Read Sangir YESAYA 12 Bible Online

YESAYA 12 - Sangir bible

YESAYA 12

¹Sarung mahumpạu tempone i kamene mẹ̌kantarị: ”MAWU, iạ e makitarimakasẹ si Kau, ual᷊ingu i Kau e něhibore si siạ. Nạung kangerẹ i Kau e limangehẹ̌ si siạ, arawe ini e sen nal᷊ěda ral᷊angehu e.

² Těngadẹ̌, Duata e Měnanal᷊amatẹ̌ku, iạ e mangimang si Sie. Iạ e tawe matakụ, batụu i Sie e mạnoghasẹ̌ si siạ. Mananal᷊amatẹ̌ku e ute kai Ruata kụ kai waugi Sie iạ e mẹ̌kantarị.

³Kere akẹ maral᷊ěnding makạl᷊uasẹ̌ taumata narou, kụ kerene i kamene sarung lumiagẹ̌, ual᷊ingu nipakasal᷊amatʼu Ruata.”

⁴Sarung mahumpạu tempone i kamene mẹ̌bera, ”Pakitarimakasẹ su MAWU ringangu sěmbai wue i Sie. Pěhabarẹ̌ bue su patikụ bansa e hal᷊ẹ̌u kawawantugʼE ringangu kal᷊awọu kakanoạʼE.

⁵Pẹ̌kantarị bue waugu MAWU, batụu i Sie kai nẹ̌koạ karal᷊inaụ mal᷊awọ. Balạekere kasěllahu dunia e nakaringihẹ̌ katataingu kakanoạʼE.

⁶Pěmpahul᷊uasẹ̌ ore pěmpahul᷊iagẹ̌ ei tumanạu Sion; pẹ̌kantarịe pakal᷊uasẹ̌. Duatang Israel susi e mamben mawantugẹ̌, i Sie mạtanạ su tal᷊oarang kamene.”