Read Sangir YESAYA 14 Bible Online

YESAYA 14 - Sangir bible

YESAYA 14

¹MAWU e sarung kuměndagu Israelẹ̌ e umatʼE, ringangu měmile si sire makoạ tataghuanengʼE. I Sie sarung měměllọ i sire kapia su wanuan sire hala. Tau raghị e sarung duměnta ringangu mẹ̌dal᷊aụ dingangi sire.

²Mal᷊awọ bansa e sarung mẹ̌tul᷊ungu tau Israel baugu mẹ̌sul᷊e sol᷊ong banua kụ nighěllị u MAWU si sire, kụ paị sene manga wansa ene e sarung mẹ̌tahuěllang su tau Israel. Israel sarung měnaweng taumata kụ apam bọu němpěnaweng i sie ringangu mẹ̌pẹ̌parenta taumata apam bọu měmpạnědạ i sie.

³MAWU e sarung měliwirẹ̌ tau Israel bọu kasasakị dingangu sigěsạ e, ringangu wọu hal᷊ẹ̌ masěgadẹ̌ kụ nisihasa si sie.

⁴Kereu MAWU e mẹ̌koạ ene, i sire sarung mẹ̌baheau ratum Babel kere ini, ”Datu matingkaị e seng nanawo! I sie sen tawe lai makapanědạ kapia.

⁵MAWU e seng nangěnsue pẹ̌paparentang manga měngangawasa ral᷊akisẹ̌ e,

⁶kụ dingangu ral᷊angehe mạnědạ manga wansa ringangu měngkai hanesẹ̌ měnẹ̌numbiagẹ̌ si sire.

⁷Kasueěnge, kasěllahu dunia e sarung mal᷊enehẹ̌ dingangu marěmasẹ̌, mase apan taumata e měmpẹ̌kẹ̌kantarị maral᷊uasẹ̌.

⁸Kalun cěmara sihinge ringangu kalun cěmarang Libanon lụl᷊uasẹ̌ ual᷊ingu ratu matingkaị ene e sen nanawọ, kụ bouten sie tamai e tawẹ apa kụ seng dimolohẹ̌ u pěnuwang si sire!

⁹Dunian tau nate e sěngkapěněnsomahẹ̌ datum Babelẹ̌ e. Tangu himěkose himukudu apan taumata kawasa nạung kal᷊imona e su dunia, ringangu himukudu manga ratu e nẹ̌bangungke wọu kal᷊aianeng i sire.

¹⁰I sire kěbị e nẹ̌kui si sie, ’Ei! Orasẹ̌ ini i kau e seng mẹ̌sul᷊ung i kami, lome ringangu tawe makakoạ apa!

¹¹Kal᷊imona e i kau lẹ̌adateng u musikẹ̌ u kěcapi, arawe orasẹ̌ ini e seng su ral᷊ungu karal᷊ingun dunian tau nate. Manga ul᷊idẹ̌ e nẹ̌koạ daral᷊okaěngu, ringangu lěhenge nakoạ kahiwunu.’

¹² Ei ratum Babel, kal᷊imona e i kau kai wituing ahusu ěllo matualagẹ̌, arawe orasẹ̌ ini i kau e seng nanawo wọu langị! Nạung kal᷊imona, i kau e nakawatạ manga wansa arawe orasẹ̌ ini e i kau e seng nipěpạ su ěntana.

¹³ I kau e mẹ̌kẹ̌karaki maawị sol᷊ong langị dingangu měměllọu kal᷊aianengu su wowom bituing karangetange! I kau mạngěnnau makakaiang kere ratu su wowom bul᷊ude su wahageang sěmběkan sawěnahẹ̌, tampạ u manga mahan duata e měmpẹ̌tampung.

¹⁴I kau mẹ̌bẹ̌bera u i kau e sarung taraị mawị sol᷊ong kararangetangu winawa e kụ makoạ kere Karangetange.

¹⁵Sumbal᷊iau i kau e wẹ̌bunsal᷊eng sol᷊ong tampạ u tau nate karal᷊ungange.

¹⁶I sire kụ apan sene e sarung měmanda ringangu měnitị si kau. I sire sarung makiwal᷊o, ’Seng ini e taumata kụ makakende runia ringangu makahěkosẹ̌ kal᷊awọu manga kararatuang?

¹⁷Seng i sie tangu nakagholang manga soa ringangu němal᷊ui dunia e nakoạ banua l᷊inggi tangu? Seng i sie ini tangu tawẹ běke naměllọu taumata nitawenge arau mapakawalan sire ipakapul᷊ẹ?’

