuang dingangu seng nẹ̌těngkahěbi su Geba! Tumanạu soan Rama nahungkende, ringangu tumanạu Gibea, soan Datu i Saul, seng němpahuntal᷊ang.

³⁰Ene němansage, ei tumanạu Galim! Daringihẹ̌ko tumanạu Laisya! Simbahẹ̌ko, tumanạu Anatot!

³¹Tumanạu Madmena ringangu Gebim nahuntal᷊ang němpěnguntang.

³²Sěhěllo ini sekẹ e kai su soan Nob, kụ paịse i sire němpělimbolongke kěngkung nẹ̌timona Wongkon Sion, sol᷊ong soan Yerusalem.

³³MAWU Limembong Kawasa e sarung měhaka si sire kere lelang u kalu nitěnto. I saing katoghasenge ringangu karangetange sarung těntoěng, dingangu hakaěng.

³⁴MAWU e sarung mělengge si sire kere něnuwang kalu ringangu wal᷊iung su tal᷊oarang kěhu. Manilaing i sire matoghasẹ̌ kere kalu kakětikange su Libanon, kaiso i sire e mang mal᷊engge lai!