Read Sangir YESAYA 13 Bible Online

YESAYA 13 - Sangir bible

YESAYA 13

¹ Seng ini e tatanatan Duata, kụ niraekang i Yesaya anạ i Amos mạanung Babel:

²Bitingko wanehan sekẹ pusigu wěntihe kụ seng nal᷊inggi e! Pěmpẹ̌ěnggahẹ̌ bue su manga sordado e ringangu pěmpěnědewen takiahi kamene tadeạu i sire měmpěhěmbạbe manga tukadu pasěllangengu soa maobotẹ ene e.

³MAWU e seng nẹ̌kui manga matatěbone kụ pinilenʼE. I sire e kai piạ bahanine, mạngarěgang batangeng dingangu kẹ̌karaloěngʼE. MAWU e napẹ̌karadiahang i sire ipẹ̌lẹ̌hukung si sire apang kinahinoěngu ral᷊angehʼE.

⁴Daringihẹ̌ko tingihu ghahaseng su wawul᷊urang e, kere tingihu komol᷊angu taumata kụ tawẹ sihinge kal᷊awọe. Daringihẹ̌ko ghanohạ u manga kararatuang dingangu manga wansa kụ kạpẹ̌komol᷊e. MAWU Limembong Kawasa e mạmarikẹ̌sa wuntuang u sekẹ.

⁵I sire nahunděnta wọu manga wanua mararau su pondol᷊u dunia. Su ral᷊ungu ral᷊angehe MAWU e nẹ̌pakẹ i sire waugu ipěminasa patikụ dunia.

⁶ Pěmpẹ̌kěndung bue, batụu ěllom MAWU e seng masandigẹ̌, kụ kai ěllong kawawinasa kụ niaparěntang MAWU Limembong Kawasa e.

⁷Apan taumata e sarung makapěndang, u l᷊imane nipatene ringangu kinailangeng u kawahanine.

⁸I sire kěbị e sarung hombangengu takụ marasai, ringangu mẹ̌kẹ̌kiaratagu sakị kere wawine kapělẹ̌hěndinge. I sire sarung mahěmpandaěng sal᷊a kal᷊indasa, ghatin sire něngkahamụ u mea.

⁹Ěllom MAWU e sarung marěnta, kụ su ěllo ene MAWU e mẹ̌buntiagu pědune ringangu ral᷊angehʼE marasai e. Dunia e sarung makoạ kěhu l᷊inggi, ringangu apam barạdosa e sarung mawinasa.

¹⁰ Apam bituing dingangu ghal᷊ipohon bituing e sarung měngědo suměnnang; matangěllo e sarung marěndung su tempong i sie suměbang, dingangu wul᷊ang e tawẹ lai tualage.

¹¹MAWU e něhengetang, ”Iạ e sarung měhukungu dunia ual᷊ingu karal᷊akise, ringangu taumata raral᷊akisẹ̌ e ual᷊ingu kal᷊awọu rosan sire. Apan taumata maobotẹ̌ e sarung Takụ ipakasanạ, taumata naunge marangẹ dingangu matingkaị e sarung Takụ ihukung.

¹²Taumata ipakasal᷊amatẹ̌ e mahal᷊i-hal᷊i, i sire limembong kararaune wọu wul᷊aeng sahị.

¹³Iạ e sarung niapakariadin langị sumal᷊ungkende ringangu dunia e gumanuẹ̌ bọu tampạ e su ěllong Iạ e MAWU Limembong Kawasa e mělahẹ u ral᷊angehẹ̌-Ku.

¹⁴Tau raghị kụ mạtanạ su Babel sarung měmpẹ̌kal᷊iaesẹ̌ sol᷊ong banuan sire sěngkatau-sěngkatau. I sire tabidạu rusa kụ tumal᷊angu wadange wọu měnganganụ, arau ghapaěngu domba kụ tawẹ pangahạ e.

¹⁵U walạewe i sai kụ ikasamẹ e sarung těkateng sarang mate.

¹⁶I sire sarung mẹ̌sahidi manga anạ i sire rararodọ e ipakarul᷊ẹ, manga wal᷊en sire e hampaseng dingangu manga kawing i sire e piạ u lumia.”

¹⁷MAWU e něhengetang, ”Iạ e měnganoạ tau Madai[24] mědeạu měngalo Babel. I sire tawe kasorokangu sal᷊aka ringangu wul᷊aeng.

¹⁸Ringangu naěnakeng ore lai horom papitị e i sire sarung měmpěmate manga rariọ mangangudạ. I sire tawe tumatal᷊ěntụ u manga rariọ deng mahamụ e ringangu tawe kumakěndagu manga rariọ e.

¹⁹ Bọu patikụ kararatuange, Babelẹ̌ e kal᷊ěnggihange kụ nakoạ dal᷊esạ u tumanạ e. Arawe Iạ, MAWU e, sarung mapakaghohahẹ̌ kerẹewe sen Takụ kinoạ su Sodom dingangu Gomora.

²⁰Tawẹu lai sarang sěngkatau delaing makapẹ̌tanạ sene. Tawẹ apa tau Arabẹ̌ kụ deng mẹ̌pẹ̌palilị e kụ sarung měnakẹ u tentane su tampạ ene, ringangu tawẹ apa měngangahạ e kụ sarung makawawa kambing dingangu dombane kụ kumaěng děmpugẹ̌ sene.

²¹ Tampạ ene sarung pẹ̌tanakengu manga binatang dul᷊u. Manụ sampahạ sarung mẹ̌sal᷊ehẹ̌ su manga wal᷊en sire, ringangu manụ onta e sarung mẹ̌tanạ sene. Manga kambing dul᷊u e sarung mẹ̌bakangkang su wěllạu manga opehe.

²²Lahuangu asung kěhu e ringangu ral᷊ugẹ̌ e sarung piạ bal᷊ěmbenge wọu manga wal᷊e arau istanang Babel. Tempong kal᷊aopehe seng maranim marěnta dingangu orase sen tawe lai ikasohọ.”