¹⁸Kěbị-kěbị e nạung datung manga wansa e kụ nilěbing pinakapia su lěbingu sěmbaụ-sěmbaụ,

¹⁹kaiso i kau e tawẹ lěbingu; maietu e irěmmẹ kere hětị e kụ tawe itarimạ, ambungangu manga maietu pějuang kụ nairị su ral᷊ungu pẹ̌seketang, dingangu nirěmmẹ dingangi sire su l᷊iangu watu, kere kasuang kụ tẹ̌tatahidaěng.

²⁰I kau e seng nawihua wanuanu ringangu němate bansanu e hala. Ual᷊ingu ene i kau sarung tawe ilěbing kere manga ratu wal᷊ine. Tawẹ u sarang sěngkatau wọu walagu ral᷊akisẹ̌ ene e sarung ipakasal᷊amatẹ̌.

²¹Pěral᷊ahiudẹ̌ e sarung lighạ itětạ! Manga ahusu e sarung mate ual᷊ingu rosang manga i upung i sire e. Tawẹ u sarang sěngkatau wọu i sire sarung mẹ̌parenta su dunia arau měmangung manga soa e.”

²²MAWU Limembong Kawasa e něhengetang, ”Iạ sarung měnekẹ Babelẹ̌ e ringangu měngupu si sire. Tawẹ u sarang sěngkatau e Takụ ipakasal᷊amatẹ̌, sarang manga rariọ tawe Takụ pakawala wiahẹ̌. Iạ e kai MAWU, seng něhengetang.

²³Babel sarung Takụ koateng manga l᷊ebo pẹ̌tatanakengu manụ sampahạ. Babelẹ̌ e sarung Takụ sapuang pakawurěsi. Iạ e MAWU Limembong Kawasa e seng nẹ̌bisara.”

²⁴ MAWU e Limembong Kawasa e nẹ̌salu: ”Apan Takụ ikẹ̌karaki e seng mariadi.

²⁵Tau Asyur su Israel banua-Ku e sarung Takụ ipakawinasa, ringangu apang su manga wawul᷊urang-Ku e sarung Takụ tatahidaěng. Iạ e sarung měliwirẹ̌ bansa-Ku wọu pananědạ dingangu wọu wawaěng kụ nịsasihasa si sire kahiang tau Asyur.

²⁶Seng ini e karaki-Ku e waugu dunia; takiahẹ̌-Ku e naul᷊uhẹ̌ baugu ipěhukung manga wansa.”

²⁷MAWU Limembong Kawasa e seng němutusu mẹ̌koạ kerene. I Sie něhatedu takiahʼE waugu měhukung, dingangu tawẹ u sarang sěngkatau kụ makapěneheng si Sie.

²⁸ Seng ini e tatanata, niwokạ su ral᷊ungu taungu Ratu i Ahas napohong.

²⁹ Ei tau Pilistin, bawanggo kụ ipẹ̌pẹ̌pakẹ pěmanggo si kau e seng napědi. Kaiso kumbahang i kau e lumuasẹ̌, u kamagengu těmpu sěmbua e mate, těmpu limembong karal᷊akise lai e su mongo měngaweng těmpu ene, ringangu tělluhu těmpu e měngighang u nagạ piạ papanide.

³⁰I kamene e sarung kal᷊unusang marasai, ringangu kěbị taumata apang nal᷊ěmbe e sarung pateěng. Samurine taumata limembong kakasiange wọu umatu MAWU e, sarung makahombang kaěng, dingangu taumata apang tawe makapẹ̌koạ apa-apa e sarung mẹ̌biahẹ̌ tạ konsang apa.

³¹Gahiorọ e ringangu pẹ̌kiaratage pakitul᷊ung, ei manga soam Pilistin! Karimạko i kamene kěbị e reng měngkawintogu takụ! Binawang awul᷊ẹ̌ e měngkate apa tụtiowol᷊ẹ̌ bọu sěmběkan sawěnahẹ̌ tatialan darěntan sakẹ; tawẹ apa tau mělle su tal᷊oaran sire e.

³²Sasimbang apa wue sarung gěllirang i kitẹ e su manga rarolohang kụ darěntane wọu wansang Pilistin? I kitẹ e sarung mẹ̌bera si sire u MAWU e seng němětị Sion, dingangu umatʼE kụ nasigěsạ e sarung makahombang kal᷊aěllung sene.