Read Sangir YESAYA 15 Bible Online

YESAYA 15 - Sangir bible

YESAYA 15

¹ Ini e tatanatam MAWU waugu Moab. Soang Ar dingangu Kir ipakawinasa su ral᷊ungu sěhěbi, ringangu wanuang Moab mariadi ipěhione.

²Tumanạ u Dibon[25] němpẹ̌saka wěntihe mědeạu mahunsangị su tampạu pananěmbaěng manga mahan duata. Tumanạu Moab měngkate lụl᷊ahunsusang soan Nebo ringangu Medeba. I sire němpělungguhẹ̌ těmbọ dingangu něngul᷊ụ bianggụ tatialan nělutu.

³Taumata su ral᷊eng e němpěluheng karong tatialan nělutu; taumata mạhunsangị dingangu mạhungkiạ su tanalapang dingangu su wowong atụ su wal᷊e.[26]

⁴Tau Hesybon dingangu Eleale mạhunggunggui, kụ tingihʼi sire e ikẹ̌karingihẹ̌ sarang Yahas. Mundangu e lai manga sordado e němpahungkende; i sire seng kẹ̌kailangengu kawawahanin sire.

⁵Iạ e tụtal᷊ěntụ u Moab! Tumanạ e němpěnguntang sol᷊ong soan Zoar dingangu sol᷊ong Eglat-Selisia. Piạ u němpẹ̌saka su ral᷊eng sol᷊ong Luhit apidu kapahungkiạ e piạ u němpẹ̌tal᷊ang sol᷊ong Horonaim apidu kạpahunsikine ual᷊ingu kinahombangengu silakạ.

⁶Akẹ u Sal᷊ụ u Nimrim dingangu rěmpugẹ̌ kụ seng němpẹ̌tuwo su wiwihe seng nahěgu marasai kụ sen tawẹ kạdiongeng kakaluang němpẹ̌tuwo mal᷊aělong.

⁷Taumata e němpẹ̌lẹ̌ba lelangu Sal᷊ụ u Haarabim dingangu němpẹ̌tawakalị němpěngambang kal᷊awọu rarotong dingangu apal᷊iwụ i sire e.

⁸Su apan tampạ su pẹ̌saraěngu Moab ikẹ̌karingihẹ̌ bawansagẹ̌. Pal᷊ahunsangị ene kinaringihẹ̌ su Eglaim dingangu Beer-Elim.

⁹Su Dibon akẹ u sal᷊ụ e nahamụ ual᷊ingu nẹ̌dal᷊aụ u raha. Kụ Duata e sarung maparěntang kal᷊awọu limembong kahuagate lai waugu taumata sene. Měnanuhude kụ nirolohẹ̌ e sarung měmate tau Moab kěbị apam bědam biahẹ̌ e.