Read Sangir YESAYA 11 Bible Online

YESAYA 11 - Sangir bible

YESAYA 11

¹ Pal᷊ahěnton Datu i Daud mẹ̌sul᷊ungu kalu seng nituwang. Kaiso kerẹewe lai wọu tuidẹ̌ e tumuwo mungkul᷊e wuhu, kerene lai wọu hěnton Daud sarung suměpụ datu sěngkatau.

²Kawasang MAWU e sarung měngahạ si sie, makariadin sie piạ budine ringangu pelesa, mahino měngal᷊ạ putusang dingangu měndal᷊eng u ene; makạkiral᷊a kapulu Duata ringangu matuhụ si Sie.

³I sie makěhagẹ̌ tatuhụ e su MAWU. I sie tawe měngkai lighạ měhukung mahimang laul᷊ị u taumata.

⁴ Tau kasiange lěhukunange su kạadile, taumata tawe makakoạ manga apạ e tẹ̌tatawangenge ringangu katul᷊ide; taumata piạ sal᷊ane e lẹ̌hukunange ual᷊ingu parentane, taumata ral᷊akisẹ̌ e lẹ̌upuange.

⁵ I sie mẹ̌kẹ̌karạdiahangbe ringangu kạadile ringangu satia su patikụ sabarang.

⁶ Dal᷊ugẹ̌ e sarung matanạ dingangu domba, masang kambal᷊ọ e rụdal᷊oka su sěndihangu kambing. Anạu sapi e sarung kumaěng děmpugẹ̌[23] dingangu anạu singa, dingangu anạ kạdodọ e tumaking si sire.

⁷Sapi e sarung kumaěng děmpugẹ̌ dingangu běruang, manga anạ e mahundal᷊oka ringang. Singa kumaěng děmpugẹ̌ e kere sapi.

⁸Saral᷊aing sěngkatau rariọ kadodọ e tawe mal᷊esẹ kereu měnalang su rěduhu těmpu maghaghiadẹ̌.

⁹ Su sion, su Wongkon Duata Susi, tawẹ apa kụ dal᷊akisẹ̌ arau měnggohaeng. Banua e sarung mapenẹ u kasingkạ u mạanum Duata e, kere akẹ namenẹ taghal᷊oang.

¹⁰ Tempone sarung marěnta sěngkatau ratu hěnton Daud makoạ puidu kakakělaěngu manga wansa. I sire ruměnta su anune dingangu su tampa pẹ̌tẹ̌tanekengě sarung sẹ̌sal᷊uhang.

¹¹Su ěllo ene e MAWU e sarung sěnsul᷊ẹko l᷊ai mẹ̌pakẹu kawasanʼE ringangu měnul᷊e kapia umatʼE nal᷊ěmbe su Asyur dingangu Misirẹ̌ e pakapul᷊ẹ, su manga soan Patros, Sudan dingangu Elam, su Babel, Hamat dingangu manga tahanusa mararau.

¹²MAWU e sarung mapaawịu waneha waugu apam bansa. Seng ene e tatialane i Sie měnampungu tau Israel dingangu Yehuda kapia e kụ seng nẹ̌sal᷊iawuhẹ̌ suapam pondol᷊u dunia e ringangu nẹ̌bawa si sire pinakapul᷊ẹ.

¹³Kararatuang u Israel sembelain tawe simingking si Yehuda, ringangu Yehuda tawe lai měsědụ u Israel.

¹⁴I sire e sarung sěngkapěnekẹ tau Pilistin su sěmběkam bahẹ dingangu sěngkapěmul᷊aho manga wansa su sěmběkan daki e. I sire e sarung měmatạ bansang Edom dingangu Moab, dingangu wansang Amon sarung mẹ̌tumpěkuhẹ̌ si sire.

¹⁵ MAWU e sarung mapakal᷊ěsang Běngạ u Suez. I Sie napatiụ u anging matětị hakịu Sal᷊ụ u Efrat nělelang pitu kụ akene mawawawo, kụ apan taumata e wotonge makal᷊iu ringangu sapatune.

¹⁶Baugu umatʼE kụ nal᷊ěmbe e sarung piạ dal᷊eng gẹ̌guwạ baugu suměbang bọu Asyur, mẹ̌sul᷊ungu su tempong Israelẹ̌ e simẹ̌bang bọu Misirẹ̌ e.